ബിസിനസോ സ്റ്റാർട്ടപ്പോ തുടങ്ങണമെന്നത് പഠിക്കുന്ന കാലം മുതലുള്ള ആഗ്രഹമായിരുന്നുവെന്ന് ചലച്ചിത്ര താരം നിവിൻ പോളി. കൊച്ചിയിൽ കേരള സ്റ്റാർട്ടപ്പ് മിഷൻ (KSUM) സംഘടിപ്പിക്കുന്ന ഇന്ത്യയിലെ ഏറ്റവും വലിയ ജനറേറ്റീവ് എഐ ഹാക്കത്തോൺ ആയ ‘ഹാക്‌ജെൻ എഐ 2025’ ലോഗോയും വെബ് സൈറ്റും ലോഞ്ച് ചെയ്തു സംസാരിക്കുകയായിരുന്നു അദ്ദേഹം. സ്റ്റാർട്ടപ്പ് മിഷനുമായി ചേർന്ന് എഐ റിലേറ്റഡ് പ്രോബ്ലം സോൾവിങ്ങുമായി മുന്നോട്ടുവരുന്ന സ്റ്റാർട്ടപ്പുകളെ സഹായിക്കുമെന്നും നിവിൻ പോളി വ്യക്തമാക്കി.
കൊച്ചിയിലെ സ്റ്റാർട്ടപ്പ് മിഷൻ കാമ്പസിൽ നടന്ന ചടങ്ങിലാണ് ലോഗോയും വെബ്സൈറ്റും ഔദ്യോഗികമായി പുറത്തിറക്കിയത്. ജൂലായ് 25, 26 തീയതികളിൽ നടക്കുന്ന കേരള ഇന്നൊവേഷൻ ഫെസ്റ്റിവലിൻറെ മുന്നോടിയായാണ് ഹാക്ക് ജെൻ എഐ സംഘടിപ്പിക്കുന്നത്. നിവിൻ പോളിയുടെ പോളി ജൂനിയർ, സൂപ്പർ ബ്രയൻ എന്നിവ പരിപാടിയുമായി സഹകരിക്കുന്നുണ്ട്. സിനിമയിൽ പ്രൊഡക്ഷനിലും സ്ക്രിപ്റ്റിങ്ങിലും അ‌ടക്കമുണ്ടാകുന്ന പ്രശ്നങ്ങൾക്ക് എഐയിലൂടെ പരിഹാരം കാണാനാകുമെന്ന് സോഫ്റ്റ് വെയർ എഞ്ചിനീയർ കൂടിയായ നിവിൻ പോളി വിശ്വസിക്കുന്നു. ഈ വിശ്വാസത്തിന്റെ പുറത്താണ് പുത്തൻ ആശയങ്ങളുടെ കേന്ദ്രമായ കേരള ഇന്നൊവേഷൻ ഫെസ്റ്റിൽ നിവിൻ ഭാഗമാകുന്നത്. പഠിക്കുന്ന കാലം തൊട്ടേ എഐ സംബന്ധിച്ച സംരംഭം ആരംഭിക്കണം എന്ന് ആഗ്രഹമുണ്ടായിരുന്നതായി അദ്ദേഹം പറഞ്ഞു. എന്നാൽ പലതും ആശയത്തിൽ മാത്രം ഒതുങ്ങി. വേണ്ട വിധത്തിലുള്ള സപ്പോർട്ടും കുറവായിരുന്നു. പിന്നീട് സിനിമയിലേക്ക് വന്നതോടെ സംരംഭകത്വം മറന്നു. എങ്കിലും ചില സ്റ്റാർട്ടപ്പുകളിൽ നിക്ഷേപകൻ എന്ന നിലയിൽ പ്രവർത്തിക്കുന്നുണ്ടെന്ന് നിവിൻ പോളി പറഞ്ഞു.
സ്റ്റാർട്ടപ്പുകളെ സഹായിക്കുന്ന പ്രോഗ്രാം തുടങ്ങണം എന്നത് ഏറെക്കാലമായി മനസ്സിലുള്ള കാര്യമാണ്. പലരുമായും വിഷയത്തെക്കുറിച്ച് സംസാരിക്കാറുണ്ട്. അത്തരത്തിലുള്ള ചർച്ചകളിൽ നിന്നാണ് സിനിമയുമായി ബന്ധപ്പെട്ടുള്ള എഐ പ്രോബ്ലം സോൾവിങ് പ്ലാറ്റ്ഫോം എന്ന ആശയത്തിലേക്ക് എത്തിയത്. സിനിമയിൽ ഇപ്പോഴും സിസ്റ്റമാറ്റിക് ആവേണ്ട നിരവധി മേഖലകളുണ്ട്. ഫിലിം പ്രൊഡക്ഷനു സഹായിക്കുന്ന ടൂൾസ് ഉണ്ടാക്കുന്നത് അടക്കമുള്ള ശ്രമങ്ങൾ നടത്തിയിരുന്നു. ഇപ്പോൾ സ്റ്റാർട്ടപ്പ് മിഷനുമായി ചേർന്ന് ഇന്നൊവേഷൻ ഫെസ്റ്റിന്റെ ഭാഗമാകാൻ സാധിച്ചതിൽ അതിയായ സന്തോഷമുണ്ടെന്നും അദ്ദേഹം കൂട്ടിച്ചേർത്തു.
Actor Nivin Pauly revealed his long-standing dream of entrepreneurship and technology at the HackGen AI 2025 launch in Kochi. He will support AI startups, especially those innovating in cinema production, through his ventures, as he joins the Kerala Innovation Festival.
