ഗർഭകാല, പ്രസവാനന്തര ശുശ്രൂഷയ്ക്ക് ഇനി സഹകരണ വനിതാഫെഡിന്റെ സഖിമാർ വീടുകളിലേക്കെത്തും. സൂതികമിത്രം പദ്ധതിയിലെ 37 വനിതകളുടെ ആദ്യ സഖി ബാച്ച് പുറത്തിറക്കി സഹകരണ വകുപ്പിന് കീഴിലെ വനിതാ ഫെഡ്.
സംസ്ഥാനത്തെ വനിതാ സംഘങ്ങളുടെ പ്രവർത്തനങ്ങൾക്ക് ദിശാബോധം നൽകുന്നതിനും വനിതകൾക്ക് കൂടുതൽ തൊഴിൽ അവസരങ്ങൾ സൃഷ്ടിക്കുന്നതിന് ആയുഷ് വകുപ്പുമായി സഹകരിച്ച് നടപ്പിലാക്കിട്ടുള്ള പരിശീലന പദ്ധതിയനുസരിച്ച് “നാഷണൽ ആയുഷ് മിഷൻ കേരളം ഗർഭകാല പരിചരണം, പ്രസവകാല പരിചരണം എന്നീ മേഖലയിലാണ് വനിതകൾക്ക് ശാസ്ത്രീയ പരിശീലനം നൽകിയത്.
സംസ്ഥാനത്തെ വനിതാ സംഘങ്ങളുടെ ഫെഡറേഷനായ സഹകരണ വനിതാ ഫെഡും സംസ്ഥാന സർക്കാരിന്റെ ആയുഷ് വകുപ്പിൽ പ്രവർത്തിക്കുന്ന “നാഷണൽ ആയുഷ് മിഷൻ കേരളവും സംയുക്തമായി നടപ്പിലാക്കുന്ന സഖി – സൂതികമിത്രം പദ്ധതിയിലെ ആദ്യബാച്ചിന്റെ സർട്ടിഫിക്കറ് വിതരണം മന്ത്രി വി. എൻ . വാസവൻ നിർവ്വഹിച്ചു. സഹകരണ വകുപ്പ് സെക്രട്ടറി ഡോ. വീണാ മാധവൻ, സംസ്ഥാന സഹകരണ യൂണിയൻ ചെയർമാൻ കോലിയാക്കോട് എൻ. കൃഷ്ണൻ നായർ, സഹകരണ സംഘം രജിസ്ട്രാർ ഡോ. ഡി. സജിത്ത് ബാബു, വനിതാ ഫെഡ് പ്രസിഡന്റ് ശ്രീജ കെ തുടങ്ങിയവർ പങ്കെടുത്തു
വനിതകൾക്ക് തൊഴിൽ അവസരം നൽകുന്നതിനുള്ള വിദഗ്ധ പരിശീലനം നൽകി ഉപയോഗപ്പെടുത്തുക എന്നതാണ് ഈ പദ്ധതി കൊണ്ട് ഉദ്ദേശിക്കുന്നത്. ആയുർവേദ ചികിത്സാ സമ്പ്രദായത്തിലെ രീതിയ്ക്ക് അനുസൃതമായി ഗർഭകാല, പ്രസവാനന്തര ശുശ്രൂഷയിൽ ശാസ്ത്രീയമായ പരിശീലനം നൽകുക എന്നതാണ് ലക്ഷ്യം. കൂടാതെ ഗർഭകാലത്തേയും പ്രസവാനന്തര കാലത്തേയും ബുദ്ധിമുട്ടുകൾ ശാസ്ത്രീയമായ മാർഗ്ഗങ്ങൾ അവലംബിച്ച് പരിഹരിക്കുന്നതിന് പ്രാപ്തരാക്കുക എന്നതും കോഴ്സിന്റെ ലക്ഷ്യമാണ്. മുൻകാലഘട്ടങ്ങളിൽ ഗർഭകാലം പ്രസവാനന്തര ശുശ്രൂഷകൾ ശാസ്ത്രീയമായ രീതിയിൽ നടപ്പാക്കിയിരുന്നു. ഗർഭ കാലഘട്ടങ്ങളിൽ അവലംബിക്കേണ്ട ജീവിത രീതികൾ, ഭക്ഷണക്രമം, വ്യായാമ മുറകൾ എന്നിവയിൽ കുടുംബത്തിലെ മുതിർന്ന ആളുകൾക്ക് തികഞ്ഞ ധാരണ ഉണ്ടായിരുന്നു. കൂടാതെ പ്രസവാനന്തരം കുട്ടിയുടെയും, അമ്മയുടെയും ആരോഗ്യം ഉറപ്പുവരുത്തുന്ന ആരോഗ്യ പരിപാലന മാർഗ്ഗങ്ങൾ സ്വീകരിച്ചിരുന്നു. ഇന്ന് ഇത്തരം ആരോഗ്യ പരിപാലന രീതികൾ പ്രാവർത്തികമാക്കുന്നതിന് കഴിയാത്ത സാഹചര്യമാണ് നിലവിലുള്ളത്. ഇത്തരം പരിപാലന രീതികൾ സ്വീകരിക്കുന്നതിന് തടസ്സമായി നിൽക്കുന്നത് ശാസ്ത്രീയ പരിശീലനം നേടിയവരുടെ അഭാവമാണ്.
പത്താം ക്ലാസ് പാസ്സായവർക്ക് ഈ കോഴ്സിന് അപേക്ഷിക്കാവുന്നതാണ്. അപേക്ഷ സമർപ്പിക്കേണ്ട പ്രായപരിധി 20 വയസ്സ് മുതൽ 45 വയസ്സ് വരെയാണ്. സർക്കാർ ധനസഹായത്തോടുകൂടി സൗജന്യമായിട്ടാണ് ഈ പരിശീലനം നൽകുന്നത്. വനിതാ ഫെഡറേഷന്റെ അംഗ സംഘങ്ങളായ പ്രാഥമിക സംഘങ്ങളിൽ നിന്ന് തിരഞ്ഞെടുക്കുന്നവരെയാണ് ഈ സർട്ടിഫിക്കറ്റ് കോഴ്സിൽ ചേർക്കുന്നത്. കോഴ്സ് വിജയകരമായി പൂർത്തീകരിക്കുന്നവരെ ആവശ്യാനുസരണം ജോലിയ്ക്ക് നിയോഗിക്കുക എന്നതാണ് വനിതാഫെഡിന്റെ ലക്ഷ്യം.
Vanitha Fed and National AYUSH Mission launch the first batch of ‘Sakhi’ caregivers. Scientific pregnancy and postnatal care services now available at home
