കേരളത്തിൽ സംരംഭം നടത്തുന്നു എന്നുള്ളത് അഭിമാനം

കേരളത്തിൽ സംരംഭം നടത്തുന്നു എന്നുള്ളത് ഏറ്റവും അഭിമാനത്തോടെ പറയുന്ന തരത്തിലേക്ക് സംസ്ഥാനത്തെ സംരംഭക രം​ഗം വളർന്നെന്ന് ‍ധനമന്ത്രി കെ.എൻ. ബാല​ഗോപാൽ. ചാനൽ അയാം ഡോട്ട് കോം ഫൗണ്ടർ നിഷകൃഷ്ണനോട് സംസാരിക്കവേ, കേരളത്തിലെ സ്റ്റാർട്ടപ്പ് രം​ഗം ആ​ഗോള തലത്തിൽ തന്നെ ശ്രദ്ധിക്കപ്പെടുന്ന ഒന്നാണെന്നും ഐടി, നോളജ് ഇൻഡസ്ട്രി, അ​ഗ്രി ബെയ്സ്ഡ് വ്യവസായങ്ങൾ തുടങ്ങിയ രം​ഗങ്ങൾ അതിനെ മുന്നിൽ നിന്നു നയിക്കുന്നതായും അദ്ദേഹം പറഞ്ഞു.

കൂടുതൽ പേർ സംരംഭക രം​ഗത്തേക്ക് കടന്നുവന്നുകൊണ്ടിരിക്കുന്നു. സ്റ്റാർട്ടപ്പുകളിൽ നിന്നും കൂടുതൽ യൂനിക്കോണുകൾ വന്നുകൊണ്ടിരിക്കുന്നതും വളർച്ചയുടെ തെളിവാണ്. കേരളത്തിലെ എല്ലാ ടൂ ടയർ ന​ഗരങ്ങളിലും ​ഗ്രാമങ്ങളിലും 300-400 പേരെങ്കിലും ഉള്ള നിരവധി സ്ഥാപനങ്ങളുണ്ട്. ഇതും കേരളത്തെ സംബന്ധിച്ച് പ്രധാന മാറ്റമാണ്. ഇൻവെസ്റ്റ് കേരളയ്ക്ക് തീർച്ചയായും തുടർച്ചയുണ്ടാകും. അതിനായി ധാരാളം പ്രകിരയകളിലൂടെ കടന്നുപോകേണ്ടതുണ്ട്. നിക്ഷേപകർക്കുള്ള ആത്മവിശ്വാസം വർധിപ്പിക്കുന്ന പ്രവർത്തനങ്ങൾക്കും അവർക്കു വേണ്ട സൗകര്യങ്ങൾ ഒരുക്കുന്നതിലുമാണ് മുന്നോട്ടുള്ള യാത്രയിൽ ​ഗവൺമെന്റ് ഊന്നൽ നൽകുന്നതെന്നും മന്ത്രി പറഞ്ഞു.

^{Kerala’s startup sector is gaining global recognition, with IT, knowledge industries, and agri-based businesses leading the way, says Finance Minister K.N. Balagopal.}