പാചകവാതക വിലക്കയറ്റത്തിന് പരിഹാരവുമായി വെള്ളത്തിൽ നിന്ന് ഹൈഡ്രജൻ ഉത്പാദിപ്പിച്ച് പാചകം ചെയ്യാമെന്ന അവകാശവാദവുമായി ഒരു സ്റ്റാർട്ടപ്. രാജ്യത്തെ പ്രമുഖ ക്ലീൻ-ടെക് സ്റ്റാർട്ടപ്പായ ഗ്രീൻവൈസ് (Greenvize) ആണ് ഈ അവകാശവാദം ഉന്നയിക്കുന്നത്. ഇത്തരത്തിൽ അത്യാധുനിക സ്റ്റൗ പുറത്തിറക്കിയിരിക്കുകയാണെന്നും കമ്പനി പറയുന്നു. പ്രോട്ടോൺ എക്സ്ചേഞ്ച് മെംബ്രൻ (PEM) ഇലക്ട്രോലൈസർ ഉപയോഗിച്ച് വെള്ളത്തെ ഹൈഡ്രജനും ഓക്സിജനുമായി വേർതിരിച്ചാണ് ഇത് പ്രവർത്തിക്കുന്നതെന്നാണ് വിശദീകരണം.
കുറഞ്ഞ ചെലവാണ് സ്റ്റൗവിന്റെ പ്രധാന സവിശേഷതയെന്ന് കമ്പനി പറയുന്നു. വെറും 100 മില്ലി ഡിസ്റ്റിൽഡ് വാട്ടറും 1 kWh വൈദ്യുതിയും ഉണ്ടെങ്കിൽ ആറ് മണിക്കൂർ വരെ തുടർച്ചയായി പാചകം ചെയ്യാം. ഇതിനുപുറമേ പാചകം ചെയ്യുമ്പോൾ നീരാവി മാത്രമാണ് പുറന്തള്ളുന്നത് എന്നതിനാൽ ഇത് പരിസ്ഥിതി സൗഹാർദപരവുമാണ്. പുറത്തുവിടുന്ന ഓക്സിജൻ അടുക്കളയിലെ വായുസഞ്ചാരം മെച്ചപ്പെടുത്താൻ സഹായിക്കുമെന്നും കമ്പനി അവകാശപ്പെടുന്നു.
ഇൻഡക്ഷൻ സ്റ്റൗവുകളെ അപേക്ഷിച്ച് വളരെ കുറഞ്ഞ വൈദ്യുതി മാത്രമേ ഇതിന് ആവശ്യമുള്ളൂ. സാധാരണ പാത്രങ്ങൾ ഇതിൽ ഉപയോഗിക്കാം. സിംഗിൾ ബർണർ സ്റ്റൗവിന് 1.05 ലക്ഷം രൂപയും ഡബിൾ ബർണറിന് 1.5 ലക്ഷം രൂപയുമാണ് വില. ഈ വില അധികമാണെങ്കിലും ദീർഘകാലാടിസ്ഥാനത്തിൽ ലാഭകരമാണെന്നാണ് വിലയിരുത്തൽ. സോളാർ പാനലുകളുമായി ബന്ധിപ്പിച്ച് ഓഫ്-ഗ്രിഡ് രീതിയിലും ഈ അടുപ്പ് പ്രവർത്തിപ്പിക്കാം. നിലവിൽ ഹോട്ടലുകൾക്കും കമ്മ്യൂണിറ്റി കിച്ചണുകൾക്കുമായുള്ള ഈ സാങ്കേതികവിദ്യ ഭാവിയിൽ വീടുകളിലേക്കും വ്യാപകമാക്കാനാണ് കമ്പനി ലക്ഷ്യമിടുന്നത്.
Say goodbye to LPG! Indian startup Greenvize introduces a hydrogen-based stove that uses water and minimal electricity to cook for 6 hours. Learn how PEM technology is revolutionizing the kitchen
