ആർട്ടിഫിഷ്യൽ ഇന്റലിജൻസ് (AI) രംഗത്തെ വൻ കുതിച്ചുചാട്ടം പുതിയതും വിശ്വസനീയവുമായ ചിപ്പ് നിർമ്മാണ കേന്ദ്രങ്ങളുടെ ആവശ്യകത വർദ്ധിപ്പിച്ചിട്ടുണ്ടെന്ന് പ്രധാനമന്ത്രി നരേന്ദ്ര മോദി. ‘സെമികോൺ ഇന്ത്യ 2026’ ഉദ്ഘാടനം ചെയ്ത് സംസാരിക്കവേയാണ് അദ്ദേഹം ഇക്കാര്യം വ്യക്തമാക്കിയത്. ചെറിയ ട്രാൻസിസ്റ്ററുകൾക്കപ്പുറം ചിപ്പ് സംയോജനം, ഡാറ്റാ മൂവ്മെന്റ്, താപനില നിയന്ത്രണം, വിശ്വസനീയമായ പവർ സപ്ലൈ എന്നിവയാണ് ഇന്നത്തെ AI ആവശ്യങ്ങൾ എന്ന് ചൂണ്ടിക്കാട്ടിയ പ്രധാനമന്ത്രി, ആഗോള സെമികണ്ടക്ടർ വ്യവസായത്തിന് ആവശ്യമായ സമ്പൂർണ്ണ ആവാസവ്യവസ്ഥ ഇന്ത്യയിൽ ഒരുങ്ങുകയാണെന്നും കൂട്ടിച്ചേർത്തു.
സെമികണ്ടക്ടർ മിഷന്റെ ആദ്യ ഘട്ടത്തിന് പിന്നാലെ 13.5 ബില്യൺ ഡോളറിന്റെ രണ്ടാം ഘട്ടത്തിനാണ് ഇന്ത്യ തുടക്കമിട്ടിരിക്കുന്നത്. ഇതിനകം 12 പദ്ധതികൾക്ക് അനുമതി ലഭിച്ചിട്ടുണ്ട്. ചിപ്പ് നിർമ്മാണത്തോടൊപ്പം കെമിക്കലുകൾ, വാതകങ്ങൾ, യന്ത്രസാമഗ്രികൾ എന്നിവയുടെ വിതരണക്കാരെയും ഇന്ത്യയിലേക്ക് പ്രധാനമന്ത്രി സ്വാഗതം ചെയ്തു. വിദേശത്ത് ഗവേഷണം നടത്തുന്ന ഇന്ത്യൻ യുവത്വത്തോടും വിദഗ്ദ്ധരോടും രാജ്യത്തേക്ക് തിരികെ വന്ന് സാങ്കേതിക വികസനത്തിൽ പങ്കാളികളാകാൻ അദ്ദേഹം ആഹ്വാനം ചെയ്തു. അന്താരാഷ്ട്ര കമ്പനികൾക്ക് ഇന്ത്യൻ സ്റ്റാർട്ടപ്പുകളുമായി സഹകരിക്കാൻ അനുയോജ്യമായ നയപരമായ മാറ്റങ്ങളും സർക്കാർ കൊണ്ടുവന്നിട്ടുണ്ട്.
നയപരമായ ചർച്ചകളിൽ നിന്ന് ചിപ്പുകളുടെ വാണിജ്യ ഉൽപ്പാദനത്തിലേക്ക് ഇന്ത്യ ഇതിനകം വിജയകരമായി മാറിയിട്ടുണ്ടെന്ന് പ്രധാനമന്ത്രി വ്യക്തമാക്കി. മൊഹാലിയിലും സൂറത്തിലും ഉൾപ്പെടെയുള്ള പ്ലാന്റുകളിൽ നിന്നുള്ള ഉൽപ്പാദനം ആഭ്യന്തര വിപണിയിലും വിദേശത്തും എത്തിത്തുടങ്ങിയിട്ടുണ്ട്. ദശകങ്ങളുടെ പ്രയത്നം വേണ്ടിവരുന്ന സാങ്കേതിക മുന്നേറ്റം ഇന്ത്യ വളരെ വേഗത്തിലാണ് കൈവരിച്ചത്. ആഗോളതലത്തിൽ സപ്ലൈ ചെയിൻ ശൃംഖലകൾ വെല്ലുവിളികൾ നേരിടുന്ന ഈ കാലഘട്ടത്തിൽ, ഇന്ത്യയുടെ വിജയം ആഗോള വിപണിക്ക് വലിയൊരു കരുത്താകുമെന്നും അദ്ദേഹം കൂട്ടിച്ചേർത്തു.
PM Modi highlights India’s emergence as a global semiconductor hub at Semicon India 2026, driven by AI demand and the $13.5 billion Semiconductor Mission.
