സ്വകാര്യ കമ്പനികൾ വാഗ്ദാനം ചെയ്യുന്ന മൊബൈൽ വാലറ്റിന്റെ നിലവിലെ സംവിധാനത്തിൽ നിന്ന് വ്യത്യസ്തമായി, റിസർവ് ബാങ്ക് വികസിപ്പിച്ചുകൊണ്ടിരിക്കുന്ന ഡിജിറ്റൽ രൂപ ബ്ലോക്ക്ചെയിനിന് എല്ലാ ഇടപാടുകളും ട്രാക്ക് ചെയ്യാൻ കഴിയും. എല്ലാ ഫിയറ്റ് കറൻസികൾക്കും ഒരു യുണിക് നമ്പർ ഉള്ളതുപോലെ ആർബിഐ നൽകുന്ന ഡിജിറ്റൽ കറൻസിയും യൂണിറ്റുകളായി അക്കമിട്ടിരിക്കുമെന്ന് വാർത്താ ഏജൻസിയായ പിടിഐ നേരത്തെ റിപ്പോർട്ട് ചെയ്തിരുന്നു. നേരത്തെ, ധനമന്ത്രി നിർമ്മല സീതാരാമന്റെ ബജറ്റ് പ്രസംഗത്തിൽ സെൻട്രൽ ബാങ്ക് സ്വന്തം ഡിജിറ്റൽ കറൻസി പുറത്തിറക്കുമെന്ന് പ്രഖ്യാപിച്ചിരുന്നു. ഡിജിറ്റൽ കറൻസി കൂടുതൽ കാര്യക്ഷമവും ലളിതവുമായ കറൻസി മാനേജ്മെന്റ് സംവിധാനത്തിലേക്ക് നയിക്കും. അതിനാൽ, 2022-23 മുതൽ റിസർവ് ബാങ്ക് ഓഫ് ഇന്ത്യ ബ്ലോക്ക്ചെയിനും മറ്റ് സാങ്കേതിക വിദ്യകളും ഉപയോഗിച്ച് ഡിജിറ്റൽ റുപ്പീ പുറത്തിറക്കുമെന്ന് മന്ത്രി പറഞ്ഞിരുന്നു.