ശ്രീലങ്കയുടെ രണ്ടാമത്തെ കയറ്റുമതി വിപണിയായി ഇന്ത്യ

അയൽരാജ്യങ്ങളായ ഇന്ത്യയും ശ്രീലങ്കയും തമ്മിലുള്ള ഉഭയകക്ഷി വ്യാപാര ബന്ധത്തിൽ നിർണായക മുന്നേറ്റം. ഈ വർഷത്തെ ആദ്യ നാല് മാസത്തെ (ജനുവരി – ഏപ്രിൽ) കണക്കുകൾ പ്രകാരം ബ്രിട്ടനെ  മറികടന്ന് ശ്രീലങ്കയുടെ ഏറ്റവും വലിയ രണ്ടാമത്തെ കയറ്റുമതി വിപണിയായി ഇന്ത്യ മാറി. ശ്രീലങ്കൻ എക്‌സ്‌പോർട്ട് ഡെവലപ്‌മെന്റ് ബോർഡ് (പുറത്തുവിട്ട ഏറ്റവും പുതിയ ഔദ്യോഗിക കണക്കുകളിലാണ് ഈ വിവരം വ്യക്തമാക്കുന്നത്. നിലവിൽ അമേരിക്കയാണ്  ശ്രീലങ്കയുടെ ഏറ്റവും വലിയ കയറ്റുമതി പങ്കാളി.

ഇന്ത്യയിലേക്കുള്ള കയറ്റുമതിയിൽ വൻ വർദ്ധന
റിപ്പോർട്ടുകൾ പ്രകാരം, 2026 ജനുവരി മുതൽ ഏപ്രിൽ വരെയുള്ള കാലയളവിൽ ശ്രീലങ്കയിൽ നിന്ന് ഇന്ത്യയിലേക്കുള്ള കയറ്റുമതിയിൽ 8.9 ശതമാനത്തിന്റെ വളർച്ചയാണുണ്ടായത്. ഈ നാല് മാസത്തിനുള്ളിൽ 364.15 മില്യൺ യുഎസ് ഡോളറിന്റെ ഉൽപ്പന്നങ്ങളാണ് ലങ്ക ഇന്ത്യയിലേക്ക് കയറ്റി അയച്ചത്. ഇതോടെയാണ് വർഷങ്ങളായി രണ്ടാം സ്ഥാനത്തുണ്ടായിരുന്ന യുകെയെ പിന്നിലാക്കാൻ ഇന്ത്യയ്ക്ക് സാധിച്ചത്. അതേസമയം യുകെയിലേക്കുള്ള ശ്രീലങ്കയുടെ കയറ്റുമതിയിൽ ഈ കാലയളവിൽ 16.08 ശതമാനത്തിന്റെ ഇടിവ് രേഖപ്പെടുത്തി.

ശ്രീലങ്കയുടെ സാമ്പത്തിക വീണ്ടെടുക്കലിന് കരുത്തായി കയറ്റുമതി
കടുത്ത സാമ്പത്തിക പ്രതിസന്ധികളിൽ നിന്ന് കരകയറുന്ന ശ്രീലങ്കയ്ക്ക് കയറ്റുമതി മേഖലയിലെ ഈ വളർച്ച വലിയ ആശ്വാസമാണ് നൽകുന്നത്. ഏപ്രിൽ മാസത്തിൽ മാത്രം ശ്രീലങ്കയുടെ ആകെ കയറ്റുമതി (ഉൽപ്പന്നങ്ങളും സേവനങ്ങളും ഉൾപ്പെടെ) 6 ശതമാനം വർധിച്ച് 1,380.93 മില്യൺ ഡോളറിലെത്തി. ഇതിൽ ഉൽപ്പന്ന കയറ്റുമതി (Merchandise exports) 1,063.77 മില്യൺ ഡോളറും, ഐടി ഉൾപ്പെടെയുള്ള സേവന മേഖലകളിൽ നിന്നുള്ള വരുമാനം (Services exports) 317.16 മില്യൺ ഡോളറുമാണ്. ജനുവരി-ഏപ്രിൽ മാസങ്ങളിലെ ആകെ കയറ്റുമതി 5,784.38 മില്യൺ ഡോളറാണ്. ഇത് മുൻവർഷത്തെ അപേക്ഷിച്ച് 4.3 ശതമാനം കൂടുതലാണ്.

പ്രധാന കയറ്റുമതി ഉൽപ്പന്നങ്ങൾ

തേങ്ങ അധിഷ്ഠിത ഉൽപ്പന്നങ്ങൾ:ഏപ്രിൽ മാസത്തിൽ തേങ്ങ അധിഷ്ഠിത ഉൽപ്പന്നങ്ങളുടെ കയറ്റുമതിയിൽ 23.49 ശതമാനത്തിന്റെ വൻ വർദ്ധനവുണ്ടായി. ഇതിൽ മൂല്യവർദ്ധിത ഉൽപ്പന്നമായ ‘ആക്ടിവേറ്റഡ് കാർബൺ’ കയറ്റുമതി 58.32 ശതമാനം ഉയർന്ന് 20.55 മില്യൺ ഡോളറിലെത്തി.
സേവന മേഖല: ഐടി , ബിസിനസ് പ്രോസസ് മാനേജ്‌മെന്റ് എന്നിവയിൽ നിന്നുള്ള കയറ്റുമതി വരുമാനം 146.09 മില്യൺ ഡോളറായി. സാമ്പത്തിക സേവന മേഖലയിലെ കയറ്റുമതി 119.41 ശതമാനം വർദ്ധിച്ച് 6.82 മില്യൺ ഡോളറിലെത്തി.

അതേസമയം, ശ്രീലങ്കയുടെ പരമ്പരാഗത കയറ്റുമതി ഉൽപ്പന്നമായ ചായയുടെ (Tea) കയറ്റുമതിയിൽ ഏപ്രിലിൽ 6.82 ശതമാനത്തിന്റെ കുറവുണ്ടായി. ഇറാഖ്, സൗദി അറേബ്യ, ലിബിയ, യുഎഇ തുടങ്ങിയ പശ്ചിമേഷ്യൻ രാജ്യങ്ങളിലേക്കുള്ള കയറ്റുമതിയിലുണ്ടായ ഇടിവാണ് ഇതിന് കാരണം.

ഭൂമിശാസ്ത്രപരമായ സാമീപ്യവും ഇന്ത്യയുടെ വളരുന്ന സമ്പദ്‌വ്യവസ്ഥയും ഉയർന്ന ഉപഭോക്തൃ ആവശ്യകതയുമാണ് ശ്രീലങ്കൻ കയറ്റുമതിക്കാർക്ക് ഇന്ത്യയിൽ വലിയ അവസരങ്ങൾ ഒരുക്കുന്നത്. ഇരുരാജ്യങ്ങളും തമ്മിലുള്ള വ്യാപാര തടസ്സങ്ങൾ കുറയ്ക്കാൻ നടത്തുന്ന ശ്രമങ്ങൾ വരും മാസങ്ങളിലും ഈ പങ്കാളിത്തം കൂടുതൽ ശക്തമാക്കുമെന്നാണ് സാമ്പത്തിക വിദഗ്ദ്ധരുടെ വിലയിരുത്തൽ.

India surpasses the UK to become Sri Lanka’s second-largest export destination, recording an 8.9% growth in imports from the island nation between January and April 2026.