ആന്ധ്രാപ്രദേശിലെ വിശാഖപട്ടണത്ത് നിർമ്മിക്കുന്ന ഗൂഗിളിന്റെ 1 ഗിഗാവാട്ട് കൂറ്റൻ ആർട്ടിഫിഷ്യൽ ഇന്റലിജൻസ് (AI) ഡാറ്റാ സെന്റർ ഹബ്ബിന്റെ ആദ്യഘട്ട സാമ്പത്തിക വിവരങ്ങൾ അദാനി എന്റർപ്രൈസസ് ഔദ്യോഗികമായി പുറത്തുവിട്ടു. ആദ്യ ഘട്ടത്തിലെ 400 മെഗാവാട്ട് (MW) ശേഷിയുള്ള നിർമ്മാണപ്രവർത്തനങ്ങൾക്കായി 28,000 കോടി മുതൽ 30,000 കോടി രൂപ വരെയാണ് ചെലവ് പ്രതീക്ഷിക്കുന്നത്.
അദാനി ഗ്രൂപ്പും ആഗോള ഡാറ്റാ സെന്റർ ഓപ്പറേറ്ററായ എഡ്ജ്കണക്സും ചേർന്ന് രൂപീകരിച്ച ‘അദാനി കണക്സ്’ (AdaniConneX) എന്ന സംയുക്ത സംരംഭമാണ് ഈ പദ്ധതി നടപ്പിലാക്കുന്നത്. ഇതിൽ നിർമ്മാണച്ചെലവിന്റെ 70 മുതൽ 80 ശതമാനം വരെ വായ്പാ തുക ഉപയോഗിച്ചായിരിക്കും സമാഹരിക്കുക. വിശാഖപട്ടണത്തെ മൂന്ന് ക്യാമ്പസുകളിലായി പടർന്നുകിടക്കുന്ന ഈ എഐ ഡാറ്റാ സെന്ററിന്റെ ആദ്യ 400 മെഗാവാട്ട് ശേഷി 2.5 വർഷത്തിനുള്ളിൽ പ്രവർത്തനം ആരംഭിക്കും.
പ്രതിവർഷം 12 ശതമാനത്തോളം ലാഭവിഹിതം ലക്ഷ്യമിടുന്ന ഈ പദ്ധതിക്ക് 10 വർഷത്തെ തടസ്സമില്ലാത്ത വരുമാനം ഉറപ്പുനൽകുന്ന കരാറുകളാണ് ഉള്ളത്. പദ്ധതിയിലെ ഏറ്റവും ചെലവേറിയ ഗ്രാഫിക്സ് പ്രൊസസിംഗ് യൂണിറ്റുകൾ (GPU) ഗൂഗിൾ നേരിട്ട് നൽകുന്നതിനാൽ നിർമ്മാണച്ചെലവ് വലിയ തോതിൽ കുറയ്ക്കാൻ സാധിച്ചിട്ടുണ്ടെന്ന് അദാനി ഗ്രൂപ്പ് വ്യക്തമാക്കുന്നു. പൂർണ്ണതോതിലുള്ള നിർമ്മാണം പൂർത്തിയാകാൻ 40 മുതൽ 48 മാസം വരെ സമയമെടുക്കും.
AdaniConneX allocates up to Rs 30,000 crore for the first phase of Google’s 1 GW AI Data Center hub in Visakhapatnam.
