ബെംഗളൂരു ആസ്ഥാനമായുള്ള സ്റ്റാർട്ടപ്പ് കമ്പനിയായ ‘സർല ഏവിയേഷൻ’ തങ്ങൾ വികസിപ്പിച്ച ‘സില’ (Sylla 1.0) എന്ന അത്യാധുനിക ഇലക്ട്രിക് വിമാനത്തിന്റെ പരീക്ഷണ പറക്കൽ വിജയകരമായി പൂർത്തിയാക്കി. ലംബമായി ഉയരാനും താഴാനും (eVTOL) ശേഷിയുള്ള ഈ സാങ്കേതികവിദ്യാ പ്രദർശന വിമാനം, കഴിഞ്ഞ ആറുമാസത്തിനിടെ 500-ലധികം തവണയായി 18 മണിക്കൂറിലധികം പറക്കൽ പരീക്ഷണം നടത്തിയാണ് ചരിത്രം കുറിച്ചത്. 700 കിലോഗ്രാം ഭാരവും 7.5 മീറ്റർ ചിറകളവുമുള്ള ‘സില’, ഇന്ത്യയിൽ ഇതുവരെ പറന്നുയർന്നിട്ടുള്ളതിൽ വെച്ച് ഏറ്റവും ഭാരമേറിയ ഇലക്ട്രിക് വിമാനമാണ്.
കേവലം 12 മാസത്തിനുള്ളിൽ രൂപകൽപ്പന ചെയ്ത് പറക്കൽ സജ്ജമാക്കിയ ഈ പദ്ധതിയിലൂടെ ഇലക്ട്രിക് വ്യോമയാന രംഗത്ത് നിരവധി ദേശീയ റെക്കോർഡുകളാണ് സ്വന്തമാക്കിയത്. ആഗോളതലത്തിൽ മുൻനിര ഇലക്ട്രിക് വിമാന കമ്പനികളിൽ പ്രവർത്തി പരിചയമുള്ള വിദഗ്ധരാണ് കുറഞ്ഞ ചെലവിൽ ചുരുങ്ങിയ കാലയളവിനുള്ളിൽ ഈ നേട്ടം കൈവരിച്ചതിന് പിന്നിൽ പ്രവർത്തിച്ചത്. വിജയകരമായ ഈ പരീക്ഷണത്തിൽ നിന്നും ലഭിച്ച വിവരങ്ങൾ ഉപയോഗിച്ച് ലംബമായി ഉയർന്ന് പിന്നീട് സാധാരണ വിമാനങ്ങളെപ്പോലെ പറക്കാൻ സാധിക്കുന്ന അടുത്ത തലമുറ വിമാനമായ ‘സില 2.0’ വികസിപ്പിക്കാനാണ് കമ്പനി ഇപ്പോൾ ലക്ഷ്യമിടുന്നത്. നഗരങ്ങളിലെ യാത്രാക്ലേശം പരിഹരിക്കാൻ ഭാവിയിൽ അവതരിപ്പിക്കുന്ന ‘ശൂന്യ’ (Shunya) എന്ന 6+1 സീറ്റർ എയർ ടാക്സിയുടെ നിർമ്മാണത്തിലേക്ക് സർല ഏവിയേഷനെ അടുപ്പിക്കുന്നതാണ് ഈ നിർണ്ണായക ചുവടുവെപ്പ്.E
Bengaluru startup Sarla Aviation successfully completes flight tests for ‘Sylla’, India’s heaviest electric eVTOL aircraft, paving the way for Shunya air taxis.
