ആറുവരിപ്പാത അവസാനഘട്ടത്തിലേക്ക്

കേരളത്തിൽ ദേശീയപാത അതോറിറ്റി ഓഫ് ഇന്ത്യയുടെ (NHAI) മേൽനോട്ടത്തിൽ നടപ്പാക്കുന്ന ദേശീയപാത 66 (NH-66) നിർമാണം അന്തിമഘട്ടത്തിലേക്ക് കടക്കുകയാണെന്ന് പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസ് അറിയിച്ചു. 492.64 കിലോമീറ്റർ ദൈർഘ്യത്തിലുള്ള പാത ഇതുവരെ ആറുവരിയാക്കി വികസിപ്പിച്ച് ഗതാഗതത്തിന് തുറന്നുകഴിഞ്ഞതായും മന്ത്രി പറഞ്ഞു. നിർമാണത്തിനിടെ ചില സ്ഥലങ്ങളിൽ അടുത്തിടെ തകരാറുകൾ ശ്രദ്ധയിൽപ്പെട്ടതായും, ഇതിനെത്തുടർന്ന് ദേശീയപാതയുടെ ഗുണനിലവാരവും സുരക്ഷയും ഉറപ്പാക്കി സമയബന്ധിതമായി പ്രവൃത്തികൾ പൂർത്തിയാക്കണമെന്ന് ആവശ്യപ്പെട്ട് മുഖ്യമന്ത്രി നേരിട്ട് കേന്ദ്ര റോഡ് ഗതാഗത-ഹൈവേസ് മന്ത്രിയെ സമീപിച്ചതായും മന്ത്രി നിയസഭയിൽ വ്യക്തമാക്കി.

ഇതിന്റെ അടിസ്ഥാനത്തിൽ രൂപീകരിച്ച വിദഗ്ധ സമിതി വിവിധ ഭാഗങ്ങൾ പരിശോധിക്കുകയും ചില മേഖലകളിൽ രൂപകൽപനയിൽ മാറ്റങ്ങൾ നിർദേശിക്കുകയും ചെയ്തു. 2025 ഡിസംബർ 5ന് കൊല്ലം–കടമ്പാട്ടുകോണം എൻഎച്ച്-66 വിഭാഗത്തിലെ മൈലക്കാട് (കൊട്ടിയം) പ്രദേശത്ത് നിർമാണപ്പിഴവ് കണ്ടെത്തിയതിനെ തുടർന്ന്, ഗുണനിലവാരത്തിലും സുരക്ഷയിലും യാതൊരു ഇളവും അനുവദിക്കരുതെന്ന് ആവശ്യപ്പെട്ട് സംസ്ഥാന സർക്കാർ വിഷയം കേന്ദ്ര സർക്കാരിന്റെ ശ്രദ്ധയിൽപ്പെടുത്തിയിരുന്നു.

തുടർന്ന്, കേരളത്തിൽ വികസിപ്പിച്ചുവരുന്നതും പൂർത്തിയായതുമായ എൻഎച്ച്-66ന്റെ 17 ഭാഗങ്ങളിൽ വിദഗ്ധ പരിശോധന നടത്തുന്നതിനായി 10 ഏജൻസികളെ നിയമിച്ചതായി എൻഎച്ച്‌എഐ അറിയിച്ചതായി മന്ത്രി പറഞ്ഞു. റീഇൻഫോഴ്സ്ഡ് സോയിൽ (RS) വാൾ ഉപയോഗിച്ച് നിർമിച്ച എല്ലാ ഘടനകളിലും മണ്ണ് പരിശോധന ഉൾപ്പെടെയുള്ള ലാബ് പരിശോധനകൾ നടത്തുന്നതിനായി സമഗ്ര ജിയോ-ടെക്‌നിക്കൽ പഠന പദ്ധതിയും ആരംഭിച്ചിട്ടുണ്ട്.

വിദഗ്ധ സമിതി റിപ്പോർട്ടുകൾ, ജിയോ-ടെക്‌നിക്കൽ പഠന ഫലങ്ങൾ, സാമൂഹിക പരിഗണനകൾ എന്നിവ സംയുക്തമായി വിലയിരുത്തിയ ശേഷം, ഓരോ ആർഎസ് വാളിന്റെയും രൂപകൽപനയും നിർമാണവും പുനഃപരിശോധിക്കുമെന്ന് എൻഎച്ച്‌എഐ അറിയിച്ചിട്ടുണ്ട്. ആവശ്യമായിടങ്ങളിൽ ബലപ്പെടുത്തൽ, പുനർരൂപകൽപന, ഡിമോളിഷിംഗ്, വയഡക്ട് നിർമാണം എന്നിവ പരിഗണിക്കുമെന്നും മന്ത്രി പറഞ്ഞു. ദേശീയപാതയുടെ ഗുണനിലവാരവും യാത്രക്കാരുടെ സുരക്ഷയും ഉറപ്പാക്കുന്നതിനായി സംസ്ഥാന സർക്കാർ ആവശ്യമായ എല്ലാ ഇടപെടലുകളും നടത്തുമെന്നും മന്ത്രി പി.എ. മുഹമ്മദ് റിയാസ് നിയമസഭയെ അറിയിച്ചു.

Minister PA Mohammed Riyas confirms NH 66 six-laning in Kerala is in its final stages. 10 agencies have been appointed to inspect quality and safety across 17 stretches.