ആഗോള വ്യാപാരത്തെ വ്യാപാരയുദ്ധങ്ങളും താരിഫ് തടസ്സങ്ങളും മുടക്കുന്ന സാഹചര്യത്തിൽ, ഇന്ത്യയ്ക്ക് ഏറ്റവും പ്രധാനപ്പെട്ട തന്ത്രപ്രധാന വിപണിയായി ഗൾഫ് രാജ്യങ്ങൾ മാറുകയാണ്. നിലവിൽ ആറ് പശ്ചിമേഷ്യൻ രാജ്യങ്ങളുടെ കൂട്ടായ്മയായ ഗൾഫ് കോ-ഓപ്പറേഷൻ കൗൺസിൽ (GCC) ഇന്ത്യയുടെ ഏറ്റവും വലിയ വ്യാപാര ബ്ലോക്കാണ്. യൂറോപ്യൻ യൂണിയൻ, ആസിയാൻ രാജ്യങ്ങൾ, അമേരിക്കയും ചൈനയും പോലുള്ള പ്രധാന ഇരുരാഷ്ട്ര വ്യാപാര പങ്കാളികളെയും മറികടന്നാണ് GCC ഇന്ത്യൻ വ്യാപാരത്തിൽ മുൻനിരയിലെത്തിയിരിക്കുന്നത്. നിലവിൽ സൗദി അറേബ്യ, യുഎഇ, ഖത്തർ, കുവൈത്ത്, ഒമാൻ, ബഹ്റൈൻ എന്നിവ ഉൾപ്പെടുന്ന ആറു രാജ്യങ്ങളുമായുള്ള സ്വതന്ത്ര വ്യാപാര കരാർ (FTA) ഒപ്പിടാനുള്ള നടപടികളിലാണ് ഇന്ത്യ.
2024–25 സാമ്പത്തിക വർഷത്തിൽ ഇന്ത്യയും GCC രാജ്യങ്ങളും തമ്മിലുള്ള വ്യാപാരം ഏകദേശം 179 ബില്യൺ ഡോളറായി ഉയർന്നു. യുഎഇ, ഒമാൻ എന്നിവയുമായുള്ള സമഗ്ര സാമ്പത്തിക പങ്കാളിത്ത കരാറുകൾ (CEPA) ഈ വളർച്ചയ്ക്ക് നിർണായകമായി. രത്നങ്ങൾ, ലോഹങ്ങൾ, ഇലക്ട്രോണിക് ഉപകരണങ്ങൾ, രാസവസ്തുക്കൾ എന്നിവയാണ് ഇന്ത്യയുടെ പ്രധാന കയറ്റുമതി ഉത്പന്നങ്ങൾ.
പുതിയ FTA നിലവിൽ വന്നാൽ ആറ് ഗൾഫ് രാജ്യങ്ങളിലേക്കുമുള്ള ഇന്ത്യൻ കയറ്റുമതിക്ക് താരിഫുകളും മറ്റ് തടസ്സങ്ങളും ഒഴിവാക്കി വലിയ ഉണർവുണ്ടാകുമെന്നാണ് പ്രതീക്ഷ. കഴിഞ്ഞ ദിവസം ഇന്ത്യയും GCCയും FTA ചർച്ചകൾ ഔപചാരികമായി ആരംഭിക്കുന്നതിനുള്ള ടേംസ് ഓഫ് റഫറൻസ് (ToR) ഒപ്പുവെച്ചു. വാണിജ്യ-വ്യവസായ മന്ത്രി പിയൂഷ് ഗോയൽ അധ്യക്ഷത വഹിച്ച ചടങ്ങിലാണ് ഇത് നടന്നത്. കരാർ വ്യാപാരവും നിക്ഷേപവും ശക്തിപ്പെടുത്തുമെന്ന് ഗോയൽ വ്യക്തമാക്കി. അതേസമയം, ഇന്ത്യയ്ക്ക് നിർണായകമായ ഊർജസുരക്ഷ നൽകുന്നതിലും ഏകദേശം ഒരു കോടി ഇന്ത്യൻ പ്രവാസികൾക്കും ഗൾഫ് മേഖല വലിയ പങ്ക് വഹിക്കുന്നതായും അദ്ദേഹം ചൂണ്ടിക്കാട്ടി.
India enters formal talks for a Free Trade Agreement (FTA) with the GCC (Saudi Arabia, UAE, Qatar, Kuwait, Oman, Bahrain). Discover how this mega deal aims to boost India’s $179 billion trade and secure long-term energy ties.
