പ്രാദേശിക വ്യാപാര സമവാക്യങ്ങളിലെ മാറ്റങ്ങൾക്കനുസരിച്ച് വിദേശ ട്രാൻസ്ഷിപ്പ്മെന്റുകളെ ആകർഷിക്കുന്നതിനായി തുറമുഖങ്ങളിൽ കൂടുതൽ ഇളവുകളും സൗകര്യങ്ങളും ഏർപ്പെടുത്താൻ പാകിസ്ഥാൻ നീക്കം. ഫെഡറൽ മാരിടൈം കാര്യ മന്ത്രി മുഹമ്മദ് ജുനൈദ് അൻവർ ചൗധരിയുടെ അധ്യക്ഷതയിൽ ചേർന്ന ഉന്നതതല യോഗത്തിലാണ് പുതിയ നടപടികൾ പ്രഖ്യാപിച്ചത്. ഇതിന്റെ ഭാഗമായി ഡ്രൈ ബൾക്ക് എക്സ്പോർട്ട് കാർഗോ കയറ്റുമതി ചെയ്യുന്ന വിദേശ ട്രാൻസ്ഷിപ്പ്മെന്റ് കപ്പലുകളുടെ പോർട്ട് ചാർജുകളിൽ 60 ശതമാനം വരെ ഇളവ് നൽകാൻ തീരുമാനിച്ചു. പ്രവർത്തനച്ചെലവ് കുറച്ച് പാക് തുറമുഖങ്ങളെ ഈ മേഖലയിലെ പ്രധാന വ്യാപാര കേന്ദ്രങ്ങളാക്കി മാറ്റുകയാണ് ലക്ഷ്യം. ചരക്കുനീക്കം സുഗമമാക്കാൻ ചാർജുകൾ ഏകീകരിക്കാനും നടപടിക്രമങ്ങളിലെ കാലതാമസം ഒഴിവാക്കാനും മന്ത്രി ബന്ധപ്പെട്ട ഉദ്യോഗസ്ഥർക്ക് നിർദ്ദേശം നൽകി.
ഇവ ഇന്ത്യൻ സമുദ്രമേഖലയിലെ തന്ത്രപരമായ ചരക്കുനീക്കങ്ങളെയും മത്സരങ്ങളെയും സ്വാധീനിക്കും എന്നതിനാൽ പാകിസ്ഥാന്റെ പുതിയ നീക്കങ്ങളെ ഇന്ത്യൻ വാണിജ്യ-പ്രതിരോധ മേഖലകൾ പ്രാധാന്യത്തോടെയാണ് വീക്ഷിക്കുന്നത്. കറാച്ചി പോർട്ട് ട്രസ്റ്റ് (KPT) പോലുള്ള തങ്ങളുടെ പ്രധാന മാരിടൈം ഗേറ്റ്വേകളിൽ കാര്യക്ഷമത വർദ്ധിപ്പിക്കാൻ പാകിസ്ഥാൻ ശ്രമിക്കുമ്പോൾ, ഇന്ത്യ വിഴിഞ്ഞം, മുംബൈ ഉൾപ്പെടെയുള്ള ട്രാൻസ്ഷിപ്പ്മെന്റ് ഹബ്ബുകളിലൂടെ ആഗോള വ്യാപാരത്തിൽ ആധിപത്യം ഉറപ്പിക്കാനുള്ള ശ്രമങ്ങളിലാണ്. പാകിസ്ഥാൻ തങ്ങളുടെ പോർട്ട് പോളിസിയിൽ കൂടുതൽ വ്യക്തത വരുത്താൻ ശ്രമിക്കുമ്പോൾ, മേഖലയിലെ സമുദ്രവ്യാപാര മത്സരത്തിൽ ഇത് വലിയ ചലനങ്ങൾ ഉണ്ടാക്കിയേക്കാം.
Pakistan announces a massive 60% cut in port charges for transshipment vessels at Karachi Port. India keeps a close watch as regional maritime competition intensifies
