ഇന്ത്യയിൽ ഇപ്പോൾ ആകെ 81 യൂണികോണുകളാണുളളത്. 2021ൽ മാത്രം 44 യൂണികോണുകൾ ഉണ്ടായെന്നാണ് ഔദ്യോഗിക കണക്കുകൾ. ഇതിലൂടെ 89.17 ബില്യൻ ഡോളർ വാല്യൂവേഷനാണ് കണക്കാക്കുന്നത്. 1 ബില്യൺ ഡോളർ മൂല്യമുള്ള കമ്പനിയെയാണ് യൂണികോൺ എന്ന് വിശേഷിപ്പിക്കുന്നത്. Tracxn ഡാറ്റ സൂചിപ്പിക്കുന്നത് പ്രകാരം 2017 മുതൽ, കൂടുതൽ സ്റ്റാർട്ടപ്പുകൾ ബില്യൺ ഡോളർ മൂല്യനിർണ്ണയത്തിൽ എത്തുന്നുവെന്നും, 2021-ൽ രണ്ട് മടങ്ങിലധികം കുതിച്ചുചാട്ടത്തിന് സാക്ഷ്യം വഹിക്കുന്നുവെന്നുമാണ്. 2020ൽ 16 യൂണികോണുകൾ മാത്രമാണ് ഉണ്ടായത്. കൂടുതൽ സ്റ്റാർട്ടപ്പുകൾ പബ്ലിക് ലിസ്റ്റിംഗ് നടത്തിയ വർഷവുമാണ് 2021. ഇന്ത്യയിലും വിദേശത്തുമായി സ്റ്റോക്ക് എക്സ്ചേഞ്ചുകളിൽ അരങ്ങേറിയ യൂണികോണുകളിൽ Paytm, Zomato, Nykaa, Freshworks, Nazara Technologies, RateGain എന്നിവ ഉൾപ്പെടുന്നു. കമ്പനികളുടെയെല്ലാം മൊത്തം വിപണി മൂലധനം 45.03 ബില്യൺ ഡോളറിനടുത്താണെന്ന് Tracxn ഡാറ്റ കാണിക്കുന്നു. വർഷാവസാന ദിവസങ്ങളിൽ യൂണികോൺ പട്ടികയിൽ ഇടംപിടിച്ച സ്റ്റാർട്ടപ്പുകളാണ് Mamaearth, Globalbees എന്നിവ. 2021-ൽ ഇന്ത്യൻ യൂണികോൺ ക്ലബ്ബിലേക്ക് എത്തിയത് 11 ഇ-കൊമേഴ്‌സ് കമ്പനികളാണ്. ഓൺലൈൻ കാർ റീട്ടെയിലർമാരായ CarDekho, Droom, Spinny, സോഷ്യൽ കൊമേഴ്‌സ് കമ്പനിയായ Meesho, D2C ബ്രാൻഡ് Licious, മെൻസ ബ്രാൻഡ്സ് എന്നിവ ഇതിൽ ഉൾപ്പെടുന്നു. ഇ-കൊമേഴ്‌സ്, ഫിൻടെക് മേഖലകൾ 20 യൂണികോണുകൾ വീതമായി ഒന്നാം സ്ഥാനത്തെത്തി. വനിതകൾ നയിച്ച അഞ്ച് സ്റ്റാർട്ടപ്പുകളാണ് യൂണികോണുകളായത്.ഗിരീഷ് മാതൃഭൂതവും ഷാൻ കൃഷ്ണസ്വാമിയും സ്ഥാപിച്ച Freshworks നാസ്ഡാക്കിൽ ലിസ്റ്റ് ചെയ്ത ആദ്യ ഇന്ത്യൻ SaaS കമ്പനിയായിരുന്നു. 2010ൽ ഗിരീഷ് മാതൃഭൂതം സുഹൃത്തിനൊപ്പം ചെന്നൈയിൽ തുടങ്ങിയ SaaS സ്റ്റാർട്ടപ്പ് ഫ്രഷ് ഡസ്ക് ആണ് 2017-ൽ Freshworks ആയി റീ ബ്രാൻഡ് ചെയ്തത്. 2021 സെപ്റ്റംബറിലാണ് ഫ്രഷ് വർക്ക്സ് നാസ്ഡാക്കിൽ ലിസ്റ്റ് ചെയ്തത്. 13 ബില്യൺ ഡോളർ മാർക്കറ്റ് ക്യാപിറ്റൽ ലിസ്റ്റിംഗിലൂടെ കമ്പനി നേടി. 2021 അവസാനമാകുമ്പോഴേക്കും 50 യൂണിക്കോണുകൾ രാജ്യത്തുണ്ടാകുമെന്ന് നാസ്ക്കോമിന്റെ ചില റിപ്പോർട്ടുകൾ സൂചിപ്പിച്ചിരുന്നു.