കൊച്ചിൻ ഷിപ്പ്യാർഡ് നിർമ്മിച്ച രണ്ടാമത്തെ ആന്റി-സബ്മറൈൻ യുദ്ധക്കപ്പൽ കമ്മീഷൻ ചെയ്തു. കർവാറിൽ നടന്ന ചടങ്ങിൽ എയർ ചീഫ് മാർഷൽ എ.പി. സിംഗ് കപ്പൽ നാവികസേനയ്ക്ക് സമർപ്പിച്ചു; 80 ശതമാനത്തിലധികം തദ്ദേശീയ സാങ്കേതികവിദ്യയോടെ കൊച്ചിൻ ഷിപ്പ്യാർഡിലാണ് കപ്പൽ നിർമ്മിച്ചത്.
ഇന്ത്യൻ നാവികസേനയ്ക്കായി കൊച്ചിൻ ഷിപ്പ്യാർഡ് ലിമിറ്റഡ് (CSL) തദ്ദേശീയമായി രൂപകൽപ്പന ചെയ്ത് നിർമ്മിച്ച ‘മഹേ ക്ലാസ്’ ആന്റി-സബ്മറൈൻ വാർഫെയർ ഷാലോ വാട്ടർ ക്രാഫ്റ്റ് (ASW-SWC) ശ്രേണിയിലെ രണ്ടാമത്തെ കപ്പലായ ‘ഐഎൻഎസ് മാൽവൻ’ (INS Malvan) കമ്മീഷൻ ചെയ്തു. കർവാറിൽ നടന്ന ചടങ്ങിൽ വ്യോമസേനാ മേധാവി എയർ ചീഫ് മാർഷൽ എ.പി. സിംഗ് കപ്പൽ നാവികസേനയ്ക്ക് സമർപ്പിച്ചു.
വെസ്റ്റേൺ നേവൽ കമാൻഡ് ഫ്ലാഗ് ഓഫീസർ കമാൻഡിംഗ്-ഇൻ-ചീഫ് വൈസ് അഡ്മിറൽ സഞ്ജയ് വത്സായൻ, കൊച്ചിൻ ഷിപ്പ്യാർഡ് പ്രതിനിധികൾ, മുതിർന്ന നാവികസേനാ ഉദ്യോഗസ്ഥർ, പൂർവ്വ സൈനികർ എന്നിവർ ചടങ്ങിൽ പങ്കെടുത്തു.
ചരിത്രപരമായ പ്രാധാന്യവും പാരമ്പര്യവും
മഹാരാഷ്ട്രയിലെ ചരിത്രപ്രസിദ്ധമായ തീരദേശ നഗരമായ ‘മാൽവന്റെ’ പേരാണ് ഈ കപ്പലിന് നൽകിയിരിക്കുന്നത്. ഛത്രപതി ശിവാജി മഹാരാജിന്റെ പ്രതാപപൂർണ്ണമായ സമുദ്ര പാരമ്പര്യവുമായി ഏറെ ബന്ധമുള്ള പ്രദേശമാണിത്. 2003 വരെ സേവനത്തിലുണ്ടായിരുന്ന നാവികസേനയുടെ ഇൻഷോർ മൈൻസ്വീപ്പർ കപ്പലായ മുൻ ‘ഐഎൻഎസ് മാൽവന്റെ’ പാരമ്പര്യം കൂടിയാണ് ഈ പുതിയ യുദ്ധക്കപ്പൽ മുന്നോട്ട് കൊണ്ടുപോകുന്നത്.
കൊച്ചിൻ ഷിപ്പ്യാർഡ് നിർമ്മിക്കുന്ന എട്ട് ASW-SWC കപ്പലുകളിൽ രണ്ടാമത്തേതും, ഇന്ത്യൻ നാവികസേനയുടെ ഭാഗമാകുന്ന 16 കപ്പലുകളുടെ മൊത്തം ശ്രേണിയിൽ ആറാമത്തേതുമാണ് ഐഎൻഎസ് മാൽവൻ.
80 ശതമാനത്തിലധികം തദ്ദേശീയ സാങ്കേതികവിദ്യ ഉപയോഗിച്ച് നിർമ്മിച്ച ഈ കപ്പൽ, കേന്ദ്ര സർക്കാരിന്റെ ‘ആത്മനിർഭർ ഭാരത്’ ആശയത്തിനും പ്രതിരോധ നിർമ്മാണ മേഖലയിലെ ഇന്ത്യയുടെ സ്വയംപര്യാപ്തതയ്ക്കും വൻ കരുത്തേകുന്നു.
