ബെംഗളൂരു ആസ്ഥാനമായി പ്രവർത്തിക്കുന്ന AI സ്റ്റാർട്ടപ്പായ ‘സർവം എഐ’ (Sarvam AI), 234 മില്യൺ ഡോളർ സമാഹരിച്ച് ഇന്ത്യയിലെ ഏറ്റവും പുതിയ ‘യൂണികോൺ’ പദവി സ്വന്തമാക്കി. പ്രമുഖ ഐടി കമ്പനിയായ എച്ച്സിഎൽ ടെക്കിന്റെ നേതൃത്വത്തിൽ നടന്ന സീരീസ് ബി ഫണ്ടിംഗിലൂടെ കമ്പനിയുടെ ആകെ മൂല്യം 1.5 ബില്യൺ ഡോളറായി ഉയർന്നു. വിവേക് രാഘവൻ, പ്രത്യുഷ് കുമാർ എന്നിവർ ചേർന്ന് 2023-ൽ സ്ഥാപിച്ച ഈ കമ്പനി ഇന്ത്യൻ ഭാഷകൾക്ക് അനുയോജ്യമായ ലാർജ് ലാംഗ്വേജ് മോഡലുകളും വോയ്സ് സാങ്കേതികവിദ്യകളുമാണ് വികസിപ്പിക്കുന്നത്.
കേന്ദ്ര കൃഷി മന്ത്രാലയത്തിന് വേണ്ടി 1.7 കോടി കർഷകരുടെ വിവരങ്ങൾ ശേഖരിച്ച കമ്പനിയുടെ വോയ്സ് ഏജന്റുകൾ നിലവിൽ പ്രതിദിനം 20 ലക്ഷത്തിലധികം സംഭാഷണങ്ങളാണ് കൈകാര്യം ചെയ്യുന്നത്. ഇന്ത്യയിൽ തന്നെ പൂർണ്ണമായി പരിശീലിപ്പിച്ചെടുത്ത ‘Sarvam 105B’, ‘Sarvam 30B’ എന്നീ രണ്ട് പ്രമുഖ മോഡലുകൾ കമ്പനി അടുത്തിടെ പുറത്തിറക്കിയിരുന്നു. പുതുതായി ലഭിച്ച ഈ മൂലധനം കോഡിംഗ്, സൈബർ സുരക്ഷ എന്നിവയ്ക്ക് പ്രാധാന്യം നൽകുന്ന അത്യാധുനിക എഐ മോഡലുകൾ വികസിപ്പിക്കുന്നതിനായി വിനിയോഗിക്കാനാണ് കമ്പനി ലക്ഷ്യമിടുന്നത്.
Sarvam AI, creator of the Sarvam 105B and Sarvam 30B models trained entirely in India, plans to use its latest funding to develop advanced AI models focused on coding and cybersecurity
