ഇന്ത്യൻ നാവികസേനയുടെ കരുത്ത് വർദ്ധിപ്പിക്കുന്നതിനായി 60 പുതിയ യുഎച്ച്-എം (UH-M) ഹെലികോപ്റ്ററുകൾ വാങ്ങാൻ പ്രതിരോധ മന്ത്രാലയം തീരുമാനം. ഹിന്ദുസ്ഥാൻ എയറോനോട്ടിക്സ് ലിമിറ്റഡ് (HAL) വികസിപ്പിച്ച ധ്രുവ് ഹെലികോപ്റ്ററുകളുടെ അത്യാധുനിക നാവിക പതിപ്പാണിത്. കപ്പലുകളിൽ നിന്ന് സുഗമമായി പ്രവർത്തിപ്പിക്കാൻ കഴിയുന്ന വിധത്തിലുള്ള ഫോൾഡബിൾ ബ്ലേഡുകളും ടെയ്ലുമാണ് ഇവയുടെ പ്രധാന പ്രത്യേകത. 2027ൽ സർട്ടിഫിക്കേഷൻ നടപടികൾ പൂർത്തിയാക്കി 2028 മുതൽ ഇവ നാവികസേനയുടെ ഭാഗമായി തുടങ്ങും.
സമുദ്ര നിരീക്ഷണത്തിനായി ഘടിപ്പിച്ച അത്യാധുനിക എസ (AESA) റഡാർ, കരുത്തുറ്റ ഗിയർബോക്സ് എന്നിവ യുഎച്ച്-എം ഹെലികോപ്റ്ററുകളുടെ കാര്യക്ഷമത വർദ്ധിപ്പിക്കുന്നു. കടലിലെ രക്ഷാപ്രവർത്തനങ്ങൾ, മെഡിക്കൽ ഇവാക്വേഷൻ, ചരക്ക് നീക്കം എന്നിവയ്ക്ക് പുറമെ പൈറേറ്റ് വിരുദ്ധ പട്രോളിംഗിനും ഇവ ഉപയോഗിക്കാം. വിദേശ ഹെലികോപ്റ്ററുകളെ ആശ്രയിക്കുന്നത് കുറയ്ക്കാനും തദ്ദേശീയമായ സാങ്കേതികവിദ്യ പ്രോത്സാഹിപ്പിക്കാനും ലക്ഷ്യമിട്ടുള്ള ഈ നീക്കം ഇന്ത്യൻ സമുദ്രമേഖലയിലെ സുരക്ഷ കൂടുതൽ ശക്തമാക്കും.
The Indian Navy to acquire 60 indigenous UH-M helicopters from HAL. Featuring foldable blades and AESA radars, these Dhruv variants will boost maritime security
