ഇന്ത്യൻ ബഹിരാകാശ രംഗത്ത് സ്വകാര്യ മേഖലയുടെ പങ്കാളിത്തം കൂടുതൽ ശക്തമാക്കിക്കൊണ്ട്, പുനരുപയോഗിക്കാൻ സാധിക്കുന്ന ശക്തിയേറിയ റോക്കറ്റ് എഞ്ചിനും വിക്ഷേപണ വാഹനവും വികസിപ്പിക്കാനുള്ള തയ്യാറെടുപ്പിലാണ് ബെംഗളൂരു ആസ്ഥാനമായി പ്രവർത്തിക്കുന്ന ആസ്ട്രോബേസ് സ്പേസ് ടെക്നോളജീസ്. ക്രിപ്റ്റോകറൻസി എക്സ്ചേഞ്ചായ കോയിൻഡിസിഎക്സിന്റെ (CoinDCX) സഹസ്ഥാപകനായ നീരജ് ഖണ്ഡേൽവാളും മുൻ ഐ.എസ്.ആർ.ഒ ശാസ്ത്രജ്ഞനായ ദേവകുമാർ തമ്മികെട്ടിയും ചേർന്ന് 2024-ൽ ബെംഗളൂരുവിൽ സ്ഥാപിച്ച ഈ കമ്പനി, 3 മുതൽ 10 ടൺ വരെ ഭാരമുള്ള പേലോഡുകൾ ഭ്രമണപഥത്തിലെത്തിക്കാൻ ശേഷിയുള്ള റോക്കറ്റുകളാണ് നിർമ്മിക്കുന്നത്.
സ്പേസ് എക്സിന്റെ റാപ്റ്റർ എഞ്ചിന് സമാനമായി മീഥെയ്നും ലിക്വിഡ് ഓക്സിജനും ഉപയോഗിച്ചുള്ള ‘ഫുൾ-ഫ്ലോ സ്റ്റേജ്ഡ് കംബസ്റ്റൻ’ സാങ്കേതികവിദ്യയിലാണ് ഈ എഞ്ചിൻ പ്രവർത്തിക്കുന്നത്. റോക്കറ്റുകൾ പുനരുപയോഗിക്കാൻ ഏറ്റവും അനുയോജ്യമായതും എന്നാൽ വികസിപ്പിച്ചെടുക്കാൻ ഏറ്റവും പ്രയാസമുള്ളതുമായ ഈ സാങ്കേതികവിദ്യയിലൂടെ പൂർണ്ണമായും നശിച്ചുപോകുന്നവ, ഭാഗികമായി പുനരുപയോഗിക്കാവുന്നവ, പൂർണ്ണമായും പുനരുപയോഗിക്കാവുന്നവ എന്നിങ്ങനെ മൂന്ന് തരം വിക്ഷേപണ വാഹനങ്ങളാണ് കമ്പനി ലക്ഷ്യമിടുന്നത്.
2026 ജൂണിൽ കേന്ദ്ര സർക്കാരിന്റെ ബഹിരാകാശ നിയന്ത്രണ ഏജൻസിയായ ഇൻ-സ്പേസ് (IN-SPACe) പ്രഖ്യാപിച്ച ‘ടെക്നോളജി അഡോപ്ഷൻ ഫണ്ടിലേക്ക്’ തെരഞ്ഞെടുക്കപ്പെട്ട ആദ്യ മൂന്ന് സ്റ്റാർട്ടപ്പുകളിൽ ഒന്നാണ് ആസ്ട്രോബേസ്. 43 കമ്പനികളിൽ നിന്ന് തെരഞ്ഞെടുക്കപ്പെട്ട ആസ്ട്രോബേസിന്, 800 കിലോന്യൂട്ടൺ ശേഷിയുള്ള ലിക്വിഡ് ഓക്സിജൻ-മീഥെയ്ൻ എഞ്ചിൻ വികസിപ്പിക്കുന്നതിന് പദ്ധതി ചെലവിന്റെ 60% വരെ (പരമാവധി ₹25 കോടി) സാമ്പത്തിക സഹായം ഇൻ-സ്പേസ് നൽകും.
ആന്ധ്രാപ്രദേശിലെ അനന്തപൂരിൽ 21.5 ഏക്കറിലായി നിർമ്മിച്ചിരിക്കുന്ന പരീക്ഷണശാലയിൽ ഇതിനകം തന്നെ എഞ്ചിന്റെ ചെറിയ പതിപ്പിന്റെയും ടർബോപമ്പിന്റെയും പരീക്ഷണങ്ങൾ കമ്പനി വിജയകരമായി പൂർത്തിയാക്കിയിട്ടുണ്ട്. ആദ്യ ഘട്ടത്തിൽ Banyanന്റെ നേതൃത്വത്തിൽ ഏകദേശം 60 കോടി രൂപയുടെ പ്രാഥമിക നിക്ഷേപം സമാഹരിച്ച കമ്പനി, യൂറോപ്യൻ സാറ്റലൈറ്റ് ഓപ്പറേറ്റർമാർക്ക് സേവനം നൽകുന്നതിനായി ‘ഇംപൾസോ സ്പേസ്’ എന്ന കമ്പനിയുമായി അന്താരാഷ്ട്ര പങ്കാളിത്തത്തിലും ഒപ്പുവെച്ചിട്ടുണ്ട്.
2026ൽ എഞ്ചിന്റെ പൂർണ്ണ തോതിലുള്ള സംയോജിത പരീക്ഷണവും, 2027ൽ ഹോപ്പ്-ടെസ്റ്റ് ഡെമോൺസ്ട്രേറ്റർ പരീക്ഷണവും നടത്തി, 2029ഓടെ ആദ്യ ഭ്രമണപഥ വിക്ഷേപണം ലക്ഷ്യമിടുന്ന ആസ്ട്രോബേസ്, ഐ.എസ്.ആർ.ഒയുമായി മത്സരത്തിനില്ലെന്നും മറിച്ച് അവരുടെ പ്രവർത്തനങ്ങൾക്ക് പിന്തുണ നൽകുന്ന രീതിയിലാണ് മുന്നോട്ട് പോകുന്നതെന്നും വ്യക്തമാക്കുന്നു.
Astrobase Space Technologies, Astrobase reusable rocket engine, Bengaluru spacetech startup, IN-SPACe Technology Adoption Fund, Neeraj Khandelwal Astrobase, LOX methane rocket engine, Indian private space sector
