യുഎഇയിലെ ഇന്ത്യൻ പാസ്പോർട്ട്, വിസ, അറ്റസ്റ്റേഷൻ സേവനങ്ങൾ നൽകുന്നതിനുള്ള ഔട്ട്സോഴ്സിംഗ് കരാർ ‘അൽ ഹിന്ദ് ടൂർസ് ആൻഡ് ട്രാവൽസ് എൽഎൽസി’ക്ക് കൈമാറുന്നതിന്റെ ഭാഗമായി ജൂൺ 26 മുതൽ 30 വരെ ഈ സേവനങ്ങൾ താത്കാലികമായി നിർത്തിവെക്കുമെന്ന് അബുദാബിയിലെ ഇന്ത്യൻ എംബസി അറിയിച്ചു. നിലവിൽ ഈ സേവനങ്ങൾ നൽകിവരുന്ന ബിഎൽഎസ് ഇന്റർനാഷണൽ (BLS International), എസ്ജിവൈവിഎസ് ഗ്ലോബൽ (SGIVS Global) എന്നീ ഏജൻസികൾ ജൂൺ 25-ന് ശേഷം പുതിയ അപേക്ഷകൾ സ്വീകരിക്കില്ല. ജൂലൈ 1 മുതലാണ് അൽ ഹിന്ദ് ടൂർസ് ആൻഡ് ട്രാവൽസ് ഔദ്യോഗികമായി ചുമതലയേൽക്കുന്നത്. ഈ മാറ്റത്തിന്റെ പശ്ചാത്തലത്തിൽ ജൂൺ 26 മുതൽ 30 വരെയുള്ള അഞ്ച് ദിവസങ്ങളിൽ പാസ്പോർട്ട്, വിസ സേവനങ്ങൾക്കായി സാധാരണ അപ്പോയിന്റ്മെന്റുകൾ ലഭ്യമാകില്ലെന്നും അപേക്ഷകർ ഇതനുസരിച്ച് മുൻകൂട്ടി കാര്യങ്ങൾ ആസൂത്രണം ചെയ്യണമെന്നും എംബസി വ്യക്തമാക്കി.
ഈ അഞ്ച് ദിവസത്തെ പരിവർത്തന കാലയളവിൽ അടിയന്തിര കൺസുലർ സേവനങ്ങൾ ആവശ്യമുള്ളവർക്ക് അബുദാബിയിലെ ഇന്ത്യൻ എംബസിയെയും ദുബായിലെ ഇന്ത്യൻ കോൺസുലേറ്റിനെയും നേരിട്ട് സമീപിക്കാവുന്നതാണ്. ഇതിനായി ടോൾ ഫ്രീ നമ്പരും (800 46342), വാട്സ്ആപ്പ് നമ്പരും (+971 54 309 0571), ഇമെയിൽ വിലാസവും ([email protected]) എംബസി പങ്കുവെച്ചിട്ടുണ്ട്. മുൻപ് സമർപ്പിച്ച അപേക്ഷകളുടെ തുടർനടപടികൾ നിലവിലുള്ള കേന്ദ്രങ്ങൾ വഴി തന്നെ പൂർത്തിയാക്കും. ജൂലൈ 1 മുതൽ എല്ലാ പുതിയ അപേക്ഷകളും അൽ ഹിന്ദ് ടൂർസ് നിയന്ത്രിക്കുന്ന കേന്ദ്രങ്ങൾ വഴിയായിരിക്കും സ്വീകരിക്കുക. യുഎഇയിലുടനീളമുള്ള ഇന്ത്യൻ പ്രവാസികൾക്ക് ബുദ്ധിമുട്ടുണ്ടാകാത്ത രീതിയിൽ സുഗമമായ കൈമാറ്റം ഉറപ്പാക്കാനുള്ള ക്രമീകരണങ്ങൾ പൂർത്തിയായി വരികയാണെന്നും ഔദ്യോഗിക അറിയിപ്പുകൾ മാത്രം ജനങ്ങൾ വിശ്വസിക്കണമെന്നും എംബസി കൂട്ടിച്ചേർത്തു.
Indian passport, visa, and attestation services in the UAE will be temporarily paused from June 26 to 30 as Al Hind Tours & Travels takes over from BLS International.
