പ്രമുഖ വ്യവസായി ലക്ഷ്മി എൻ. മിത്തലിന്റെ കുടുംബവും സെറം ഇൻസ്റ്റിറ്റ്യൂട്ട് സിഇഒ അദാർ പൂനവാലയും ചേർന്ന് ഐപിഎൽ ടീമായ രാജസ്ഥാൻ റോയൽസിന്റെ ഭൂരിഭാഗം ഓഹരികളും സ്വന്തമാക്കി. ഏകദേശം 1.65 ബില്യൺ ഡോളർ മൂല്യം കണക്കാക്കുന്ന ഈ കരാറിലൂടെ ടീമിന്റെ 75 ശതമാനം ഓഹരികൾ മിത്തൽ കുടുംബത്തിനും 18 ശതമാനം അദാർ പൂനവാലയ്ക്കും ലഭിക്കും. മുൻപ് റോയൽ ചലഞ്ചേഴ്സ് ബെംഗളൂരുവിനെ സ്വന്തമാക്കാൻ ശ്രമിച്ചെങ്കിലും പരാജയപ്പെട്ട മിത്തൽ കുടുംബത്തിന്, മൂന്നാം വട്ടത്തെ ശ്രമത്തിലാണ് ഐപിഎൽ ടീമിനെ സ്വന്തമാക്കാൻ സാധിച്ചത്.
ആർസെലർ മിത്തൽ സിഇഒ ആദിത്യ മിത്തലായിരിക്കും കുടുംബത്തിന് വേണ്ടി ടീമിന്റെ നേതൃസ്ഥാനം ഏറ്റെടുക്കുക. നിലവിലെ ഉടമയായ മനോജ് ബദാലെയും മറ്റ് നിക്ഷേപകരും തങ്ങളുടെ പക്കലുള്ള ഭൂരിഭാഗം ഓഹരികളും വിറ്റഴിച്ചെങ്കിലും, ബാക്കിയുള്ള 7 ശതമാനം ഓഹരികൾ കൈവശം വയ്ക്കുകയും ഭരണസമിതിയിൽ തുടരുകയും ചെയ്യും. ഐപിഎൽ ടീമിന് പുറമെ ദക്ഷിണാഫ്രിക്കയിലെ പാർൾ റോയൽസ്, കരീബിയനിലെ ബാർബഡോസ് റോയൽസ് എന്നീ ടീമുകളും ഈ വമ്പൻ കരാറിന്റെ ഭാഗമാണ്.
രണ്ട് മാസത്തിനിടെ നടക്കുന്ന രണ്ടാമത്തെ വലിയ ഐപിഎൽ ടീം വിൽപനയാണിത്. ഇന്ത്യൻ കായിക രംഗം വലിയ നിക്ഷേപങ്ങൾ ആകർഷിക്കുന്ന സുസ്ഥിര വിപണിയായി മാറുന്നതിന്റെ സൂചനയാണിതെന്ന് സാമ്പത്തിക വിദഗ്ധർ വിലയിരുത്തുന്നു. ബിസിസിഐയുടെയും മറ്റ് നിയന്ത്രണ ഏജൻസികളുടെയും അംഗീകാരം ലഭിക്കുന്നതോടെ 2026 ജൂലൈ-സെപ്റ്റംബർ പാദത്തിൽ ഏറ്റെടുക്കൽ നടപടികൾ പൂർത്തിയാകും. നിലവിലെ ഐപിഎൽ സീസണിൽ മികച്ച പ്രകടനം നടത്തുന്ന രാജസ്ഥാൻ റോയൽസ്, പോയിന്റ് പട്ടികയിൽ നാലാം സ്ഥാനത്താണ്.
The Mittal family and Adar Poonawalla have secured a majority stake in Rajasthan Royals. The $1.65 billion deal includes global franchises in SA20 and CPL. Learn more about the IPL’s latest major ownership shift.
