യുണൈറ്റഡ് അറബ് എമിറേറ്റ്സ് സന്ദർശനം പൂർത്തിയാക്കിയ പ്രധാനമന്ത്രി നരേന്ദ്ര മോദി ദ്വിദിന ഔദ്യോഗിക സന്ദർശനത്തിനായി നെതർലാൻഡ്സിൽ എത്തിച്ചേർന്നു. ആംസ്റ്റർഡാമിൽ വിമാനമിറങ്ങിയ പ്രധാനമന്ത്രിക്ക് നെതർലാൻഡ്സ് ഗവൺമെന്റിലെയും നാവികസേനയിലെയും ഉന്നത ഉദ്യോഗസ്ഥരും ഇന്ത്യൻ അംബാസഡർ കുമാർ തുഹിനും ചേർന്ന് ഊഷ്മളമായ സ്വീകരണമാണ് നൽകിയത്. 2017-ന് ശേഷം നെതർലാൻഡ്സിലേക്കുള്ള പ്രധാനമന്ത്രിയുടെ രണ്ടാമത്തെ സന്ദർശനമാണിത്. ഇന്ത്യ-യൂറോപ്യൻ യൂണിയൻ സ്വതന്ത്ര വ്യാപാര കരാറിന്റെ പശ്ചാത്തലത്തിൽ ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം കൂടുതൽ ശക്തമാക്കാൻ ഈ സന്ദർശനം വഴിയൊരുക്കുമെന്ന് അദ്ദേഹം വ്യക്തമാക്കി.
നെതർലാൻഡ്സ് പ്രധാനമന്ത്രി റോബ് ജെറ്റനുമായി നടത്തുന്ന ഉന്നതതല ചർച്ചകളാണ് ഈ സന്ദർശനത്തിലെ പ്രധാന അജണ്ട. സെമികണ്ടക്ടറുകൾ, വാട്ടർ മാനേജ്മെന്റ്, ക്ലീൻ എനെർജി, കൃഷി, ആരോഗ്യരംഗം തുടങ്ങിയ തന്ത്രപ്രധാന മേഖലകളിലെ സഹകരണം വിപുലീകരിക്കുന്ന കാര്യങ്ങൾ ഇരുനേതാക്കളും ചർച്ച ചെയ്യും. യൂറോപ്പിലെ ഇന്ത്യയുടെ ഏറ്റവും വലിയ നാലാമത്തെ നിക്ഷേപക രാജ്യമായ നെതർലാൻഡ്സുമായുള്ള വ്യാപാര-നിക്ഷേപ പങ്കാളിത്തം പുതിയ തലങ്ങളിലേക്ക് എത്തിക്കുകയാണ് ചർച്ചകളുടെ പ്രധാന ലക്ഷ്യം.
യൂറോപ്യൻ ഭൂഖണ്ഡത്തിലെ ഏറ്റവും വലിയ ഇന്ത്യൻ സമൂഹങ്ങളിലൊന്നായ നെതർലാൻഡ്സിലെ പ്രവാസികളുമായുള്ള കൂടിക്കാഴ്ചയും പ്രധാനമന്ത്രിയുടെ സന്ദർശനത്തിന്റെ പ്രധാന ഭാഗമാണ്. ആംസ്റ്റർഡാമിലെ പ്രവാസി മലയാളി സംഘടനകളും ഇന്ത്യൻ സമൂഹവും ചേർന്ന് ഗർബ ഉൾപ്പെടെയുള്ള പരമ്പരാഗത കലാപരിപാടികളോടെയാണ് അദ്ദേഹത്തെ വരവേറ്റത്. ഉഭയകക്ഷി ചർച്ചകൾക്ക് പുറമെ, പ്രവാസി സമൂഹത്തെ അഭിസംബോധന ചെയ്ത് പ്രധാനമന്ത്രി സംസാരിക്കും.
PM Narendra Modi arrives in the Netherlands for high-level bilateral talks focusing on crucial partnerships in semiconductors, clean energy, and trade.
