ഇന്ത്യയിൽ സെമികണ്ടക്ടർ പ്ലാന്റിനായി നിരവധി ചിപ്പ് നിർമ്മാതാക്കൾ താൽപ്പര്യം പ്രകടിപ്പിച്ച് ചർച്ച നടത്തി വരുന്നതായി കേന്ദ്രസഹമന്ത്രി രാജീവ് ചന്ദ്രശേഖർ. വ്യവസായ പങ്കാളികളിൽ നിന്നുള്ള നിർദ്ദേശങ്ങളുടെ അടിസ്ഥാനത്തിൽ ഡിസൈൻ-ലിങ്ക്ഡ് ഇൻസെന്റീവ് സ്കീമിൽ വിദേശത്തും ഇന്ത്യയിലുമായുമുളള വലിയ സ്ഥാപനങ്ങളെ ഉൾപ്പെടുത്താൻ സർക്കാർ, ഈ സ്കീം വിപുലീകരിക്കുമെന്നും രാജീവ് ചന്ദ്രശേഖർ പറഞ്ഞു.
നിലവിലെ സ്കീം മാർഗ്ഗനിർദ്ദേശങ്ങൾ അനുസരിച്ച്, ഡിപിഐഐടി നിർവചിച്ചിരിക്കുന്ന സ്റ്റാർട്ടപ്പുകളും എംഎസ്എംഇകളും ഇൻസെന്റീവിന് അപേക്ഷിക്കാൻ അർഹരാണ്.
ഗുജറാത്തിൽ ഒരു അർദ്ധചാലക ATMP പ്ലാന്റ് (assembly, testing, marking, packaging and manufacturing ) നിർമ്മിക്കാനുള്ള പദ്ധതി യുഎസ് ആസ്ഥാനമായുള്ള മൈക്രോൺ ടെക്നോളജി കഴിഞ്ഞ മാസം പ്രഖ്യാപിച്ചിരുന്നു. സർക്കാരിന്റെ 10 ബില്യൺ ഡോളർ പ്രൊഡക്ഷൻ-ലിങ്ക്ഡ് ഇൻസെന്റീവ് പദ്ധതിക്ക് കീഴിലാണ് പ്ലാന്റ് വരുന്നത്. 2024 അവസാനത്തോടെ 2.75 ബില്യൺ ഡോളറിന്റെ ഫാക്ടറി പ്രവർത്തനക്ഷമമാക്കാനാണ് കമ്പനി പദ്ധതിയിടുന്നത്. ചിപ്പ് നിർമ്മാണത്തിനായി പ്രിന്റഡ് സർക്യൂട്ട് ബോർഡുകളും ഉയർന്ന ശുദ്ധിയുള്ള വ്യാവസായിക വാതകങ്ങളും നൽകുന്ന സിംടെക്, എയർ ലിക്വിഡ് എന്നിവ ഇന്ത്യയിൽ പ്രവർത്തനം ആരംഭിക്കുന്നതിന് സർക്കാരുമായി ചർച്ച നടത്തിവരികയാണ്. മൈക്രോണിനൊപ്പം വ്യവസായ നഗരമായ സാനന്ദിൽ ഒരു യൂണിറ്റ് സ്ഥാപിക്കാൻ സിംടെക് പദ്ധതിയിടുന്നു. ഇലക്ട്രോണിക്സ് വ്യവസായം, പ്രത്യേകിച്ച് ലാപ്ടോപ്പുകൾക്കും മൊബൈൽ ഫോണുകൾക്കുമായി, പ്രിന്റഡ് സർക്യൂട്ട് ബോർഡുകളുടെ നിർമാണത്തിന്റെ പ്രാദേശികവൽക്കരണത്തിൽ നിന്ന് പ്രയോജനം ലഭിക്കുമെന്ന് പ്രതീക്ഷിക്കുന്നു.
വേദാന്ത-ഫോക്‌സ്‌കോൺ സംയുക്ത സംരംഭം വേർപിരിയാൻ തീരുമാനിച്ചതിനാൽ ഒരു തിരിച്ചടി നേരിട്ടു. എന്നാൽ അതിന്റെ അനന്തരഫലങ്ങൾ ദീർഘകാലത്തേക്ക് ഉണ്ടാകില്ല. കാരണം ഇരുവരും 40 നാനോമീറ്റർ പ്ലാന്റിനായി ഇപ്പോൾ സ്വതന്ത്രമായി അപേക്ഷിക്കാൻ പോകുന്നു, കേന്ദ്രമന്ത്രി പറഞ്ഞു. അർദ്ധചാലക രൂപകല്പന കമ്പനികളെ നവീകരണത്തിൽ സഹായിക്കാൻ 200 മില്യൺ ഡോളർ സർക്കാർ നീക്കിവച്ചിട്ടുണ്ട്. ഇതുവരെ, AI മുതൽ വെക്റ്റർ പ്രോസസ്സുകളും ഇമേജ് സെൻസറുകളും വരെയുള്ള ഉൽപ്പന്ന ആപ്ലിക്കേഷനുകളുള്ള ഏഴ് സ്റ്റാർട്ടപ്പുകൾക്ക് ഫണ്ടിംഗിനായി അംഗീകാരം ലഭിച്ചിട്ടുണ്ട്. 2021-ൽ സർക്കാർ പ്രഖ്യാപിച്ച 10 ബില്യൺ ഡോളറിന്റെ ഇന്ത്യ അർദ്ധചാലക ദൗത്യത്തിന്റെ ഭാഗമാണ് ഈ പദ്ധതി. ആർട്ടിഫിഷ്യൽ ഇന്റലിജൻസിനായുള്ള അർദ്ധചാലകങ്ങൾ സർക്കാരിന്റെ മുന്നേറ്റത്തിന്റെ ഒരു പ്രധാന ഭാഗമാണെന്നും ഈ വർഷം സെപ്റ്റംബറിൽ ആഗോള എഐ കോൺഫറൻസ് വിളിക്കുമെന്നും രാജീവ് ചന്ദ്രശേഖർ പറഞ്ഞു.
