ബ്രോഡ്ബാൻഡിൽ ബിഎസ്എൻഎല്ലിനെ മറികടന്ന് റിലയൻസ് ജിയോ
വയേർഡ് ബ്രോഡ്‌ബാൻഡ് സേവനങ്ങളിൽ ജിയോ
വയേർഡ് ബ്രോഡ്‌ബാൻഡ് സേവനങ്ങളിൽ ബിഎസ്എൻഎല്ലിന്റെ 20 വർഷത്തെ ആധിപത്യം അവസാനിപ്പിച്ച് റിലയൻസ് ജിയോ രാജ്യത്തെ ഏറ്റവും വലിയ ഫിക്സഡ് ലൈൻ ബ്രോഡ്‌ബാൻഡ് സേവന ദാതാവായി. രാജ്യത്തെ ഏറ്റവും വലിയ മൊബൈൽ ബ്രോഡ്‌ബാൻഡ് സേവന ദാതാക്കളും നിലവിൽ റിലയൻസ് ജിയോ ആണ്. രണ്ടര വർഷം കൊണ്ട് ബിഎസ്എൻഎല്ലിനെ പിന്തള്ളി മികച്ച ഫിക്സ്ഡ് ലൈൻ ബ്രോഡ്‌ബാൻഡ് ഓപ്പറേറ്ററായി മാറാൻ മുകേഷ് അംബാനിയുടെ നേതൃത്വത്തിലുള്ള ടെലികോം കമ്പനിക്ക് കഴിഞ്ഞു.
ജിയോയുടെ ഉപഭോക്താക്കളിൽ വർദ്ധന
ടെലികോം റെഗുലേറ്റർ ട്രായ് പുറത്തുവിട്ട പ്രതിമാസ ടെലികോം വരിക്കാരുടെ റിപ്പോർട്ട് അനുസരിച്ച്, ജിയോ ഇപ്പോൾ 4.34 ദശലക്ഷം ഉപഭോക്താക്കളുമായി ഫിക്സഡ് ലൈൻ ബ്രോഡ്‌ബാൻഡ് വിഭാഗത്തിൽ മുന്നിലാണ്. ബിഎസ്എൻഎല്ലിന്റെ ഉപഭോക്തൃ അടിത്തറ ഒക്ടോബറിലെ 4.72 ദശലക്ഷത്തിൽ നിന്ന് നവംബറിൽ 4.2 ദശലക്ഷമായി കുറഞ്ഞു. ഭാരതി എയർടെൽ ഫിക്സഡ് ലൈൻ ബ്രോഡ്‌ബാൻഡ് ഉപഭോക്തൃ അടിത്തറ നവംബറിൽ 4.08 ദശലക്ഷമാണ്. 2021 ഒക്ടോബറിൽ വരിക്കാരുടെ എണ്ണത്തിൽ റിലയൻസ് ജിയോ ഫൈബർ എയർടെലിനെ പിന്തള്ളി.
ഹാത്ത്‌വേ കേബിളിന്റെ ഭൂരിഭാഗം ഓഹരികളും ഏറ്റെടുത്തിരുന്നു
ഇന്ത്യയിലുടനീളമുള്ള 1,000-ലധികം നഗരങ്ങളിൽ എത്തിച്ചേരുകയെന്ന ലക്ഷ്യത്തോടെ ജിയോ 2019-ൽ ഫിക്സഡ് ബ്രോഡ്‌ബാൻഡ് സേവനങ്ങൾ ആരംഭിച്ചിരുന്നു. ജിയോയുടെ സർവീസ് പായ്ക്ക് ലാൻഡ്‌ലൈൻ ടെലിഫോൺ, മൾട്ടി-പാർട്ടി വീഡിയോ കോൺഫറൻസിങ്, ഹോം സെക്യൂരിറ്റി, സ്മാർട്ട് ഹോം സൊല്യൂഷൻസ്, ഗെയിമിംഗ്, ടിവി ചാനലുകൾ എന്നിവയടങ്ങുന്നതാണ്. ബ്രോഡ്‌ബാൻഡ് വ്യാപനം വേഗത്തിലാക്കാൻ റിലയൻസ് ജിയോ, ഡെൻ, ഹാത്ത്‌വേ കേബിളിന്റെ ഭൂരിഭാഗം ഓഹരികളും ഏറ്റെടുത്തിരുന്നു.
