തന്റെ ഡാറ്റാ സെന്റർ ബിസിനസ്സ് വിപുലീകരിക്കുന്നതിന്റെ ഭാഗമായി ആഗോള സാങ്കേതിക ഭീമന്മാരായ മെറ്റ (Meta), ഗൂഗിൾ (Google) എന്നിവരുമായി ചർച്ചകൾ ആരംഭിച്ച് അദാനി ഗ്രൂപ്പ് ചെയർമാൻ ഗൗതം അദാനി. വാൾമാർട്ടിന്റെ ഉടമസ്ഥതയിലുള്ള ഫ്ലിപ്കാർട്ടും ഈ ചർച്ചകളിൽ പങ്കുചേരുന്നുണ്ടെന്നാണ് വിവരം. അദാനി ഗ്രൂപ്പ് നടപ്പിലാക്കുന്ന 100 ബില്യൺ ഡോളറിന്റെ ഡിജിറ്റൽ ഇൻഫ്രാസ്ട്രക്ചർ പദ്ധതിയുടെ ഭാഗമായാണ് നീക്കം. ആർട്ടിഫിഷ്യൽ ഇന്റലിജൻസ് (AI), ക്ലൗഡ് സേവനങ്ങൾ എന്നിവയ്ക്ക് ആവശ്യമായ വമ്പൻ ഡാറ്റാ സെന്ററുകൾക്കായി ഭൂമിയും എനർജിയും നൽകുന്ന പ്രധാന പങ്കാളിയായി മാറാനാണ് അദാനി ലക്ഷ്യമിടുന്നത്. നിലവിൽ ചർച്ചകൾ പ്രാഥമിക ഘട്ടത്തിലാണെങ്കിലും, ഇന്ത്യയിലെ വിവിധ സംസ്ഥാനങ്ങളിൽ ഇതിനായുള്ള സ്ഥലങ്ങൾ ഗ്രൂപ്പ് പരിശോധിച്ചുവരികയാണ്.
ഇന്ത്യയിലെ ഡിജിറ്റൽ അടിസ്ഥാന സൗകര്യ വികസന മേഖലയിൽ മത്സരം മുറുകുന്നതിന്റെ സൂചനയായാണ് അദാനിയുടെ ഈ പുതിയ നീക്കം വിലയിരുത്തപ്പെടുന്നത്. നേരത്തെ വിശാഖപട്ടണത്ത് ഗൂഗിളുമായി ചേർന്ന് എഐ ഇൻഫ്രാസ്ട്രക്ചർ ഹബ്ബ് നിർമ്മിക്കുമെന്ന് അദാനി കണക്സ് പ്രഖ്യാപിച്ചിരുന്നു. ഇതിനു പുറമെയാണ് മെറ്റയുമായും മറ്റുമുള്ള പുതിയ ചർച്ചകൾ. റിലയൻസ് ഇൻഡസ്ട്രീസ്, ടാറ്റ കൺസൾട്ടൻസി സർവീസസ് (TCS) തുടങ്ങിയ ഇന്ത്യൻ കമ്പനികളും ആമസോൺ, ഓപ്പൺ എഐ തുടങ്ങിയ ആഗോള കമ്പനികളും ഇന്ത്യയിൽ ഡാറ്റാ സെന്ററുകൾ സ്ഥാപിക്കാൻ വൻതോതിൽ നിക്ഷേപം നടത്തുന്നുണ്ട്. വളർന്നുവരുന്ന ഇന്ത്യൻ സമ്പദ്വ്യവസ്ഥയും ഡിജിറ്റൽ സേവനങ്ങളുടെ വർദ്ധിച്ച ആവശ്യകതയുമാണ് ആഗോള കമ്പനികളെ ഇന്ത്യയിലേക്ക് ആകർഷിക്കുന്നത്.
Adani Group explores major partnerships with Meta, Google, and Flipkart to build AI-ready hyperscale data centers as part of its $100 billion digital infrastructure plan.
