സെമികണ്ടക്ടർ ഉപകരണ നിർമ്മാണ രംഗത്തെ ആഗോള ഭീമനായ എഎസ്എംഎൽ (ASML) ഔദ്യോഗികമായി ഇന്ത്യയിൽ പ്രവർത്തനം ആരംഭിച്ചു. ടാറ്റ ഇലക്ട്രോണിക്സിന്റെ ചിപ്പ് യൂണിറ്റിന്റെ വിജയവും രാജ്യത്തിന്റെ സെമികണ്ടക്ടർ സ്വപ്നങ്ങളും മുൻനിർത്തിയായിരിക്കും കമ്പനി തങ്ങളുടെ പ്രവർത്തനങ്ങൾ ഇന്ത്യയിൽ വ്യാപിപ്പിക്കുന്നത്. സിലിക്കൺ വേഫറുകളിൽ സർക്യൂട്ടുകൾ നിർമ്മിക്കാൻ സഹായിക്കുന്ന അത്യാധുനിക ലിത്തോഗ്രഫി സാങ്കേതികവിദ്യയിൽ ആഗോളതലത്തിൽ മുന്നിലുള്ള ഈ കമ്പനി, തുടക്കത്തിൽ 20 മുതൽ 30 വരെ യുവ എൻജിനീയർമാരെ നിയമിച്ചുകൊണ്ടാണ് ഇന്ത്യയിൽ തുടക്കമിട്ടിരിക്കുന്നത്.
ടാറ്റ ഇലക്ട്രോണിക്സിന്റെ നേതൃത്വത്തിൽ രാജ്യത്ത് ആദ്യമായി ആരംഭിക്കുന്ന 300 മില്ലിമീറ്റർ സെമികണ്ടക്ടർ ഫാബ് പ്ലാന്റ് 2028-ഓടെ പ്രവർത്തനക്ഷമമാകുമെന്നാണ് പ്രതീക്ഷിക്കുന്നത്. സെമികണ്ടക്ടർ ആവാസവ്യവസ്ഥയെ ശക്തിപ്പെടുത്തുന്നതിനായി കേന്ദ്ര സർക്കാർ പ്രഖ്യാപിച്ച ‘സെമികോൺ 2.0’ (Semicon 2.0) പദ്ധതിയിലൂടെ 1.27 ലക്ഷം കോടി രൂപയുടെ (13.5 ബില്യൺ ഡോളർ) ആനുകൂല്യങ്ങളാണ് ലഭ്യമാക്കുന്നത്. ഈ പുതിയ പദ്ധതിക്ക് കീഴിൽ 12 ബില്യൺ ഡോളറിന്റെ നിക്ഷേപ നിർദ്ദേശങ്ങൾ വരുമെന്ന് കേന്ദ്ര മന്ത്രി അശ്വിനി വൈഷ്ണവ് അറിയിച്ചിട്ടുണ്ട്. ഇന്ത്യയുടെ വർദ്ധിച്ചുവരുന്ന സെമികണ്ടക്ടർ ആവശ്യകത പ്രാദേശികമായി തന്നെ നിറവേറ്റാൻ ലക്ഷ്യമിട്ടുള്ള ഈ നീക്കത്തിന് ടാറ്റയുമായുള്ള പങ്കാളിത്തം വലിയ കരുത്താകും.
Global semiconductor leader ASML begins operations in India, partnering with Tata Electronics to bolster the nation’s chip manufacturing under the Semicon 2.0 initiative
