ഇറാൻ യുദ്ധം രൂക്ഷമാകുന്ന സാഹചര്യത്തിൽ രാജ്യത്തെ ഗാർഹിക ഉപഭോക്താക്കൾക്ക് മുൻഗണന നൽകാൻ കേന്ദ്ര സർക്കാർ തീരുമാനിച്ചിരിക്കുകയാണ്. എൽപിജി ഇറക്കുമതിയിലും വിതരണത്തിലും തടസ്സമുണ്ടാകാനുള്ള സാധ്യത മുൻനിർത്തിയാണ് ഊർജ്ജ പ്രതിസന്ധി ഒഴിവാക്കാൻ 1955ലെ അവശ്യസാധന നിയമം (Essential Commodities Act) പ്രയോഗിച്ച് കേന്ദ്രം പുതിയ ഉത്തരവിറക്കിയത്. ഇതോടൊപ്പം രാജ്യത്തെ ഗ്യാസ് ഗ്രിഡിൽ ലഭ്യമാകുന്ന വാതകം ഫാക്ടറികൾക്കോ പവർ പ്ലാന്റുകൾക്കോ നൽകുന്നതിന് മുൻപ് വീടുകളിലെ പൈപ്പ്ഡ് ഗ്യാസ് (PNG) ഉപഭോക്താക്കൾക്കും പൊതുഗതാഗതത്തിനായുള്ള സിഎൻജി വിതരണത്തിനുമായി മാറ്റിവെയ്ക്കണം. കഴിഞ്ഞ ആറ് മാസത്തെ ശരാശരി ഉപഭോഗത്തിന്റെ 100 ശതമാനവും ഇത്തരത്തിൽ മുൻഗണനാ വിഭാഗത്തിന് ഉറപ്പാക്കാനാണ് നിർദ്ദേശം.
ആഗോള പ്രതിസന്ധികൾ കാരണം എൽപിജി ഇറക്കുമതി തടസ്സപ്പെട്ടാലും പൈപ്പ്ഡ് ഗ്യാസ് ഉപഭോക്താക്കളെ അത് കാര്യമായി ബാധിക്കില്ല എന്ന് വിദഗ്ധർ ചൂണ്ടിക്കാണിക്കുന്നു. രാജ്യത്ത് പാചകവാതക ക്ഷാമമുണ്ടാകുന്ന സാഹചര്യത്തിൽ വ്യവസായ ആവശ്യങ്ങൾക്ക് മുൻപ് ഗാർഹിക വിതരണത്തിന് നൂറു ശതമാനം മുൻഗണന നൽകാൻ സർക്കാർ ഉത്തരവിട്ടതിനാൽ ഗാർഹിക ഉപഭോഗത്തിന് യാതൊരു വിധത്തിലും തടസ്സം നേരിടില്ലെന്ന് കേന്ദ്രം വ്യക്തമാക്കുന്നു.
എന്താണ് പൈപ്പ്ഡ് ഗ്യാസ്?
സാധാരണ ഉപയോഗിക്കുന്ന എൽപിജി സിലിണ്ടറുകൾക്ക് പകരമായി ഭൂഗർഭ പൈപ്പുകളിലൂടെ നേരിട്ട് അടുക്കളകളിലെത്തിക്കുന്ന പ്രകൃതിവാതകമാണ് പൈപ്പ്ഡ് നാച്ചുറൽ ഗ്യാസ് അഥവാ പിഎൻജി. എൽപിജിയിൽ പ്രൊപ്പെയ്ൻ, ബ്യൂട്ടെയ്ൻ മിശ്രിതമാണ് അടങ്ങിയിരിക്കുന്നതെങ്കിൽ പൈപ്പ്ഡ് ഗ്യാസിൽ പ്രധാനമായും മീഥെയ്ൻ ആണുള്ളത്. സിലിണ്ടറുകൾ ബുക്ക് ചെയ്യാനോ മാറ്റാനോ ഉള്ള ബുദ്ധിമുട്ടില്ലാതെ 24 മണിക്കൂറും തടസ്സമില്ലാതെ ഇത് ലഭ്യമാകും. വാതക ചോർച്ചയുണ്ടായാൽ ഇത് വേഗത്തിൽ അന്തരീക്ഷത്തിൽ കലർന്നുപോകുമെന്നതിനാൽ എൽപിജിയേക്കാൾ സുരക്ഷിതവുമാണ്. എൽപിജി സിലിണ്ടറുകളെ അപേക്ഷിച്ച് പിഎൻജി ഉപയോഗിക്കുന്നത് ലാഭകരമാണെന്നതും ഉപയോഗിക്കുന്ന വാതകത്തിന്റെ അളവിനനുസരിച്ച് മാത്രം പണം നൽകിയാൽ മതിയാകും എന്നതും ഇതിന്റെ പ്രത്യേകതയാണ്.
