ആർ.ബി.ഐയുടെ വിദേശ കറൻസി നിക്ഷേപ പദ്ധതിയുടെ സഹായത്തോടെ ഡോളർ വരവ് കൂടിയതിനെത്തുടർന്ന് ജൂലൈ അവസാനത്തോടെ രാജ്യത്തെ ബാങ്ക് നിക്ഷേപം റെക്കോർഡ് 269.4 ലക്ഷം കോടി രൂപയിലെത്തി. ജൂലൈ 31ൽ അവസാനിച്ച ആറാഴ്ചയ്ക്കുള്ളിൽ ഇന്ത്യയിലെ ബാങ്കിംഗ് സംവിധാനത്തിലെ നിക്ഷേപം ഏകദേശം 11 ലക്ഷം കോടി രൂപയാണ് വർധിച്ചത്. സാമ്പത്തിക വർഷത്തിന്റെ തുടക്കത്തിലുണ്ടായ ഇടിവിന് ശേഷമാണ് നിക്ഷേപങ്ങളിൽ ഈ വൻ തിരിച്ചുവരവുണ്ടായിരിക്കുന്നത്.
വിദേശത്തുനിന്നുള്ള ഡോളർ രൂപയിലേക്ക് മാറ്റുന്നത് നിക്ഷേപങ്ങളിൽ വലിയ വർധനവിന് കാരണമായെന്ന് പൊതുമേഖലാ ബാങ്ക് അധികൃതർ വ്യക്തമാക്കി. വിദേശ കറൻസി നിക്ഷേപങ്ങൾ ആകർഷിക്കുന്നതിനായി ജൂണിൽ ആർ.ബി.ഐ പ്രത്യേക സ്വാപ്പ് വിൻഡോകൾ പ്രഖ്യാപിച്ചിരുന്നു. ഈ സുപ്രധാന നടപടികൾ ബാങ്കുകളുടെ വായ്പാ ശേഷി വർധിപ്പിക്കാനും നിക്ഷേപ-വായ്പാ അനുപാതം മെച്ചപ്പെടുത്താനും സഹായിക്കുമെന്നാണ് വിലയിരുത്തൽ.
RBI’s special foreign currency swap window drives dollar inflows, pushing India’s bank deposits to a record ₹269.4 lakh crore with an ₹11 lakh crore jump in six weeks.
