കൊച്ചി വിമാനത്താവളത്തിലേക്കുള്ള ഗതാഗത കുരുക്കിന് പരിഹാരമായി കാൽ നൂറ്റാണ്ട് കാലം മുടങ്ങിക്കിടന്ന സീപോർട്ട്–എയർപോർട്ട് റോഡ് യാഥാർഥ്യമാകുന്നു. റോഡിൻ്റെ ടെണ്ടർ നടപടികൾ മാർച്ച് 1 ന് പൂർത്തിയാക്കി ഫേസ് 2 നിർമ്മാണമാരംഭിക്കും. ഇത് പൂർത്തിയാകുമ്പോൾ എച്ച്.എം.ടി – നേവൽ ആർമമെന്റ് ഡിപ്പോ NAD പ്രദേശത്ത് സ്വകാര്യ ഭൂമി ഏറ്റെടുത്ത് 2021ൽ നിർമ്മിച്ച 1.9 കിമീ റോഡുമായി സീപോർട്ട് എയർപോർട്ട് റോഡിനെ ബന്ധിപ്പിക്കും.
എച്ച്എംടിയുടെയും എൻഎഡിയുടെയും വക ഏറ്റെടുത്ത ഭൂമി, പദ്ധതി നടപ്പാക്കൽ ഏജൻസിയായ റോഡ്സ് ആൻഡ് ബ്രിഡ്ജസ് ഡെവലപ്മെന്റ് കോർപ്പറേഷൻ ഓഫ് കേരള (RBDCK) ക്ക് കൈമാറിക്കഴിഞ്ഞു . നിർമാണം പുനരാരംഭിക്കുന്നതിന്റെ ഭാഗമായി എച്ച്.എം.ടി – എൻ.എ.ഡി ഭാഗത്ത് റോഡിനായി കാട് വെട്ടിത്തെളിക്കലും ശുചീകരണ പ്രവർത്തനങ്ങളും ആരംഭിച്ചു.
ഇരുമ്പനം മുതൽ നെടുമ്പാശ്ശേരി വിമാനത്താവളം വരെയുള്ള 25.7 കിലോമീറ്റർ ദൈർഘ്യമുള്ള സീപോർട്ട്-എയർപോർട്ട് റോഡ് രണ്ട് ഘട്ടങ്ങളിലായാണ് നടപ്പാക്കുന്നത്. ഇരുമ്പനം മുതൽ കളമശ്ശേരി വരെയുള്ള 11.3 കിലോമീറ്റർ തെക്കൻ ഭാഗം 2003 ൽ കമ്മീഷൻ ചെയ്തപ്പോൾ, വിമാനത്താവളത്തിലേക്കുള്ള ശേഷിക്കുന്ന 14.4 കിലോമീറ്റർ ഭാഗം ഭരണപരവും നിയമപരവുമായ തടസ്സങ്ങളിൽ കുടുങ്ങി. കേന്ദ്ര ഏജൻസികളുമായുള്ള സംസ്ഥാന സർക്കാരിന്റെ നിരന്തരമായ ചർച്ചകളിലൂടെയാണ് വീണ്ടും പദ്ധതിക്ക് പുതുജീവൻ വച്ചത്.
നിലവിൽ 45 മീറ്റർ വീതിയിൽ രൂപകൽപ്പന ചെയ്ത 2.7 കിലോമീറ്റർ എച്ച്എംടി ഭൂമിയിലാണ് നിർമ്മാണം ശ്രദ്ധ കേന്ദ്രീകരിക്കുന്നത്. എച്ച്എംടി, എൻഎഡി ഭൂമി ഏറ്റെടുക്കലായിരുന്നു പ്രധാന തടസ്സം. സുപ്രീം കോടതി നിർദ്ദേശത്തെത്തുടർന്ന്, തൃക്കാക്കര നോർത്ത് ഗ്രാമത്തിലെ 1.4 ഹെക്ടർ എച്ച്എംടി വക സ്ഥലം ഏറ്റെടുക്കാൻ കേരള സർക്കാർ 37.9 കോടി രൂപ അനുവദിച്ചു. അതുപോലെ, പ്രതിരോധ മന്ത്രാലയവുമായുള്ള ചർച്ചകൾ എൻഎഡി ഭൂമിയിലൂടെയുള്ള പാത സുഗമമാക്കി. 2.5 ഹെക്ടർ സ്ഥലം ഏറ്റെടുക്കുന്നതിനായി സംസ്ഥാനം 23.11 കോടി രൂപയും, എൻഎഡി-തൊറപ്പ് റോഡ് വീതി കൂട്ടുന്നതിനായി 17.31 കോടി രൂപയും, സുരക്ഷ ഉറപ്പാക്കാൻ നിർബന്ധിത ചുറ്റുമതിലിനായി ഏകദേശം 1 കോടി രൂപയും അനുവദിച്ചു. ആർബിഡിസികെ വീണ്ടും ടെൻഡർ വിജ്ഞാപനങ്ങൾ പുറപ്പെടുവിച്ചതും എച്ച്എംടി-എൻഎഡി വിഭാഗത്തിന് സർക്കാർ 21.4 കോടി രൂപയുടെ ഭരണാനുമതി നൽകിയതും മൂലം നിർമ്മാണം ഇപ്പോൾ വേഗത്തിൽ പുരോഗമിക്കുന്നു.
സീപോർട്ട്-എയർപോർട്ട് റോഡ് യാഥാർഥ്യമാകുന്നതോടെ കൊച്ചി നഗരത്തിലെ തിരക്ക് കുറയുമെന്നും ഇടപ്പള്ളി-കളമശ്ശേരി ഭാഗത്തെയും എൻഎച്ച്-544 ലെയും തടസ്സങ്ങൾ ഗണ്യമായി ഇല്ലാതാകുമെന്നും പ്രതീക്ഷിക്കുന്നു. കൊച്ചി അന്താരാഷ്ട്ര വിമാനത്താവളത്തിലേക്കുള്ള യാത്രക്കാർക്ക് തടസ്സമില്ലാതെ എത്തിച്ചേരാനാകും. കൂടാതെ, തുറമുഖത്തിനും കളമശ്ശേരിയുടെ വ്യാവസായിക മേഖലയ്ക്കും ഇടയിലുള്ള മികച്ച കണക്റ്റിവിറ്റി ലോജിസ്റ്റിക്സ് ചെലവും സമയവും കുറയും.
Relief for Kochi’s traffic woes as Seaport-Airport Road Phase 2 kicks off. The 25.7 km project connecting Irumpanam to Nedumbassery Airport is set to bypass city bottlenecks
