കോയമ്പത്തൂർ നഗരത്തിലെ തെരുവുനായ ശല്യംകുറയ്ക്കുന്നതിനായി കോർപ്പറേഷൻ പുതിയ കേന്ദ്രം ഒരുക്കിയിരിക്കുകയാണ്. വെള്ളല്ലൂർ ഡംപ് യാർഡിൽ 4.13 കോടി രൂപ ചെലവിൽ നിർമ്മിച്ച മൃഗ ജനന നിയന്ത്രണ (ABC) കേന്ദ്രം തെരുവ് നായ്ക്കളുടെ എണ്ണം കൂടുതൽ സംഘടിതമായി കൈകാര്യം ചെയ്യാനുള്ള നഗരത്തിന്റെ ശേഷി ശക്തിപ്പെടുത്തുമെന്നാണ് വിലയിരുത്തൽ. തെരുവ് നായ്ക്കൾക്കായുള്ള 50 കെന്നലുകളും ഒരുക്കിയിട്ടുണ്ട്.
ഇതിനുപുറമേ എബിസി കേന്ദ്രത്തിൽ ഒരു അധിക ഓപ്പറേഷൻ തിയേറ്ററും നാല് വാഹനങ്ങളും പുതുതായി സജ്ജമാക്കിയിട്ടുണ്ട്. ഇതോടെ, കേന്ദ്രത്തിൽ ഇപ്പോൾ അഞ്ച് ഓപ്പറേഷൻ തിയേറ്ററുകളായി. തെരുവ് നായ്ക്കളെ പാർപ്പിക്കുന്നതിനും, ശസ്ത്രക്രിയകൾക്കും ശേഷമുള്ള പരിചരണത്തിനും, ക്വാറന്റൈനിനുമെല്ലാമായാണ് കെന്നലുകൾ സ്ഥാപിച്ചിരിക്കുന്നത്. ഇതിനുപുറമേ വന്ധ്യംകരണത്തിനും വാക്സിനേഷനുമെല്ലാം സഹായകരമാകുന്നതിലൂടെ നിലവിലുള്ള മൃഗ ജനന നിയന്ത്രണ ശ്രമങ്ങളെ പിന്തുണയ്ക്കാൻ ഈ കെന്നലുകൾ ഉപകാരപ്പെടും.
ഒരു ഏക്കറിലധികം വിസ്തൃതിയിലാണ് കെന്നലുകൾ നിർമ്മിച്ചിരിക്കുന്നതെന്നും, ഓരോ കെന്നലുകളിലും ഒരേ സമയം 10 നായ്ക്കളെ ഉൾക്കൊള്ളാൻ കഴിയുമെന്നും കോർപ്പറേഷൻ അധികൃതർ പറഞ്ഞു.
Coimbatore Corporation strengthens stray dog management with a new ₹4.13 Crore ABC center at Vellalore, featuring 50 kennels, 5 operation theaters, and specialized transport vehicles.
