ഇന്ത്യയുടെ സമുദ്ര-ഷിപ്പിംഗ് മേഖലയെ കൂടുതൽ ഡിജിറ്റലൈസ് ചെയ്യുന്നതിന്റെ ഭാഗമായി പ്രമുഖ ഡീപ്ടെക് പ്ലാറ്റ്ഫോമായ മാരിടെക് ഇന്റഗ്രേറ്റഡ് മാരിടൈമിൽ 5 ശതമാനം ഓഹരി നിക്ഷേപം നടത്താൻ കൊച്ചിൻ ഷിപ്പ്യാർഡ് കരാറൊപ്പിട്ടു. സമുദ്രമേഖലയിലെ വളർന്നുവരുന്ന അത്യാധുനിക സാങ്കേതികവിദ്യകളെ പ്രോത്സാഹിപ്പിക്കുന്നതിനായി കൊച്ചിൻ ഷിപ്പ്യാർഡ് രൂപീകരിച്ച 50 കോടി രൂപയുടെ USHUS സ്റ്റാർട്ടപ്പ് ഫണ്ടിൽ നിന്നാണ് ഈ തുക അനുവദിക്കുന്നത്.
ഐഐടി മദ്രാസ്, ഐഐഎം കോഴിക്കോട് ലൈവ് (IIMK LIVE) എന്നിവയുമായി സഹകരിച്ച് നടപ്പിലാക്കുന്ന ഈ പദ്ധതി കേന്ദ്ര ഗവൺമെന്റിന്റെ വിദേശാശ്രയത്വം കുറയ്ക്കൽ, സ്റ്റാർട്ടപ്പ് പ്രോത്സാഹനം എന്നിവയ്ക്ക് അനുസൃതമായാണ് വിഭാവനം ചെയ്തിട്ടുള്ളത്. കപ്പൽ ഗതാഗതം, ലോജിസ്റ്റിക്സ്, തുറമുഖ സേവനങ്ങൾ എന്നിവയെ ഡിജിറ്റലായി പരസ്പരം ബന്ധിപ്പിക്കുന്ന ‘ഇന്റഗ്രേറ്റഡ് മാരിടൈം എക്സ്ചേഞ്ച്’ (IME) എന്ന നൂതന പ്ലാറ്റ്ഫോം വികസിപ്പിച്ചെടുത്തത് മാരിടെക് കമ്പനിയാണ്. സമുദ്ര വാണിജ്യ മേഖലയിൽ സുതാര്യതയും പ്രവർത്തനക്ഷമതയും കൊണ്ടുവരാൻ ശേഷിയുള്ള ഈ ഡിജിറ്റൽ വിപണി, ഇന്ത്യയുടെ കപ്പൽ ഗതാഗത രംഗത്തെ ഡിജിറ്റൽ വൽക്കരണത്തിന് വേഗത നൽകുമെന്ന് കൊച്ചിൻ ഷിപ്പ്യാർഡ് വ്യക്തമാക്കി.
Cochin Shipyard Limited (CSL) signs an agreement to acquire a 5% stake in deeptech startup Maritech under its USHUS startup framework to boost maritime digitization.
