ഗൂഗിളിനെ വെല്ലുവിളിച്ചും ഒപ്പം പ്രശംസിച്ചും പെർപ്ലെക്സിറ്റി (Perplexity) സിഇഒ അരവിന്ദ് ശ്രീനിവാസ് വാർത്തകളിൽ നിറയുന്നു. ഗൂഗിളിന്റെ ക്രോം ബ്രൗസർ 34.5 ബില്യൺ ഡോളറിന് വാങ്ങാൻ കഴിഞ്ഞ ഓഗസ്റ്റിൽ അദ്ദേഹം സുന്ദർ പിച്ചൈയ്ക്ക് കത്തെഴുതിയിരുന്നു. പെർപ്ലെക്സിറ്റിയുടെ അന്നത്തെ മൂല്യത്തിന്റെ ഇരട്ടിയോളം വരുന്ന തുകയായിരുന്നു ഇത്. എന്നാൽ ഈ ലേലശ്രമങ്ങൾ വിജയിച്ചില്ലെന്ന് മാത്രമല്ല, ക്രോമോ ആൻഡ്രോയിഡോ ഗൂഗിൾ വിൽക്കേണ്ടതില്ലെന്ന് കോടതി വിധിക്കുകയും ചെയ്തു. ഇതിനുപിന്നാലെ പെർപ്ലെക്സിറ്റിയുടെ പുതിയ ‘കോമറ്റ്’ (Comet) ബ്രൗസറിന്റെ ഐഫോൺ പതിപ്പ് പുറത്തിറക്കിയപ്പോൾ, ഗൂഗിളിനെ തന്നെ അതിൽ ഡിഫോൾട്ട് സെർച്ച് എഞ്ചിനായി നിലനിർത്തിക്കൊണ്ട് ശ്രീനിവാസ് എല്ലാവരെയും അമ്പരപ്പിച്ചു.
നാവിഗേഷണൽ സെർച്ചിന്റെ കാര്യത്തിൽ (സമീപത്തുള്ള റെസ്റ്റോറന്റുകൾ കണ്ടെത്തുകയോ സ്പോർട്സ് സ്കോറുകൾ അറിയുകയോ ചെയ്യുന്നത് പോലെ) ഗൂഗിളിനെ തോൽപ്പിക്കാൻ പെർപ്ലെക്സിറ്റിക്ക് പോലും കഴിയില്ലെന്ന് അരവിന്ദ് ശ്രീനിവാസ് തുറന്നുപറഞ്ഞു. ഗൂഗിളിന്റെ വേഗതയും പെർപ്ലെക്സിറ്റിയുടെ കൃത്യമായ ഉത്തരങ്ങളും സമന്വയിപ്പിച്ചാണ് കോമറ്റ് ഐഒഎസ് പതിപ്പ് രൂപകൽപ്പന ചെയ്തിരിക്കുന്നത്. വെബ് പേജുകൾക്ക് മുകളിൽ അസിസ്റ്റന്റായി പെർപ്ലെക്സിറ്റി പ്രവർത്തിക്കുമ്പോൾ തന്നെ, അടിസ്ഥാനപരമായ സെർച്ച് ആവശ്യങ്ങൾക്കായി ഗൂഗിളിന്റെ സേവനം ലഭ്യമാകും. ഗൂഗിളിനെ പൂർണ്ണമായും ഒഴിവാക്കുന്നതിന് പകരം, അതിന്റെ സാധ്യതകൾ കൂടി പ്രയോജനപ്പെടുത്തി മികച്ച ബ്രൗസിംഗ് അനുഭവം നൽകാനാണ് തങ്ങൾ ശ്രമിക്കുന്നതെന്ന് അദ്ദേഹം വ്യക്തമാക്കി.
perplexitiy ceo aravind srinivas reveals a $34.5 billion bid for google chrome. learn why his new comet browser for ios still uses google as the default search engine.
