ലൈഫ് ഇൻഷുറൻസ് കോർപറേഷന്റെ ഇനിഷ്യൽ പബ്ലിക് ഓഫറിംഗ് വൈകിയേക്കാമെന്ന് റിപ്പോർട്ട്. റഷ്യയുടെ ഉക്രെയ്നിലെ അധിനിവേശത്തെത്തുടർന്ന് സർക്കാർ ഉടമസ്ഥതയിലുള്ള ഇൻഷുററായ എൽഐസിയുടെ പ്രാരംഭ ഓഹരി വിൽപ്പനയുടെ തീയതി പുനപരിശോധിക്കുമെന്ന് ധനമന്ത്രി നിർമ്മല സീതാരാമൻ പറഞ്ഞു. എൽഐസി ഐപിഒയ്ക്ക് നിലവിലെ ആഗോള സാഹചര്യങ്ങൾ കൂടി പരിഗണിക്കേണ്ടി വരുമെന്ന് ധനമന്ത്രി സൂചിപ്പിച്ചു. വഷളായിക്കൊണ്ടിരിക്കുന്ന ജിയോപൊളിറ്റിക്കൽ സാഹചര്യവും വിപണികളുടെ തകർച്ചയും ലൈഫ് ഇൻഷുറൻസ് കോർപ്പറേഷന്റെ മെഗാ ഇനീഷ്യൽ പബ്ലിക് ഓഫറിംഗ് മാറ്റിവയ്ക്കാനുളള സാധ്യത വർദ്ധിപ്പിക്കുന്നു. ബജറ്റ് കമ്മി നികത്താൻ ലക്ഷ്യമിട്ടുള്ള 10.4 ബില്യൺ ഡോളറിന്റെ ആസ്തി-വിൽപനയെ റഷ്യ-ഉക്രൈൻ സംഘർഷം ബാധിച്ചേക്കാം. ഇന്ത്യയിലെ ഏറ്റവും വലിയ മെഗാ പബ്ലിക് ഓഫറിന്റെ തീയതി മാർച്ച് 31 ന് മുൻപ് എന്നാണ് നേരത്തെ സമയപരിധി നിശ്ചയിച്ചിരുന്നത്. മാർച്ച് അവസാനത്തോടെ പ്രക്രിയ പൂർത്തിയാക്കാൻ ആഗ്രഹിക്കുന്നു, എന്നാൽ വിപണി സാഹചര്യങ്ങൾ കണക്കിലെടുത്ത് പുതിയ തീയതി പരിഗണിക്കാമെന്ന് സർക്കാർ വൃത്തങ്ങൾ സൂചന നൽകി. എൽഐസി IPO ഡ്രാഫ്റ്റ് ഫെബ്രുവരി 13-ന് സമർപ്പിച്ചിരുന്നു. ഇൻഷുറൻസ് വമ്പന്റെ എംബഡഡ് വാല്യു 5.4 ട്രില്യൺ രൂപയാണ്.