ചരിത്രത്തിലെ ഏറ്റവും വലിയ ഐപിഒയുമായി ഇലോൺ മസ്കിൻ്റെ സ്പേസ് എക്സ് (SpaceX) യുഎസ് ഓഹരി വിപണിയായ നാസ്ഡാകിൽ (NASDAQ) അരങ്ങേറ്റം കുറിക്കുകയാണ്. 1.77 ട്രില്യൺ ഡോളർ മൂല്യം പ്രതീക്ഷിക്കുന്ന ഈ ഐപിഒ വഴി 75 ബില്യൺ ഡോളർ സമാഹരിക്കാനാണ് കമ്പനി ലക്ഷ്യമിടുന്നത്. ആഗോള ശ്രദ്ധയാകർഷിച്ച ഈ ഓഹരികൾ റിസർവ് ബാങ്കിൻ്റെ ലിബറലൈസ്ഡ് റെമിറ്റൻസ് സ്കീം (LRS) വഴി ഇന്ത്യൻ നിക്ഷേപകർക്കും യുഎസ് ബ്രോക്കർമാർ മുഖേന സ്വന്തമാക്കാവുന്നതാണ്.
ഈ പദ്ധതിയിലൂടെ ഒരു വ്യക്തിക്ക് ഒരു സാമ്പത്തിക വർഷം പരമാവധി 2,50,000 ഡോളർ (ഏകദേശം 2.4 കോടി രൂപ) വരെ മാത്രമേ വിദേശത്തേക്ക് നിക്ഷേപത്തിനായി അയക്കാൻ സാധിക്കൂ. പാൻ കാർഡ്, പാസ്പോർട്ട്, ഇന്ത്യൻ ബാങ്ക് അക്കൗണ്ട് എന്നിവയുള്ള ഇന്ത്യയിലെ സ്ഥിരതാമസക്കാരായ നിക്ഷേപകർക്ക് അന്താരാഷ്ട്ര ഇൻവെസ്റ്റ്മെന്റ് പ്ലാറ്റ്ഫോമുകൾ വഴി ഓഹരികൾ ട്രേഡിംഗ് ആരംഭിച്ചയുടൻ വാങ്ങാൻ സാധിക്കും.
എന്നാൽ, സ്പേസ് എക്സിൻ്റെ ഉയർന്ന മൂല്യനിർണ്ണയം വലിയ വിപണി സാധ്യതകൾക്കൊപ്പം തന്നെ വലിയ റിസ്കും സമ്മാനിക്കുമെന്നതിനാൽ ഇന്ത്യൻ നിക്ഷേപകർ അതീവ ജാഗ്രത പാലിക്കണമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു. കമ്പനിയുടെ പ്രധാന മൂന്ന് വിഭാഗങ്ങളിൽ സ്റ്റാർലിങ്ക് മാത്രമാണ് നിലവിൽ ലാഭത്തിലുള്ളതെന്നും, സ്പേസ് ലോഞ്ചും എഐ വിഭാഗവും ഇപ്പോഴും നഷ്ടത്തിലാണെന്നും വിദഗ്ധർ ചൂണ്ടിക്കാണിക്കുന്നു. ആവേശം കൊണ്ട് മാത്രം പണം മുടക്കാതെ, കമ്പനിയുടെ പ്രവർത്തനങ്ങളെയും റിസ്കുകളെയും കൃത്യമായി മനസ്സിലാക്കിയ ശേഷം മാത്രമേ നിക്ഷേപം നടത്താവൂ എന്നും, ഭാവിയിൽ മികച്ച ഡിസ്കൗണ്ടിൽ ഓഹരികൾ ലഭ്യമാകുമ്പോൾ വാങ്ങുന്നതായിരിക്കും കൂടുതൽ സുരക്ഷിതമെന്നും വിപണി നിരീക്ഷകർ വ്യക്തമാക്കുന്നു.
അതേസമയം, നാസ്ഡാക് ലിസ്റ്റിംഗിന് മുന്നോടിയായി കമ്പനിയുടെ പ്രധാന ഓഹരി പങ്കാളിത്ത വിവരങ്ങളും സ്പേസ് എക്സ് പുറത്തുവിട്ടിട്ടുണ്ട്. ഈ ഐപിഒ വഴി ഇലോൺ മസ്കിന്റെ വ്യക്തിഗത ആസ്തി 275 ബില്യൺ ഡോളർ വർധിച്ച് 970 ബില്യൺ ഡോളറിലെത്തുമെന്നാണ് ബ്ലൂംബെർഗ് ശതകോടീശ്വര സൂചിക വ്യക്തമാക്കുന്നത്. ഇതോടെ ലോകത്തിലെ ആദ്യത്തെ ട്രില്യണെയർ എന്ന പദവിക്ക് തൊട്ടരികിലാണ് മസ്ക്.
കമ്പനിയിൽ 6.42 ബില്യൺ ഓഹരികളുള്ള മസ്കിന് 85.1 ശതമാനം വോട്ടിംഗ് അധികാരമുണ്ട്. മസ്കിന് പുറമെ, സ്പേസ് എക്സ് ഡയറക്ടറും വാലർ ഇക്വിറ്റി പാർട്ണേഴ്സ് സ്ഥാപകനുമായ അന്റോണിയോ ഗ്രേഷ്യസ് (67.96 ബില്യൺ ഡോളർ മൂല്യമുള്ള ഓഹരികൾ), ബോർഡ് അംഗമായ ലൂക്ക് നോസെക് (4.45 ബില്യൺ ഡോളർ മൂല്യമുള്ള ഓഹരികൾ) എന്നിവരാണ് കമ്പനിയിലെ മറ്റ് പ്രധാന ഓഹരി ഉടമകൾ.
SpaceX is heading for a historic NASDAQ IPO with a $1.77 trillion valuation. Learn how Indian investors can buy SpaceX shares via the RBI LRS scheme and how Elon Musk is close to becoming the first trillionaire
