കൊച്ചി മെട്രോയുടെ രണ്ടാം ഘട്ടമായ ജവഹർലാൽ നെഹ്റു സ്റ്റേഡിയം – കാക്കനാട് ഇൻഫോപാർക്ക് (പിങ്ക് ലൈൻ) പാതയുടെ നിർമ്മാണം പൂർത്തിയാകാൻ വൈകും. നേരത്തെ നിശ്ചയിച്ചിരുന്നതിലും ഒരു വർഷം വൈകി 2027 ഏപ്രിലിൽ മാത്രമേ ഈ പാതയിൽ സർവീസ് ആരംഭിക്കാൻ കഴിയൂ എന്ന് കൊച്ചി മെട്രോ റെയിൽ ലിമിറ്റഡ് അറിയിച്ചു. രണ്ട് ഘട്ടങ്ങളായി പാത തുറക്കാനായിരുന്നു ആദ്യ ആലോചനയെങ്കിലും, ഇപ്പോൾ 11.2 കിലോമീറ്റർ ദൂരവും ഒറ്റയടിക്ക് കമ്മീഷൻ ചെയ്യാനാണ് പുതിയ തീരുമാനം. സാമ്പത്തിക പ്രതിസന്ധിയും വിദേശ വായ്പ ലഭിക്കാൻ വൈകിയതുമാണ് നിർമ്മാണത്തെ ബാധിച്ചത്.
ഏഷ്യൻ ഇൻഫ്രാസ്ട്രക്ചർ ഇൻവെസ്റ്റ്മെന്റ് ബാങ്കിൽ (AIIB) നിന്നുള്ള 1,016.24 കോടി രൂപയുടെ വായ്പയ്ക്ക് സംസ്ഥാന സർക്കാർ ഈ വർഷം ഫെബ്രുവരിയിൽ മാത്രമാണ് അന്തിമ അനുമതി നൽകിയത്. ഇത് സിവിൽ ജോലികളുടെ വേഗത കുറയ്ക്കാൻ കാരണമായി. മെയ് പകുതിയോടെ വായ്പയുടെ ആദ്യ ഗഡു ലഭിക്കുമെന്നാണ് അധികൃതർ പ്രതീക്ഷിക്കുന്നത്. ഇതോടെ നിർമ്മാണ പ്രവർത്തനങ്ങൾ വേഗത്തിലാക്കി 2026 ഡിസംബറോടെ സിവിൽ, ഇലക്ട്രിക്കൽ ജോലികൾ പൂർത്തിയാക്കും. തുടർന്ന് സിഗ്നലിംഗ് പരിശോധനകൾക്കും സുരക്ഷാ അനുമതികൾക്കും ശേഷം 2027 ഏപ്രിലിൽ വാണിജ്യ സർവീസുകൾ ആരംഭിക്കും.
ജെ.എൽ.എൻ സ്റ്റേഡിയം മുതൽ ഇൻഫോപാർക്ക് വരെ 11 സ്റ്റേഷനുകളാണ് പിങ്ക് ലൈനിലുണ്ടാവുക. ഐടി ജീവനക്കാർക്കും കാക്കനാട് ഭാഗത്തെ സർക്കാർ ഓഫീസുകളിൽ എത്തുന്നവർക്കും ഏറെ പ്രയോജനപ്പെടുന്നതാണ് ഈ പാത. നിലവിൽ പൈലിംഗ് ജോലികൾ 85 ശതമാനത്തോളം പൂർത്തിയായിട്ടുണ്ട്. പാലാരിവട്ടം കുരിശുപള്ളിക്ക് സമീപം നിലവിലുള്ള മെട്രോ പാതയ്ക്ക് മുകളിലൂടെ പിങ്ക് ലൈനിന്റെ ട്രാക്ക് കടന്നുപോകുന്ന രീതിയിലാണ് ഇതിന്റെ രൂപകൽപ്പന. ഈ ഘട്ടം പൂർത്തിയാകുന്നതോടെ ഇൻഫോപാർക്കിലെ എഴുപതിനായിരത്തിലധികം ജീവനക്കാർക്കും സ്മാർട്ട് സിറ്റിയിലെ തൊഴിലാളികൾക്കും നഗരഹൃദയത്തിലേക്ക് അതിവേഗം എത്തിച്ചേരാനാകും.
The Kochi Metro Pink Line (JLN Stadium to InfoPark) is delayed by a year. KMRL confirms the 11.2 km stretch will now be commissioned in April 2027 due to loan processing delays
