അടുത്ത മൂന്ന് വർഷത്തിനുള്ളിൽ 500 കോടി രൂപയുടെ വിറ്റുവരവ് ലക്ഷ്യമിട്ട് ബജാജ് കൺസ്യൂമർ കെയർ ലിമിറ്റഡ്. തങ്ങളുടെ പ്രധാന ഉൽപ്പന്നമായ ആൽമണ്ട് ഡ്രോപ്സ് ഹെയർ ഓയിലിന് പുറമെ, മറ്റ് ‘ഗ്രോത്ത് പോർട്ട്ഫോളിയോ’ ഉൽപ്പന്നങ്ങളായ വെളിച്ചെണ്ണ, ഹെന്ന, ഗുലാബ് ജൽ, അംല ഓയിൽ തുടങ്ങിയവയിലൂടെ നിലവിൽ 225 കോടി രൂപയുടെ വാർഷിക വരുമാനമാണ് കമ്പനിക്കുള്ളത്.
അസംസ്കൃത വസ്തുക്കളുടെ വിലക്കയറ്റം വെല്ലുവിളിയാണെങ്കിലും, ബഞ്ചാരാസ് (Banjara’s), നേറ്റീവ് സോൾ തുടങ്ങിയ ബ്രാൻഡുകളിൽ ശ്രദ്ധ കേന്ദ്രീകരിച്ച് വിപണി വിപുലീകരിക്കാനാണ് കമ്പനിയുടെ തീരുമാനം. മാർച്ചിൽ അവസാനിച്ച സാമ്പത്തിക പാദത്തിൽ കമ്പനിയുടെ അറ്റാദായം ഇരട്ടിയിലധികം വർധിച്ച് 63.6 കോടി രൂപയിലെത്തിയതായി ഇൻവെസ്റ്റർ കോളിൽ മാനേജിംഗ് ഡയറക്ടർ നവീൻ പാണ്ഡെ വ്യക്തമാക്കി. ചെലവ് നിയന്ത്രിക്കുന്നതിനൊപ്പം ഉൽപ്പന്നങ്ങളുടെ വിലയിൽ ചെറിയ മാറ്റങ്ങൾ വരുത്തിയും ദക്ഷിണേന്ത്യൻ വിപണിയിൽ കൂടുതൽ സ്വാധീനമുണ്ടാക്കിയും 500 കോടി ലക്ഷ്യം കൈവരിക്കാനാണ് ബജാജ് കൺസ്യൂമർ കെയർ ഒരുങ്ങുന്നത്.
