പശ്ചിമേഷ്യൻ സംഘർഷത്തെ തുടർന്ന് കേരളത്തിലടക്കം വിവിധ സംസ്ഥാനങ്ങളിൽ പാചകവാതക സിലിണ്ടറിന് ക്ഷാമം നേരിടുന്നതായി റിപ്പോർട്ട്. മലപ്പുറം ജില്ലയിലെ ചേളാരിയിലുള്ള ഇന്ത്യൻ ഓയിൽ കോർപ്പറേഷന്റെ (IOC) എൽപിജി ബോട്ട്ലിംഗ് പ്ലാന്റ് വാണിജ്യ എൽപിജി സിലിണ്ടറുകളുടെ റീഫില്ലിംഗ് നിർത്തിവെച്ചു. മലബാർ മേഖലയിലുടനീളമുള്ള ഇൻഡെയ്ൻ ഗ്യാസ് ഏജൻസികളുടെ 19 കിലോഗ്രാം, 5 കിലോഗ്രാം എൽപിജി സിലിണ്ടറുകളെ ആശ്രയിക്കുന്ന വാണിജ്യ ഉപഭോക്താക്കൾക്ക് അധികാരികൾ പുതിയ ഓർഡറുകൾ പുറപ്പെടുവിക്കുന്നതുവരെ റീഫിൽ ലഭിക്കില്ല. അതേസമയം, ചേളാരി പ്ലാന്റ് പതിവുപോലെ ഗാർഹിക എൽപിജി സിലിണ്ടറുകൾ നിറയ്ക്കുന്നത് തുടരുകയാണ്.
വാണിജ്യ സിലിണ്ടറിന്റെ ക്ഷാമം കാരണം ബിഹാർ, മഹാരാഷ്ട്ര, പഞ്ചാബ്, കർണാടക തുടങ്ങിയ സംസ്ഥാനങ്ങളിലെ ഹോട്ടലുകൾ പ്രതിസന്ധിയിലായതായി ഹോട്ടൽസ് ആൻഡ് റെസ്റ്റോറന്റ് അസോസിയേഷൻ പറയുന്നു. എൽപിജി സിലിണ്ടർ വിതരണത്തിൽ എന്തെങ്കിലും തടസ്സം ഉണ്ടായാൽ റെസ്റ്റോറന്റുകൾ വ്യാപകമായി അടച്ചുപൂട്ടേണ്ടി വരുമെന്ന് നാഷണൽ റെസ്റ്റോറന്റ് അസോസിയേഷൻ ഓഫ് ഇന്ത്യ മുന്നറിയിപ്പ് നൽകി. വാണിജ്യ എൽപിജിയുടെ ക്ഷാമം കാരണം ബുധനാഴ്ച മുതൽ നഗരത്തിലെ പല റെസ്റ്റോറന്റുകൾക്കും പ്രവർത്തിക്കാൻ കഴിഞ്ഞേക്കില്ലെന്ന് ബെംഗളൂരു ഹോട്ടൽസ് അസോസിയേഷൻ അറിയിച്ചു.
പാചകവാതക വിതരണത്തിലുണ്ടായ തടസ്സങ്ങൾ പരിഹരിക്കാൻ കേന്ദ്ര പെട്രോളിയം പ്രകൃതിവാതക മന്ത്രാലയം നിർണ്ണായക നടപടികളാണ് സ്വീകരിച്ചിരിക്കുന്നത്. ആഭ്യന്തര വിപണിയിൽ എൽപിജി ലഭ്യത ഉറപ്പാക്കുന്നതിനായി ഉത്പാദനം വർദ്ധിപ്പിക്കാൻ എണ്ണ ശുദ്ധീകരണ ശാലകൾക്ക് മന്ത്രാലയം നിർദ്ദേശം നൽകി. ഗാർഹിക ആവശ്യങ്ങൾക്കുള്ള സപ്ലൈക്ക് മുൻഗണന നൽകുന്നതിനോടൊപ്പം, പൂഴ്ത്തിവെപ്പും കള്ളക്കടത്തും തടയാനായി സിലിണ്ടർ ബുക്കിംഗുകൾക്കിടയിൽ 25 ദിവസത്തെ ഇടവേള നിർബന്ധമാക്കിയിട്ടുണ്ട്. ഇറക്കുമതി ചെയ്യുന്ന എൽപിജി നിലവിൽ ആശുപത്രികൾ, വിദ്യാഭ്യാസ സ്ഥാപനങ്ങൾ തുടങ്ങിയ അവശ്യ വിഭാഗങ്ങൾക്കായി മാറ്റിവെച്ചിരിക്കുകയാണ്. കൂടാതെ, ഹോട്ടലുകൾ, റെസ്റ്റോറന്റുകൾ, മറ്റ് വ്യവസായങ്ങൾ എന്നിവയുടെ ആവശ്യങ്ങൾ പുനഃപരിശോധിക്കാനായി എണ്ണക്കമ്പനികളിലെ എക്സിക്യൂട്ടീവ് ഡയറക്ടർമാർ ഉൾപ്പെട്ട പ്രത്യേക സമിതിയെയും സർക്കാർ നിയോഗിച്ചിട്ടുണ്ട്
The West Asia conflict has triggered an LPG shortage in India. While domestic supplies remain a priority, commercial refills are restricted, hitting the hotel industry in Kerala and other states. Learn about the new 25-day booking rule and government measures.
