പൂര്‍വേഷ്യന്‍ രാജ്യങ്ങളിലെ ടൂറിസം വിപണി പ്രയോജനപ്പെടുത്താന്‍ മലേഷ്യ എയര്‍ലൈന്‍സുമായി സഹകരിച്ച് കേരള ടൂറിസം വകുപ്പിന്റെ ഫാം ടൂര്‍ ആരംഭിച്ചു. ടൂറിസം വകുപ്പിന്റെ ലുക്ക് ഈസ്റ്റ്’ നയത്തിന്‍റെ ഭാഗമായി സംസ്ഥാന സര്‍ക്കാരും മലേഷ്യ എയര്‍ലൈന്‍സും തമ്മിലുള്ള പങ്കാളിത്തവും പ്രഖ്യാപിച്ചു. പൂർവേഷ്യൻ രാജ്യങ്ങളിൽ നിന്നും കേരളത്തിലെ വിനോദ സഞ്ചാര കേന്ദ്രങ്ങളിലേക്ക് സഞ്ചാരികളെ എത്തിക്കുകയും, കേരളത്തിന്റെ ടൂറിസം വിപണി സാദ്ധ്യതകൾ പരമാവധി വിനിയോഗിക്കുകയുമാണ് പങ്കാളിത്തത്തിന്റെ ലക്ഷ്യം.
പൂര്‍വേഷ്യന്‍ രാജ്യങ്ങളിലെ പുത്തന്‍ വിപണികള്‍ കണ്ടെത്തി കൂടുതല്‍ വിദേശ വിനോദസഞ്ചാരികളെ ആകര്‍ഷിക്കുന്നതിനായി മലേഷ്യ എയര്‍ലൈന്‍സുമായി സഹകരിച്ച് ടൂറിസം വകുപ്പ് നടപ്പാക്കുന്നതാണ് പുതിയ ലുക്ക് ഈസ്റ്റ് നയം.
കേരള ടൂറിസത്തിനും മലേഷ്യ എയര്‍ലൈന്‍സിനും ഗുണകരമാകുന്ന വിധത്തിലാണ് ‘ലുക്ക് ഈസ്റ്റ്’ നയം വിഭാവനം ചെയ്തിരിക്കുന്നത്. മലേഷ്യ, ഇന്തോനേഷ്യ, തായ് വാന്‍, സിംഗപ്പൂര്‍, തായ് ലന്‍ഡ്, ജപ്പാന്‍, വിയറ്റ്നാം, ഓസ്ട്രേലിയ, ന്യൂസിലന്‍ഡ്, ചൈ ന എന്നിവിടങ്ങളില്‍ നിന്നുള്ള വിനോദസഞ്ചാരികളുടെ എണ്ണം വര്‍ധിപ്പിക്കുന്നതിനുള്ള കേരള ടൂറിസത്തിന്‍റെ സുപ്രധാന ചുവടുവയ്പ്പാണിത്. എയര്‍ലൈനുകള്‍, ഹോസ്പിറ്റാലിറ്റി വ്യവസായ മേഖല, ടൂര്‍ ഓപ്പറേറ്റര്‍മാര്‍, സേവന ദാതാക്കള്‍ തുടങ്ങിയവര്‍ ഈ പങ്കാളിത്തത്തിന്റെ ഭാഗമാണ്. പൂര്‍വേഷ്യന്‍ രാജ്യങ്ങളില്‍ കേരള ടൂറിസത്തിന്‍റെ വൈവിധ്യങ്ങളെ തുറന്നു കാട്ടുന്നതില്‍ ‘ലുക്ക് ഈസ്റ്റ്’ കാമ്പയിന്‍ ഒരു സുപ്രധാന ചുവടുവയ്പ്പാണ്.
