കണ്ടക്ടർമാരുണ്ടാകില്ല. പകരം പരിശീലനം സിദ്ധിച്ച ബസ് ഹോസ്റ്റസ്സ്മാർ. യാത്രക്കാർക്കായി ഒരുങ്ങുന്നതു പാൻട്രിയും ടോയ്ലെറ്റും അടക്കം ആധുനിക സൗകര്യങ്ങളുള്ള ബിസിനസ് ക്ലാസ്സ് വോൾവോ ലക്ഷ്വറി ബസുകൾ . കേരളത്തിൽ ഇത്തരം ആഡംബര ബസുകൾ ദീർഘദൂരയാത്രകൾക്കായി ഉടൻ നിരത്തിലിറക്കുമെന്ന് കെ എസ് ആർ ടി സി അറിയിച്ചു.
ബസിൽ കണ്ടക്ടർക്ക് പകരം പരിശീലനം സിദ്ധിച്ച ബസ് ഹോസ്റ്റസുമാരായിരിക്കും. രാജ്യത്ത് ഇറങ്ങുന്നതിൽ വച്ച് ഏറ്റവും സൗകര്യം കൂടിയ വോൾവോ ബസുകളായിരിക്കും ഇതിനായി ഉപയോഗിക്കുക. ബസ്സുകൾ വാങ്ങിയ ശേഷം അതിന്റെ രൂപം മാറ്റിയാകും ആഡംബര സർവീസുകളാക്കുക. സ്വകാര്യ ബസ് ഓപ്പറേറ്റർമാരുടെ ആഡംബര യാത്രാ മേഖലയിലെ കുത്തക അവസാനിപ്പിക്കുന്നതിനൊപ്പം കുറഞ്ഞ ടിക്കറ്റ് നിരക്കിൽ ദീർഘ ദൂര യാത്ര ഉറപ്പാക്കുകയാണ് ലക്ഷ്യം.
നിലവിൽ കെ എസ് ആർ ടി സി ലാഭകരമായി മാറുകയാണെന്ന് ഗതാഗത മന്ത്രി മന്ത്രി ബി ഗണേഷ് കുമാർ വ്യക്തമാക്കി. ഇതിനൊപ്പം യാത്രക്കാർക്ക് കൂടുതൽ സുഖകരമായ യാത്രാ സൗകര്യം ഉറപ്പു വരുത്തുകയാണ് ലക്ഷ്യം.
വിപണിയിൽ ലഭിക്കുന്നതിനേക്കാൾ കുറഞ്ഞ നിരക്കിൽ കെഎസ്ആർടിസി യാത്രക്കാർക്ക് കുടിവെള്ളം ലഭ്യമാക്കുമെന്നും വിപണനം ചെയ്യുന്ന കണ്ടക്ടർമാർക്കും ഡ്രൈവർമാർക്കും ഇതിന്റെ ആനുകൂല്യം നൽകുമെന്നും ഗതാഗത മന്ത്രിമന്ത്രി ബി ഗണേഷ് കുമാർ വ്യക്തമാക്കി.
കെഎസ്ആർടിസി നെടുമങ്ങാട് യൂണിറ്റിലെ ഡ്രൈവിംഗ് സ്കൂൾ, നവീകരിച്ച ഡിപ്പോ യാർഡ്, പ്രവേശന കവാടത്തിൻ്റെയും, നെടുമങ്ങാട് – പറശ്ശിനിക്കടവ്, നെടുമങ്ങാട് – മാനന്തവാടി എന്നീ ബസ് സർവീസുകളുടെയും ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.
കെഎസ്ആർടിസി ഡ്രൈവിംഗ് സ്കൂളുകളിൽ ഹെവി മോട്ടോർ വാഹന പരിശീലനത്തിനും ലൈറ്റ് മോട്ടോർ വാഹന പരിശീലനത്തിനും 9000 രൂപയും, ഇരു ചക്ര വാഹന പരിശീലനത്തിന് 3500 രൂപയും, ഇരു ചക്ര വാഹനത്തിന്റെയും ലൈറ്റ് മോട്ടോർ വാഹനത്തിന്റെയും ഒന്നിച്ചുള്ള പരിശീലനത്തിന് 11000 രൂപയുമാണ് ഫീസ്.
എസ് സി/എസ് ടി വിഭാഗകാർക്കും ട്രാൻസ്ജെൻഡർ വിഭാഗത്തിനും 20% ഫീസിളവും കെ.എസ്.ആർ.റ്റി.സി ജീവനക്കാർക്ക് അഞ്ച് ശതമാനവും ഫീസിളവ് അനുവദിച്ചിട്ടുണ്ട്. ഒരു ബാച്ചിൽ 16 പേർക്കാണ് പ്രവേശനം നൽകുന്നത്. ഒരു മാസത്തെ പാഠ്യപരിശീലന പരിപാടിയിൽ 28 ദിവസം ഡ്രൈവിംഗ് പരിശീലനവും രണ്ട് ദിവസം തിയറി ക്ലാസുകളുമാണ് സജ്ജീകരിക്കുന്നത്.
KSRTC is set to disrupt the luxury travel market with premium Volvo buses featuring onboard toilets, pantries, and trained bus hostesses instead of conductors. Transport Minister K.B. Ganesh Kumar announces affordable long-distance luxury travel for Kerala.
