രാജ്യത്തെ പാചകവാതക ക്ഷാമത്തിന് പരിഹാരമായി എഥനോൾ അധിഷ്ഠിത അടുപ്പുകൾ (Ethanol-based cookstoves) നടപ്പിലാക്കണമെന്ന ആവശ്യവുമായി ഗ്രെയിൻ എഥനോൾ മാനുഫാക്ചറേഴ്സ് അസോസിയേഷൻ (GEMA). പശ്ചിമേഷ്യൻ യുദ്ധത്തെത്തുടർന്ന് എൽപിജി ഇറക്കുമതിയിൽ പ്രതിസന്ധി നേരിടുന്ന സാഹചര്യത്തിൽ, ആഭ്യന്തരമായി ഉൽപ്പാദിപ്പിക്കുന്ന എഥനോൾ പാചക ഇന്ധനമായി ഉപയോഗിക്കുന്നത് ഗുണകരമാകുമെന്ന് ചൂണ്ടിക്കാട്ടി സംഘടന പ്രധാനമന്ത്രിക്ക് കത്തയച്ചു.
വീടുകൾക്കും ഹോട്ടലുകൾക്കും പുറമെ തട്ടുകടകളിലും ഇന്ധനമായി എഥനോൾ ഉപയോഗിക്കാമെന്നും ഇത് ഇന്ത്യയുടെ ഊർജ്ജ സുരക്ഷ വർദ്ധിപ്പിക്കുമെന്നും ജിഇഎംഎ പ്രസിഡന്റ് സി.കെ. ജെയിൻ വ്യക്തമാക്കി. എഥനോൾ അധിഷ്ഠിത പാചക സംവിധാനങ്ങളുടെ സാങ്കേതിക സാധ്യതയും സാമ്പത്തിക ലാഭവും പഠിക്കാൻ പ്രത്യേക പൈലറ്റ് പ്രോഗ്രാമുകൾ ആരംഭിക്കണമെന്നും സംഘടന സർക്കാരിനോട് അഭ്യർത്ഥിച്ചു.
പുകയില്ലാത്തതും പരിസ്ഥിതി സൗഹൃദവുമായ എഥനോൾ അടുപ്പുകൾ പല വിദേശ രാജ്യങ്ങളിലും വിജയകരമായി ഉപയോഗിക്കുന്നുണ്ട്. നിലവിൽ പെട്രോളിൽ എഥനോൾ കലർത്തുന്ന പദ്ധതി (EBP) രാജ്യത്ത് മികച്ച രീതിയിൽ മുന്നോട്ടുപോകുന്നുണ്ട്. ഇത് പാചക മേഖലയിലേക്ക് കൂടി വ്യാപിപ്പിക്കുന്നത് കർഷകർക്ക് കൂടുതൽ വരുമാനം ലഭിക്കാനും ഇറക്കുമതി ചെയ്യുന്ന എൽപിജിയെ ആശ്രയിക്കുന്നത് കുറയ്ക്കാനും സഹായിക്കുമെന്ന് സംഘടന വ്യക്തമാക്കി.
gema has urged the central government to introduce ethanol-based cookstoves to counter lpg shortages. discover how domestic ethanol production could revolutionize indian kitchens and enhance energy security