ഫാം ടൂറിന്റെ ഭാഗമായി മലേഷ്യ എയർലൈൻസ് വഴി
എട്ട് രാജ്യങ്ങളില്‍ നിന്നായി 75 ഓളം പ്രതിനിധികള്‍ അടങ്ങിയ ആദ്യ സംഘമാണ് കേരള സന്ദര്‍ശനത്തിനായി തിരുവനന്തപുരത്ത് എത്തിയത്. ഇതില്‍ 40 ഓളം ട്രാവല്‍ ഏജന്‍റുമാര്‍, 17 സോഷ്യല്‍ മീഡിയ ഇന്‍ഫ്ളുവെന്‍സേഴ്സ്, ടൂറിസം വ്യവസായ പങ്കാളികള്‍ എന്നിവര്‍ ഉള്‍പ്പെടും. അര്‍ത്ഥവത്തായ ഇടപെടലുകള്‍, വേഗത്തിലുള്ള വ്യവസായ ബന്ധങ്ങള്‍, ഒരു മുന്‍നിര യാത്രാ ലക്ഷ്യസ്ഥാനമെന്ന നിലയില്‍ തിരുവനന്തപുരത്തിന്‍റെ സ്ഥാനം കൂടുതല്‍ ശക്തിപ്പെടുത്തുക എന്നിവ ഈ സംരംഭം ലക്ഷ്യമിടുന്നു.
കേരള ടൂറിസത്തിന്‍റെ സാധ്യതകള്‍ അനുഭവവേദ്യമാക്കുന്നത് മുന്നില്‍ കണ്ട് കിഴക്കന്‍ രാജ്യങ്ങളിലെ എല്ലാ മികച്ച വ്യാപാര പങ്കാളികളെയും ഫാം ടൂറിന്റെ ഭാഗമായി ബി ടു ബി മീറ്റിലേക്ക് അടക്കം എത്തിച്ചിരുന്നു . കേരളത്തിലേക്കാണ് മലേഷ്യ എയര്‍ലൈന്‍സ് ആദ്യമായി ഫാം ടൂര്‍ സംഘടിപ്പിക്കുന്നത്.
‘ലുക്ക് ഈസ്റ്റ്’ നയത്തിന്‍റെ ഭാഗമായി സംസ്ഥാന സര്‍ക്കാരും മലേഷ്യ എയര്‍ലൈന്‍സും തമ്മിലുള്ള പങ്കാളിത്തവും തിരുവനന്തപുരത്തു നടന്ന ബി ടു ബി മീറ്റിൽ പ്രഖ്യാപിച്ചു . നിലവില്‍ മലേഷ്യ, ഇന്തോനേഷ്യ, തായ് വാന്‍, സിംഗപ്പൂര്‍, തായ് ലന്‍ഡ്, ജപ്പാന്‍, വിയറ്റ്നാം, ഓസ്ട്രേലിയ, ന്യൂസിലന്‍ഡ് തുടങ്ങിയ രാജ്യങ്ങളിലേക്കുള്ള കേരളത്തിന്റെ കണക്ടിവിറ്റി വര്‍ധിച്ചിട്ടുണ്ട്. ഈ സാഹചര്യം പ്രയോജനപ്പെടുത്തി പൂര്‍വേഷ്യന്‍ രാജ്യങ്ങളില്‍ നിന്നുള്ള കൂടുതല്‍ വിനോദസഞ്ചാരികളെ കേരളത്തിലേക്ക് ആകര്‍ഷിക്കുകയാണ് ലക്ഷ്യം.
