കൊച്ചി മെട്രോ റെയിൽ പദ്ധതിയുടെ രണ്ടാം ഘട്ടത്തിനായി സംസ്ഥാന സർക്കാരിന്റെ ഇക്വിറ്റി നിക്ഷേപത്തിന്റെ ഭാഗമായി 50 കോടി രൂപ കൂടി അനുവദിച്ചു. കഴിഞ്ഞ ദിവസം പുറപ്പെടുവിച്ച ഉത്തരവിലാണ് സർക്കാർ ഈ തുക നൽകുന്നതായി വ്യക്തമാക്കിയിരിക്കുന്നത്. രണ്ടാം ഘട്ടമായ പിങ്ക് ലൈനിൽ ജവഹർലാൽ നെഹ്റു സ്റ്റേഡിയം മുതൽ കാക്കനാട് ഇൻഫോപാർക്ക് വരെ മെട്രോ വിപുലീകരിക്കാനാണ് പദ്ധതി. പുതുക്കിയ കണക്കുകൾ പ്രകാരം പദ്ധതിയുടെ മൊത്തം ചിലവ് 1,957.05 കോടി രൂപയായിരിക്കുമെന്ന് സർക്കാർ അറിയിച്ചു. ഇതിൽ 1,571.05 കോടി രൂപയാണ് സംസ്ഥാന സർക്കാർ വഹിക്കുന്നത്.
രണ്ടാം ഘട്ടത്തിന്റെ ഭാഗമായി മുൻപ് 190.22 കോടി രൂപ കൊച്ചി മെട്രോ റെയിൽ ലിമിറ്റഡിന് (KMRL) നൽകിയിരുന്നു. പദ്ധതിയിൽ കാലതാമസമുണ്ടാകാതിരിക്കാൻ ശേഷിക്കുന്ന തുക അനുവദിക്കണമെന്ന് കെഎംആർഎൽ മാനേജിംഗ് ഡയറക്ടർ സർക്കാറിന് കത്ത് നൽകിയിരുന്നു. ഇതിന്റെ അടിസ്ഥാനത്തിലാണ് 50 കോടി രൂപയ്ക്ക് കൂടി സർക്കാർ അനുമതി നൽകിയത്. ഇപ്പോൾ അനുവദിച്ച തുക ഉപയോഗിക്കുന്നതിൽ കെഎംആർഎൽ നിയന്ത്രണം കൊണ്ടുവരികയോ, ആവശ്യമെങ്കിൽ ഈ സാമ്പത്തിക വർഷം അവസാനിക്കുന്നതിന് മുൻപ് കൂടുതൽ തുക ആവശ്യപ്പെട്ട് സമർപ്പിക്കുകയോ വേണമെന്നാണ് സർക്കാരിന്റെ നിർദേശം.
അതേസമയം പിങ്ക് ലൈനിൽ മെട്രോയുടെ യാത്ര തുടങ്ങാൻ ഇനി ഏഴുമാസം കൂടിയാണുള്ളത്. കലൂർ ജവാഹർലാൽ നെഹ്റു സ്‌റ്റേഡിയത്തിൽനിന്ന് കാക്കനാട്ടേക്കുള്ള മെട്രോ രണ്ടാംഘട്ടത്തിലുൾപ്പെടുന്ന അഞ്ചുസ്റ്റേഷനുകളിലേക്ക് അടുത്തവർഷം ജൂണിൽ സർവീസ് തുടങ്ങുമെന്നാണ് പ്രഖ്യാപനം. ശേഷിക്കുന്ന സ്റ്റേഷനുകളിലേക്ക് അതേവർഷം ഡിസംബറിനകവും സർവീസ് ആരംഭിക്കുമെന്നും റിപ്പോർട്ടുണ്ട്.
Kerala Government approves an additional ₹50 Crore as equity for Kochi Metro Phase 2 (Pink Line). The total project cost is ₹1,957.05 Cr, with services to key stations starting by June next year
