റോഡ് പോർട്ട്ഫോളിയോ വിപുലീകരിക്കുന്നതിന്റെ ഭാഗമായി നിർണായക ഏറ്റെടുക്കൽ പൂർത്തിയാക്കി അദാനി എന്റർപ്രൈസസ് ലിമിറ്റഡ്. ഊർജ്ജം, ഗതാഗതം, ലോജിസ്റ്റിക്സ് തുടങ്ങിയ മേഖലകളിൽ വൻകിട ഇൻഫ്രാസ്ട്രക്ചർ പദ്ധതികൾ നടപ്പിലാക്കുന്ന അദാനി റോഡ് ട്രാൻസ്പോർട്ട് ലിമിറ്റഡ്, ഗുജറാത്തിലെ എൻഎച്ച്-27ന്റെ പാലൻപൂർ-രാധൻപൂർ-സാമഖിയാലി വിഭാഗത്തിന്റെ ടോളിംഗ്, ഓപ്പറേഷൻസ്, മെയിന്റനൻസ് എന്നിവ നിർവഹിക്കുന്ന ഡിപി ജെയിൻ ടോട്ട് ടോൾ റോഡ്സ് പ്രൈവറ്റ് ലിമിറ്റഡിന്റെ (DPJ TOT) അവശേഷിക്കുന്ന 49 ശതമാനം ഓഹരികളാണ് സ്വന്തമാക്കിയത്.
ഏകദേശം 1,342 കോടി രൂപയുടേതാണ് ഇടപാട്. ഇതോടെ ഡിപി ജെയിൻ ടോട്ട് ടോൾ റോഡ്സ് അദാനി ഗ്രൂപ്പിന്റെ പൂർണ്ണ ഉടമസ്ഥതയിലുള്ള ഉപകമ്പനിയായി മാറി. ഈ വാർത്ത പുറത്തുവന്നതോടെ അദാനി എന്റർപ്രൈസസിന്റെ ഓഹരി വിലയിൽ 1.38 ശതമാനം വരെ വർധന രേഖപ്പെടുത്തി. ഗുജറാത്തിന് പിന്നാലെ തമിഴ്നാട്ടിലും സാന്നിധ്യം ശക്തമാക്കാൻ കമ്പനി പുതിയ നടപടികൾ ആരംഭിച്ചു. ഇതിനായി മാർച്ച് 9ന് ‘കോർ ടോൾവേയ്സ് ലിമിറ്റഡ്’ (CTL) എന്ന പേരിൽ പുതിയ ഉപകമ്പനി രൂപീകരിച്ചു. ചെന്നൈ ഔട്ടർ റിംഗ് റോഡിന്റെ ഒന്നും രണ്ടും ഘട്ടങ്ങളുടെ ടോളിംഗ്, മെയിന്റനൻസ് ചുമതലകളാണ് ഈ കമ്പനി നിർവഹിക്കുക.
നിലവിൽ അദാനി എന്റർപ്രൈസസിന്റെ സാമ്പത്തിക നില ഭദ്രമാണ്; 2024 ഡിസംബറിലെ 22,848 കോടി രൂപയിൽ നിന്ന് 2025 ഡിസംബറിൽ കമ്പനിയുടെ വരുമാനം 24,820 കോടി രൂപയായി ഉയർന്നു. ഇതേ കാലയളവിൽ അറ്റാദായം 229 കോടിയിൽ നിന്ന് 5,727 കോടി രൂപയായാണ് കുതിച്ചുയർന്നത്. വരും വർഷങ്ങളിൽ ഗ്രീൻ ഹൈഡ്രജൻ, എയർപോർട്ട് മാനേജ്മെന്റ്, ഡാറ്റാ സെന്ററുകൾ എന്നീ മേഖലകളിൽ കൂടുതൽ നിക്ഷേപം നടത്താനാണ് അദാനി ഗ്രൂപ്പ് ലക്ഷ്യമിടുന്നത്.
Adani Enterprises completes the 100% acquisition of DP Jain TOT Toll Roads for ₹1,342 crore. Explore Adani’s growing infrastructure footprint in Gujarat and Tamil Nadu.