ജലത്തിനടിയിലെ നിരീക്ഷണം, അന്തർവാഹിനി വിരുദ്ധ പോരാട്ടങ്ങൾ (ASW Operations), തീവ്രത കുറഞ്ഞ സമുദ്ര യുദ്ധങ്ങൾ (LIMO), മൈൻ വാർഫെയർ എന്നിവയ്ക്കായി പ്രത്യേകമായി രൂപകൽപ്പന ചെയ്തതാണ് ഈ കപ്പൽ.
ഇന്ത്യയുടെ തീരദേശ പ്രതിരോധം, തീരസമീപ സുരക്ഷ, സമുദ്ര നിരീക്ഷണ ശേഷി എന്നിവ കൂടുതൽ ശക്തമാക്കാൻ ഐഎൻഎസ് മാൽവന് സാധിക്കും.
കപ്പലിന്റെ ചിഹ്നത്തിൽ (Crest) ഉൾപ്പെടുത്തിയിരിക്കുന്നത് ചരിത്രപ്രസിദ്ധമായ ‘വാഘ് നഖ്’ (Bagh Nakha – പുലിനഖം) ആണ്. ഇത് വീര്യം, യുദ്ധതന്ത്രം, അതിവേഗം ചാടിവീഴാനുള്ള ശേഷി എന്നിവയെ പ്രതിനിധീകരിക്കുന്നു.
കപ്പലിന്റെ ആപ്തവാക്യം (Motto) ‘സൈലന്റ് ക്ലോസ്’ (Silent Claws) എന്നതാണ്. അപ്രതീക്ഷിതമായി നിശബ്ദമായി എത്തി ശത്രുവിനെ തകർക്കുന്ന ഇതിന്റെ പോരാട്ടവീര്യത്തെയാണ് ഇത് അടയാളപ്പെടുത്തുന്നത്.
ആഗോള അനിശ്ചിതത്വങ്ങൾക്കിടയിൽ സമുദ്ര വ്യാപാര പാതകളുടെ സുരക്ഷ ഉറപ്പാക്കേണ്ടതിന്റെ പ്രാധാന്യം വ്യോമസേനാ മേധാവി എയർ ചീഫ് മാർഷൽ എ.പി. സിംഗ് ചൂണ്ടിക്കാട്ടി. 80 ശതമാനത്തിലധികം തദ്ദേശീയമായി നിർമ്മിച്ച യുദ്ധക്കപ്പൽ പുറത്തിറക്കിയ നാവികസേനയുടെ ‘ആത്മനിർഭർ’ പ്രയാണത്തെ അദ്ദേഹം അഭിനന്ദിച്ചു.
കപ്പൽ നിർമ്മാണ പ്രക്രിയയിൽ ഓഫീസർമാരെ നേരിട്ട് പങ്കാളികളാക്കുന്ന നാവികസേനയുടെ മാതൃക മറ്റ് പ്രതിരോധ മേഖലകളിലും സ്വീകരിക്കാമെന്ന് അദ്ദേഹം അഭിപ്രായപ്പെട്ടു. കൂടാതെ, ഭാവിയിലെ പോരാട്ടങ്ങളിൽ വിജയം ഉറപ്പാക്കാൻ കര-നാവിക-വ്യോമസേനകളുടെ സംയോജിത പ്രവർത്തനത്തിന്റെ (Tri-service integration) ആവശ്യകതയും അദ്ദേഹം ഊന്നിപ്പറഞ്ഞു.
ഐഎൻഎസ് മാൽവന്റെ വരവോടെ ഇന്ത്യൻ നാവികസേനയുടെ അന്തർവാഹിനി വിരുദ്ധ പോരാട്ട ശേഷി കൂടുതൽ ശക്തമായി. മറ്റ് വലിയ ഉപരിതല യുദ്ധക്കപ്പലുകൾ, അന്തർവാഹിനികൾ, വ്യോമസേനാ വിഭാഗങ്ങൾ എന്നിവയുമായി ഏകോപിച്ച് പ്രവർത്തിക്കാൻ ശേഷിയുള്ള ഈ കപ്പൽ ഇന്ത്യയുടെ സമുദ്ര അതിർത്തികളെയും ദേശീയ താൽപ്പര്യങ്ങളെയും സംരക്ഷിക്കാൻ സദാ സജ്ജമായിരിക്കും.
Indian Navy commisions INS MALVAN. The second of the Mahe class anti submarine warfare shallow water craft.INS Malvan is the second of eight ASW-SWCs, being indigenously built by CSL, Kochi, and the sixth of 16 ASW-SWCs to be commissioned into Indian Navy. With over 80 percent indigenous content, the ship reinforces the Government of India’s vision of Aatmanirbhar Bharat and India’s expanding ecosystem of naval design, equipment, system integration, and growing self-reliance in defence shipbuilding.
