ഡൽഹി, മുംബൈ, കൊൽക്കത്ത, ചെന്നൈ, ബെംഗളൂരു, ഹൈദരാബാദ്, കൊച്ചി, അഹമ്മദാബാദ് എന്നീ എട്ട് പ്രധാന വിമാനത്താവളങ്ങളിൽ ഫുൾ-ബോഡി സ്കാനറുകൾ സ്ഥാപിക്കാൻ വ്യോമയാന മന്ത്രാലയം അനുമതി നൽകി. ഫ്ലൈദുബായ് വിമാനത്തിന്റെ കോക്ക്പിറ്റിലുണ്ടായ ആക്രമണ സംഭവത്തിന് തൊട്ടുപിന്നാലെയാണ് വിമാനത്താവളങ്ങളിലെ സുരക്ഷ ശക്തമാക്കുന്നതിന്റെ ഭാഗമായി ഈ നിർണായക തീരുമാനം. ഇതിൽ മൂന്ന് വിമാനത്താവളങ്ങളിൽ ഇതിനകം തന്നെ ഈ ആധുനിക സ്കാനറുകൾ എത്തിച്ചിട്ടുണ്ട്. ശേഷിക്കുന്ന ഇടങ്ങളിൽ ഇൻസ്റ്റലേഷൻ നടപടികൾ ഉടൻ പൂർത്തിയാകും. സ്ക്രീനിങ് പ്രക്രിയ കുറ്റമറ്റതാക്കാനും പിഴവുകൾ ഒഴിവാക്കാനും സർക്കാർ നിലവിൽ മെഷീനുകളിൽ നിന്നുള്ള ഡാറ്റ ശേഖരിച്ച് വിശകലനം ചെയ്തുവരികയാണ്.
യാത്രക്കാരുടെ സ്വകാര്യത പൂർണ്ണമായി സംരക്ഷിച്ചുകൊണ്ടാണ് പുതിയ സ്കാനറുകൾ രൂപകൽപ്പന ചെയ്തിരിക്കുന്നത്. ശരീരത്തിന്റെ യഥാർത്ഥ ചിത്രങ്ങൾക്ക് പകരം 3ഡി രൂപങ്ങൾ മാത്രം പ്രദർശിപ്പിക്കുന്ന ‘പിക്ചർ-അഗ്നോസ്റ്റിക്’ സാങ്കേതികവിദ്യയാണ് ഇതിൽ ഉപയോഗിക്കുന്നത്. ഇന്ത്യൻ വസ്ത്രധാരണ രീതികൾക്ക് അനുയോജ്യമായ പ്രത്യേക അൽഗോരിതങ്ങളും ഇതിൽ സജ്ജീകരിച്ചിട്ടുണ്ട്. ഇതിനുപുറമെ, ബാഗേജുകൾ പരിശോധിച്ച് സ്ഫോടകവസ്തുക്കൾ കണ്ടെത്താൻ സഹായിക്കുന്ന സി.ടി.എക്സ് (CTX) എക്സ്-റേ മെഷീനുകൾ സ്ഥാപിക്കുന്നതിനുള്ള ജോലികളും പുരോഗമിക്കുകയാണെന്ന് മന്ത്രാലയം വ്യക്തമാക്കി.
India’s Aviation Ministry approves full-body scanners at eight major airports, including Cochin, featuring privacy-focused 3D technology to boost security.
