പ്ലാവും ചക്കയുമെല്ലാം നമ്മുടെ പറമ്പിൽ ധാരാളമുണ്ട്.എന്നാൽ ചക്കയുടെ മൂല്യവർദ്ധിത ഉല്പന്നങ്ങളുടെ സാധ്യത അറിയത്തവരാണ് നമ്മൾ. മാംസത്തിന് പകരം വീഗൻ ബദലായും ചക്ക മാറിക്കഴിഞ്ഞു. അപ്പോൾ ഒരു ചക്ക ഒരു സ്റ്റാർട്ടപ്പിന് വഴിവച്ച കഥ ആയാലോ. ഗോവക്കാരനായ Sairaj Dhond തന്റെ കുട്ടിക്കാലത്ത് മുത്തശ്ശിയുണ്ടാക്കുന്ന ചിക്കൻ ഗ്രേവിയുടെ വലിയ ആരാധകനായിരുന്നു. ഗ്രേവിയിൽ ചക്കയുടെ കഷണങ്ങളും ഉണ്ടെന്ന് തിരിച്ചറിയാതെയാണ് കുട്ടിയായ സായ്രാജ് അത് ആസ്വദിച്ച് കഴിച്ചിരുന്നത്. ഉയർന്ന രക്തസമ്മർദ്ദം കുറയ്ക്കാൻ സഹായിക്കുന്ന പൊട്ടാസ്യം, ഫൈബർ എന്നിവയും ആന്റിഓക്‌സിഡന്റ് ഗുണങ്ങളും ഇരുമ്പ് ആഗിരണം ചെയ്യാനുള്ള കഴിവും എന്നിങ്ങനെ നിരവധി ആരോഗ്യ ഗുണങ്ങൾ ചക്കയ്ക്കുണ്ട്. ചക്കയിൽ കലോറിയും കൊഴുപ്പും കാർബോഹൈഡ്രേറ്റും കുറവാണ്. ഈ ഗുണങ്ങളെക്കുറിച്ച് മനസിലാക്കിയപ്പോൾ COVID-19 ലോക്ക്ഡൗൺ സമയത്താണ് Wakao Foods ആരംഭിക്കാൻ സായ്രാജ് തീരുമാനിച്ചത്.