പ്രമുഖ ആഡംബര കാർ നിർമാതാക്കളായ ബിഎംഡബ്ല്യു (BMW) ഈ വർഷം ഇന്ത്യയിൽ 27 പുതിയ ഉൽപ്പന്നങ്ങൾ പുറത്തിറക്കാൻ ഒരുങ്ങുന്നു. രാജ്യത്തെ ഏറ്റവും വലിയ ലക്ഷ്വറി കാർ നിർമാതാക്കളെന്ന പദവി സ്വന്തമാക്കുക എന്ന ലക്ഷ്യത്തോടെയാണ് കമ്പനി ഈ വൻ പദ്ധതിക്ക് രൂപം നൽകിയിരിക്കുന്നത്. ഇതിൽ 10 പ്രധാന മോഡലുകളും 17 പ്രത്യേക എഡിഷനുകളും പുതിയ വകഭേദങ്ങളും ഉൾപ്പെടുന്നു.
ഈ വർഷത്തിന്റെ ആദ്യ പാദത്തിൽ കമ്പനിയുടെ വിൽപ്പനയിൽ 17 ശതമാനം വളർച്ച രേഖപ്പെടുത്തിയിട്ടുണ്ട്. രണ്ട് തവണ വില വർദ്ധിപ്പിച്ചിട്ടും ബിഎംഡബ്ല്യു കാറുകളുടെ ആവശ്യകതയിൽ യാതൊരു കുറവും വന്നിട്ടില്ലെന്ന് ബിഎംഡബ്ല്യു ഗ്രൂപ്പ് ഇന്ത്യ പ്രസിഡന്റും സിഇഒയുമായ ഹർദീപ് സിംഗ് ബ്രാർ വ്യക്തമാക്കി. നിലവിൽ വിപണിയിലെ പ്രധാന എതിരാളികളായ മെഴ്സിഡസ് ബെൻസിനേക്കാൾ മുന്നിലാണ് ബിഎംഡബ്ല്യു.
ബിഎംഡബ്ല്യുവിന്റെ പ്രീമിയം ചെറുകാർ ബ്രാൻഡായ ‘മിനി’ക്കും (MINI) മികച്ച വർഷമായിരിക്കും ഇതെന്ന് കമ്പനി പ്രതീക്ഷിക്കുന്നു. ഇന്ത്യയിൽ പ്രാദേശികമായി അസംബിൾ ചെയ്ത ‘മിനി കൺട്രിമാൻ സി’ (MINI Countryman C) 47.5 ലക്ഷം രൂപയ്ക്ക് കമ്പനി വിപണിയിൽ ഇറക്കിയിരുന്നു. കഴിഞ്ഞ വർഷം 730 യൂണിറ്റുകൾ വിറ്റഴിച്ച മിനി ബ്രാൻഡ് ഇത്തവണ ആദ്യമായി ആയിരത്തിലധികം യൂണിറ്റുകളുടെ വിൽപ്പന മറികടക്കുമെന്നാണ് കമ്പനിയുടെ കണക്കുകൂട്ടൽ.
ശൃംഖല വിപുലീകരിക്കുന്നതിന്റെ ഭാഗമായി ഇന്ത്യയിലുടനീളം പുതിയ പത്തിലധികം ബിഎംഡബ്ല്യു ടൗൺപോയിന്റുകളും മിനിയുടെ റീട്ടെയിൽ ശൃംഖല ഇരട്ടിയാക്കാനും കമ്പനി ലക്ഷ്യമിടുന്നു. എസ്യുവികൾക്ക് വിപണിയിൽ വലിയ ജനപ്രീതിയുണ്ടെങ്കിലും ആഡംബര കാർ വിപണിയിൽ മൂന്നിലൊന്ന് ഉപഭോക്താക്കളും ഇപ്പോഴും സെഡാൻ മോഡലുകളാണ് തിരഞ്ഞെടുക്കുന്നതെന്നും അദ്ദേഹം കൂട്ടിച്ചേർത്തു.
BMW Group India plans to launch 27 new models and variants this year to secure the top spot in the luxury car market, featuring 10 major cars and 17 special editions.
