തന്ത്രപ്രധാനമായ ഹോർമുസ് കടലിടുക്കിലെ തടസ്സങ്ങൾ നീക്കി എണ്ണ വിതരണം പുനഃസ്ഥാപിക്കാൻ ലക്ഷ്യമിട്ടുള്ള ബൃഹത്തായ സൈനിക നീക്കം പ്രഖ്യാപിച്ച് ഡൊണാൾഡ് ട്രംപ്. പ്രോജക്ട് ഫ്രീഡം’ എന്നാണ് സൈനിക നടപടിക്ക് പേരിട്ടിരിക്കുന്നത്. ലോകത്തിലെ ഏറ്റവും വലിയ എണ്ണക്കടത്തു പാതകളിലൊന്നായ ഹോർമുസ് കടലിടുക്ക് മാസങ്ങളായി സംഘർഷത്തെത്തുടർന്ന് ഭാഗികമായി അടഞ്ഞുകിടക്കുകയാണ്. ഇത് തുറക്കാനായി യുദ്ധക്കപ്പലുകളും വിമാനങ്ങളും ഉൾപ്പെടെയുള്ള വൻ സൈനിക സന്നാഹത്തെയാണ് ട്രംപ് വിന്യസിച്ചിരിക്കുന്നത്.
തിരിച്ചടിച്ച് ഇറാൻ
അമേരിക്കയുടെ സൈനിക ഇടപെടലിന് പിന്നാലെ ഇറാൻ കടുത്ത തിരിച്ചടി ആരംഭിച്ചു. ഹോർമുസ് കടലിടുക്കിലൂടെ സഞ്ചരിച്ചിരുന്ന ചരക്കു കപ്പലുകൾക്ക് നേരെ ഇറാൻ സൈന്യം ആക്രമണം നടത്തി. കൂടാതെ, യുഎഇ-യിലെ ഫുജൈറയിലുള്ള ഒരു പ്രധാന എണ്ണ തുറമുഖത്തിന് നേരെയും ഇറാൻ മിസൈൽ ആക്രമണം നടത്തിയതായാണ് റിപ്പോർട്ട്. ആക്രമണത്തെത്തുടർന്ന് യുഎഇ തുറമുഖത്ത് വൻ തീപിടുത്തമുണ്ടാവുകയും ഗൾഫ് മേഖലയിലാകെ പരിഭ്രാന്തി പടരുകയും ചെയ്തതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.
പ്രോജക്ട് ഫ്രീഡം: ലക്ഷ്യവും ആശങ്കയും
നിലവിൽ ഹോർമുസ് കടലിടുക്കിൽ കുടുങ്ങിക്കിടക്കുന്ന നൂറുകണക്കിന് വാണിജ്യ കപ്പലുകൾക്ക് സുരക്ഷിതമായ പാതയൊരുക്കുകയാണ് പ്രോജക്ട് ഫ്രീഡത്തിന്റെ പ്രധാന ലക്ഷ്യം.
വിദേശ സൈനിക സാന്നിധ്യം അനുവദിക്കില്ലെന്ന് പ്രഖ്യാപിച്ച ഇറാൻ, ഡ്രോണുകളും മിസൈലുകളും ഉപയോഗിച്ച് തങ്ങളുടെ പ്രത്യാക്രമണ പരിധി വർദ്ധിപ്പിച്ചിട്ടുണ്ട്. യുഎഇ തീരങ്ങളിൽ വരെ ഇറാന്റെ മിസൈൽ സാന്നിധ്യം പ്രകടമായതോടെ ഇത് ഒരു വൻ പ്രാദേശിക യുദ്ധത്തിലേക്ക് പടരുമെന്ന ആശങ്കയിലാണ് ലോകരാജ്യങ്ങൾ.
അമേരിക്കൻ സൈനിക സംരക്ഷണത്തിൽ ചില കപ്പലുകൾ കടലിടുക്ക് കടന്നെങ്കിലും, ഇൻഷുറൻസ് കമ്പനികളും കപ്പൽ ഉടമകളും ഈ മേഖലയിലൂടെ യാത്ര തുടരാൻ ഇപ്പോഴും മടിച്ചുനിൽക്കുകയാണ്. വരും ദിവസങ്ങളിൽ എണ്ണവില കുതിച്ചുയരാനും ആഗോള വിപണിയിൽ കടുത്ത പ്രതിസന്ധിയുണ്ടാകാനും ഈ സാഹചര്യം കാരണമായേക്കാം.
Tensions escalate as Donald Trump launches ‘Project Freedom’ to reopen the Strait of Hormuz. Iran retaliates with missile strikes on UAE’s Fujairah port and merchant ships, sparking global oil market fears. Get the latest updates on this developing military conflict
