ഇന്ത്യ എഐ ഇംപാക്ട് സമ്മിറ്റിൽ ശ്രദ്ധ നേടി 8 വയസ്സുകാരൻ. ഡൽഹി ഭാരത് മണ്ഡപത്തിൽ നടക്കുന്ന സമ്മിറ്റിൽ ആഗോള ടെക് നേതാക്കൾക്കും നയരൂപീകരണ വിദഗ്ധർക്കും മുന്നിൽ പ്രഭാഷണം നടത്തിയ രൺവീർ സച്ച്ദേവയാണ് ശ്രദ്ധാകേന്ദ്രമാകുന്നത്. സമ്മിറ്റിലെ ഏറ്റവും പ്രായം കുറഞ്ഞ മുഖ്യ പ്രഭാഷകനെന്ന റെക്കോർഡാണ് രൺവീർ കുറിച്ചത്. സാങ്കേതിക വിദഗ്ധനും, മുഖ്യപ്രഭാഷകനും എന്നതിനു പുറമേ ‘ആർ യു ബോൺ വിത്ത് എഐ?’ എന്ന പുസ്തകത്തിന്റെ രചയിതാവ് കൂടിയാണ് രൺവീർ. പുരാതന ഇന്ത്യൻ തത്ത്വചിന്തകളെ ആധുനിക എഐ സാങ്കേതികവിദ്യയുമായി എങ്ങനെ ബന്ധിപ്പിക്കാം എന്നതിനെ കുറിച്ചാണ് രൺവീർ സച്ച്ദേവ പ്രഭാഷണം നടത്തിയത്.
ലോകത്തെ ഓരോ രാജ്യങ്ങളും വ്യത്യസ്തമായ രീതികളിലാണ് എഐ വികസിപ്പിക്കുന്നത്, ഇതിൽ തന്നെ ഇന്ത്യയുടെ രീതി ഏറെ വ്യത്യസ്തവും സവിശേഷവുമാണെന്ന് രൺവീർ വിശദമാക്കി. എഐ സാക്ഷരത പ്രോത്സാഹിപ്പിക്കുന്നതിനും ഇന്ത്യയുടെ സാമ്പത്തിക വളർച്ചയ്ക്ക് സംഭാവന നൽകുന്നതിനുമായി പുതുതായി ആരംഭിച്ച ഇന്ത്യൻ എഐ മോഡലുമായി താൻ പ്രവർത്തിക്കുന്നുണ്ടെന്ന കാര്യവും രൺവീർ വെളിപ്പെടുത്തി. ഡൽഹി ഉച്ചകോടിയിൽ രൺവീർ ഗൂഗിൾ സിഇഒ സുന്ദർ പിച്ചൈയുമായും ഓപ്പൺഎഐ സിഇഒ സാം ആൾട്ട്മാനുമായും സംവദിച്ചു.
മൂന്ന് വയസ്സ് മുതൽ കോഡിംഗ് പഠിച്ചു തുടങ്ങിയ രൺവീർ സച്ച്ദേവ അഞ്ചാം വയസ്സിൽ ആപ്പിൾ സിഇഒ ടിം കുക്കിനെ കണ്ട് തന്റെ കോഡിംഗ് വൈദഗ്ദ്ധ്യം പ്രകടിപ്പിച്ചു. 2022 ഗ്ലോബൽ റീഡിംഗ് ചാലഞ്ചിൽ “സൂപ്പർ പ്രസന്റർ” ആയി സ്വർണ്ണ മെഡൽ നേടിയ രൺവീർ ലോകത്തിലെ ഏറ്റവും പ്രായം കുറഞ്ഞ TEDx സ്പീക്കറായും ചരിത്രം കുറിച്ചു. കഴിഞ്ഞ വർഷം ജനീവയിൽ നടന്ന എഐ ഫോർ ഗുഡ് ഗ്ലോബൽ ഉച്ചകോടിയിൽ സെയിൽസ്ഫോഴ്സ് സിഇഒ മാർക്ക് ബെനിയോഫ്, ഇന്റർനാഷണൽ ടെലികമ്മ്യൂണിക്കേഷൻ യൂണിയൻ സെക്രട്ടറി ജനറൽ ഡോറീൻ ബോഗ്ഡാൻ-മാർട്ടിൻ എന്നിവരുമായും രൺവീർ കൂടിക്കാഴ്ച നടത്തിയിരുന്നു.
8-year-old author and tech prodigy Ranvir Sachdeva becomes the youngest speaker at the India AI Impact Summit. Read about his interactions with Sundar Pichai and Sam Altman at Bharat Mandapam.