കേരള ടൂറിസത്തെ ആഗോളതലത്തിലേക്ക് ഉയര്‍ത്തുക എന്ന സര്‍ക്കാര്‍ കാഴ്ചപ്പാട് സാക്ഷാത്കരിക്കാന്‍ മലേഷ്യ എയര്‍ലൈന്‍സുമായുള്ള സഹകരണത്തിലൂടെ സാധിക്കും. കേരള ടൂറിസത്തിന്‍റെ ആഗോള വ്യാപനത്തിലേക്കുള്ള വലിയ കുതിച്ചു ചാട്ടം ഇതിലൂടെ സാധ്യമാകും. കേരള ടൂറിസത്തിന്‍റെ സുപ്രധാന നാഴികക്കല്ലുകളിലൊന്നായ ‘ലുക്ക് ഈസ്റ്റ്’ നയം പുതിയ വിപണികള്‍ കണ്ടെത്തുന്നതിനുള്ള ദിശാ സൂചികയാണെന്നും
ടൂറിസം മന്ത്രി മുഹമ്മദ് റിയാസ് പറഞ്ഞു.
കേരളത്തിന്റെ വിനോദസഞ്ചാര മേഖലയില്‍ തിരുവനന്തപുരം കേന്ദ്രീകരിച്ച് മലേഷ്യ എയര്‍ലൈന്‍സ് വലിയ നിക്ഷേപം നടത്തുന്നുണ്ടെന്ന് മലേഷ്യ ഏവിയേഷന്‍ ഗ്രൂപ്പിലെ എയര്‍ലൈന്‍സ് ബിസിനസ് ചീഫ് കൊമേഴ്സ്യല്‍ ഓഫീസര്‍ (സിസിഒ) ദെര്‍സെനിഷ് അരസന്ദിരന്‍ പറഞ്ഞു. കേരളത്തിലേക്ക് നാലോ അഞ്ചോ വിമാന സര്‍വീസുകള്‍ നടത്താന്‍ സാധിക്കുന്നതിലേക്ക് വളരാനാണ് ശ്രമിക്കുന്നത്. തിരുവനന്തപുരം വിമാനത്താവളത്തില്‍ വൈഡ് ബോഡി എയര്‍ക്രാഫ്റ്റ് ഇറക്കുന്ന ആദ്യത്തെ പ്രീമിയം എയര്‍ലൈനായി മാറാന്‍ മലേഷ്യ എയര്‍ലൈന്‍സിന് കഴിഞ്ഞു.
തിരുവനന്തപുരത്തേക്ക് വിമാന സര്‍വീസ് നടത്തുന്ന ഒരേയൊരു പ്രീമിയം കാരിയര്‍ മലേഷ്യ എയര്‍ലൈന്‍സാണ്. ഒരു വര്‍ഷത്തിനുള്ളില്‍ സര്‍വീസുകളുടെ എണ്ണം ഇരട്ടിയാക്കാന്‍ ആഗ്രഹിക്കുന്നെന്നും അദ്ദേഹം കൂട്ടിച്ചേര്‍ത്തു.
കേരളത്തിലെ വ്യവസായ പങ്കാളികള്‍, പ്രാദേശിക സമൂഹത്തിന്‍റെ പ്രതിനിധികള്‍, സാംസ്കാരിക പ്രവര്‍ത്തകര്‍, കരകൗശല വിദഗ്ധര്‍ എന്നിവരുമായി ചൈന, ജപ്പാന്‍, മലേഷ്യ, ഓസ്ട്രേലിയ, ഇന്തോനേഷ്യ, ന്യൂസിലാന്‍ഡ്, വിയറ്റ്നാം, ലാവോസ് എന്നിവിടങ്ങളില്‍ നിന്നെത്തിയ പ്രതിനിധി സംഘം ആശയവിനിമയം നടത്തി
കേരള ടൂറിസം ഡയറക്ടര്‍ ശിഖ സുരേന്ദ്രന്‍ കേരള ടൂറിസത്തിന്‍റെ പ്രധാന ആകര്‍ഷണങ്ങളെയും സാധ്യതകളെയും സഞ്ചാരികള്‍ക്കും വിദേശ ടൂര്‍ ഓപ്പറേറ്റര്‍മാര്‍ക്കും മുന്നില്‍ പരിചയപ്പെടുത്തുന്ന അവതരണം നടത്തി
