ഇന്ത്യ തദ്ദേശീയമായി വികസിപ്പിക്കുന്ന 19 സീറ്റുള്ള ‘സരസ് എംകെ-II’ (Saras MK-II) വിമാനത്തിന്റെ നിർമ്മാണ പ്രവർത്തനങ്ങളിലേക്ക് രാജ്യം കടക്കുന്നു. നാഷണൽ ഏറോസ്പേസ് ലബോറട്ടറീസ് (NAL) ഈ വിമാനത്തിന്റെ രൂപകൽപ്പന പൂർത്തിയാക്കി മാതൃക നിർമ്മാണത്തിനുള്ള ഒരുക്കങ്ങൾ തുടങ്ങി. ഗ്രാമീണ മേഖലകളിലേക്കും ചെറിയ വിമാനത്താവളങ്ങളിലേക്കും സർവീസുകൾ വ്യാപിപ്പിക്കാൻ ലക്ഷ്യമിടുന്ന ഈ പദ്ധതി, ഇന്ത്യയുടെ വ്യോമയാന മേഖലയിലെ സുപ്രധാന കാൽവെപ്പാണ്. നിർമ്മാണത്തിനായി സാങ്കേതിക പങ്കാളികളെ കണ്ടെത്താനുള്ള ശ്രമങ്ങളും എൻ.എ.എൽ ഊർജിതമാക്കിയിട്ടുണ്ട്.
അത്യാധുനിക സൗകര്യങ്ങളോടെയാണ് സരസ് എംകെ-II വികസിപ്പിക്കുന്നത്. പ്രഷറൈസ്ഡ് ക്യാബിൻ, ഡിജിറ്റൽ ഏവിയോണിക്സ്, ഗ്ലാസ് കോക്ക്പിറ്റ്, ഓട്ടോപൈലറ്റ്, കമാൻഡ്-ബൈ-വയർ ഫ്ലൈറ്റ് കൺട്രോളുകൾ എന്നിവ ഈ വിമാനത്തിന്റെ സവിശേഷതകളാണ്. ഭാരവും ഡ്രാഗും കുറയ്ക്കുന്ന തരത്തിൽ രൂപകൽപ്പന ചെയ്തിരിക്കുന്ന ഈ വിമാനം, ഇന്ത്യയിലെ റീജിയണൽ കണക്റ്റിവിറ്റി വർധിപ്പിക്കുന്നതിലും ഹ്രസ്വദൂര യാത്രകളിൽ സ്വയംപര്യാപ്തത കൈവരിക്കുന്നതിലും വലിയ പങ്കുവഹിക്കും
National Aerospace Laboratories (NAL) completes the design for the 19-seater indigenous Saras MK-II aircraft, boosting regional connectivity in India.
