ജോലിയിൽ നിന്ന് ജീവനക്കാരെ പിരിച്ചുവിടാൻ കമ്പനികൾ വീഡിയോ കോൾ മുതൽ പലവിധ തന്ത്രങ്ങളാണ് ഇന്നത്തെ കാലത്ത് നടപ്പാക്കുന്നത്. ഫ്രാൻസിൽ ജോലി വെട്ടിക്കുറയ്ക്കൽ എളുപ്പത്തിൽ സാധ്യമാകുന്ന ഒന്നല്ല. ഇതറിയാവുന്ന വാഹന നിർമാണ കമ്പനിയായ സ്റ്റെല്ലാന്റിസ് ജീവനക്കാരെ വെട്ടിക്കുറയ്ക്കാനുള്ള പുതിയ മാർഗം കണ്ടെത്തി. അമേരിക്കൻ കമ്പനിയായ ഫിയറ്റ് ക്രിസ്‌ലർ ഓട്ടോമൊബൈൽസും ഫ്രഞ്ച് പിഎസ്‌എ ഗ്രൂപ്പും 2021-ൽ രൂപീകരിച്ച മൾട്ടിനാഷണൽ ഓട്ടോമോട്ടീവ് മാനുഫാക്ചറിംഗ് കോർപ്പറേഷനാണ് സ്റ്റെല്ലാന്റിസ്. പുതിയ കരിയറുകളെ കുറിച്ച് ജീവനക്കാരെ അറിയിക്കുക എന്നതാണ് കമ്പനിയുടെ പുത്തൻ തന്ത്രം. 14 കാർ ബ്രാൻഡുകളും ആഗോളതലത്തിൽ ഏകദേശം 3,00,000 ജീവനക്കാരുമുള്ള കമ്പനി പ്യൂഷോ കാറുകളുടെയും ജീപ്പ് എസ്‌യുവികളുടെയും നിർമ്മാതാക്കളാണ്. തൊഴിലാളികൾക്ക് ആകർഷകമായ പുതിയ ജോലികൾ എങ്ങനെ നേടാം എന്നതിനെക്കുറിച്ചുള്ള ടിപ്പ്സുമായി ഇമെയിലുകൾ സ്റ്റെല്ലാന്റിസ്,അയക്കുന്നുണ്ട്. വിജയകരമായി ഒരു സിവി എങ്ങനെ എഴുതാമെന്നും സഹായകമാകുന്ന കരിയർ ഫെയറുകളെക്കുറിച്ചും സേവനങ്ങളെക്കുറിച്ചും ജീവനക്കാർക്ക് പതിവായി അലേർട്ടുകളും അയയ്‌ക്കുന്നുണ്ട്. EV-കൾ നിർമ്മിക്കാൻ പരമ്പരാഗത വാഹനങ്ങളേക്കാൾ കുറച്ച് തൊഴിലാളികളെ മാത്രമാണ് ആവശ്യമുള്ളത്. അതാണ് വാഹനനിർമാണ കമ്പനിയെ ഈ നീക്കത്തിന് പ്രേരിപ്പിക്കുന്നത്. പുതിയ കരിയർ കണ്ടെത്താൻ ജീവനക്കാരെ പ്രോത്സാഹിപ്പിക്കുന്ന ഇമെയിലുകൾ, വിആർഎസ് എടുക്കാൻ താൽപ്പര്യമുള്ളവരെ സഹായിക്കാനാണെന്ന് കമ്പനി വക്താവ് പറഞ്ഞു.