ഇ-വാഹനങ്ങളുമായി വാർഡ് വിസാർഡ്

1.3 ലക്ഷം രൂപ മുതൽ വില വരുന്ന പാസഞ്ചർ, കാർഗോ ഇലക്ട്രിക് വാഹനങ്ങളുമായി വാർഡ് വിസാർഡ്. പോർട്ട്‌ഫോളിയോ വിപുലീകരിച്ച് കൂടുതൽ വിൽപന ലക്ഷ്യംവെച്ചാണ് ഗുജറാത്ത് ആസ്ഥാനമായുള്ള ഇലക്ട്രിക് വാഹന നിർമാതാക്കളായ വാർഡ് വിസാർഡ് ഇന്നൊവേഷൻസ് ആൻഡ് മൊബിലിറ്റി ലിമിറ്റഡിന്റെ പ്രവർത്തനം.

വാർഡ്‌വിസാർഡ് ജോയ്-ഇ-റിക്ക്, ജോയ്-ഇ-ബൈക്ക് ബ്രാൻഡുകൾക്ക് കീഴിൽ നാല് പുതിയ മോഡലുകൾ പുറത്തിറക്കി. രണ്ട് പാസഞ്ചർ ഇലക്ട്രിക് ത്രീ-വീലറുകൾ, രണ്ട് കാർഗോ ഇ-ത്രീ-വീലറുകൾ, നെമോ എന്ന ഹൈസ്പീഡ് ഇലക്ട്രിക് ഇരുചക്രവാഹനം എന്നിവ ഉൾപ്പെടുന്നതാണ് പുതിയ ലോഞ്ച്. 3.85 ലക്ഷം രൂപയാണ് ജോയ്-ഇ-റിക്ക് പാസഞ്ചർ ഇ-ത്രീവീലറിന്റെ എക്സ് ഷോറൂം വില. ഇത് കൂടാതെ 1.34 ലക്ഷം രൂപ എക്സ് ഷോറൂം വില വരുന്ന ഒരു ഇ-പാസഞ്ചർ ത്രീവീലറും കമ്പനി ഇറക്കുന്നുണ്ട്. കാർഗോ വിഭാഗത്തിലും 1.30 ലക്ഷം മുതൽ 4. 24 ലക്ഷം രൂപ വരെ വിലയുള്ള വാഹനങ്ങളാണ് കമ്പനി വിപണിയിലെത്തിച്ചിരിക്കുന്നത്. 99000 രൂപയാണ് വാർഡ്‌വിസാർഡ് നെമോ ഹൈസ്പീഡ് ഇ-സ്കൂട്ടറിന്റെ വില.

ഇലക്ട്രിക് ഇരുചക്ര വാഹന വിപണിയിലെ ശക്തമായ സാന്നിധ്യമാകുന്നതിനൊപ്പം ഇലക്ട്രിക് ത്രീ-വീലറുകളും ശക്തമാക്കാൻ ഒരുങ്ങുകയാണ് കമ്പനി. ഭാവിയിലെ വിൽപനയുടെ 30-35% ഇലക്ട്രിക് ത്രീ-വീലറുകറായിരിക്കുമെന്ന് കമ്പനി അറിയിച്ചു. ഈ സാമ്പത്തിക വർഷത്തിൽ 35,000-40,000 ഇരുചക്ര വാഹനങ്ങളും 2,000 മുച്ചക്ര വാഹനങ്ങളും ഉൾപ്പെടെ 42,000 യൂണിറ്റ് വരെ വിൽപനയാണ് വാർഡ് വിസാർഡ് ലക്ഷ്യമിടുന്നത്. അടുത്ത സാമ്പത്തിക വർഷത്തിൽ ഇരുചക്ര വാഹനങ്ങളുടെ എണ്ണം 50000മായും മുച്ചക്ര വാഹനങ്ങളുടേത് 10000മായും ഉയർത്തും. 

^{Wardwizard Innovations & Mobility is set to revolutionize India’s EV market with ambitious sales targets, innovative models, and expanded production capacity in electric two-wheelers and three-wheelers.}