എത്ര പേർക്ക് ഗുണം?
2024ലെ കണക്കനുസരിച്ച് ഇന്ത്യയിലാകെ 33.2 കോടി എൽപിജി കണക്ഷനുകളാണ് ഉള്ളത്. അതേസമയം പിഎൻജി കണക്ഷനുകളുടെ എണ്ണമാകട്ടെ വെറും 1.36 കോടി മാത്രമാണ്. ഈ സാഹചര്യത്തിൽ പിഎൻജിയിലൂടെ നിലവിൽ നേട്ടമുണ്ടാക്കുന്നത് ജനസംഖ്യയുടെ വളരെ ചെറിയൊരു ശതമാനത്തിന് മാത്രമാണ്. അതായത്, രാജ്യത്തെ ഭൂരിഭാഗം വീടുകളും ഇപ്പോഴും എൽപിജി സിലിണ്ടറുകളെ ആശ്രയിക്കുമ്പോൾ, നഗര കേന്ദ്രീകൃതമായ പിഎൻജി ശൃംഖലയുടെ ഗുണം കുറഞ്ഞ ആളുകളിലേക്ക് മാത്രമേ എത്തുന്നുള്ളൂ. യുദ്ധം കാരണം വില വർദ്ധിച്ചാലും ‘പൂൾഡ് പ്രൈസ്’ (Pooled Price) സംവിധാനത്തിലൂടെ പൈപ്പ്ഡ് ഗ്യാസ് (PNG) ഉപഭോക്താക്കൾക്ക് കുറഞ്ഞ നിരക്കിൽ വാതകം ലഭ്യമാക്കാൻ ഗ്യാസ് അതോറിറ്റി ഓഫ് ഇന്ത്യ ലിമിറ്റഡിനെ (GAIL) സർക്കാർ ചുമതലപ്പെടുത്തിയിട്ടുണ്ട്. സമാനമായ രീതിയിൽ സബ്സിഡികളിലൂടെയും വിപണി ഇടപെടലുകളിലൂടെയും എൽപിജി ഉപഭോക്താക്കൾക്കും അമിത വിലക്കയറ്റത്തിൽ നിന്ന് സംരക്ഷണം നൽകാൻ സർക്കാർ ശ്രമിക്കുന്നത് സാധാരണക്കാർക്ക് ആശ്വാസമാകും.
കേരളത്തിലെ പിഎൻജി
കേരളത്തിലും പൈപ്പ്ഡ് നാച്ചുറൽ ഗ്യാസ് ശൃംഖല വ്യാപിച്ചുകൊണ്ടിരിക്കുകയാണ്. കൊച്ചി-മംഗളൂരു പൈപ്പ് ലൈൻ കേന്ദ്രമാക്കിയുള്ള പ്രധാന സംവിധാനം നിലവിൽ കൊച്ചി, തിരുവനന്തപുരം, തൃശ്ശൂർ, പാലക്കാട്, മലപ്പുറം, കണ്ണൂർ, കോഴിക്കോട് തുടങ്ങിയ നഗരങ്ങളിലും വ്യവസായ മേഖലകളിലും ലഭ്യമാണ്. അദാനി ടോട്ടൽ ഗ്യാസ് (Adani Total Gas), എജി&പി പ്രഥം (AG&P Pratham) തുടങ്ങിയ കമ്പനികളാണ് സംസ്ഥാനത്ത് പിഎൻജി വിതരണത്തിന് നേതൃത്വം നൽകുന്നത്.
Amid rising Iran-US tensions, the Indian government ensures 100% priority for domestic Piped Natural Gas (PNG) and CNG. Learn how the Essential Commodities Act protects households.
