നാസാ ബഹിരാകാശ സഞ്ചാരിയും മലയാളിയുമായ അനിൽ മേനോനും രണ്ട് റഷ്യൻ ബഹിരാകാശ യാത്രികരും വിജയകരമായി അന്താരാഷ്ട്ര ബഹിരാകാശ നിലയത്തിൽ (ISS) എത്തിച്ചേർന്നു. ബൈക്കനൂർ കോസ്മോഡ്രോമിൽ നിന്ന് സോയുസ് എംഎസ്-29 പേടകത്തിൽ കുതിച്ചുയർന്ന സംഘം മൂന്ന് മണിക്കൂർ നീണ്ട യാത്രയ്ക്കൊടുവിലാണ് ബുധനാഴ്ച പുലർച്ചയോടെ ബഹിരാകാശ നിലയത്തിൽ ഡോക്ക് ചെയ്തത്. ഇതോടെ എട്ട് മാസം നീണ്ടുനിൽക്കുന്ന സുപ്രധാനമായ ദൗത്യത്തിന് ഇവർ തുടക്കം കുറിച്ചു.
ബഹിരാകാശ നിലയത്തിൽ എത്തിയ സംഘം ഏപ്രിൽ 2027 വരെ അവിടെ തങ്ങും. മനുഷ്യന്റെ ബഹിരാകാശ പര്യവേഷണങ്ങളെ സഹായിക്കുന്നതിനും ഭൂമിയിലെ ജീവിതം മെച്ചപ്പെടുത്തുന്നതിനുമുള്ള ശാസ്ത്രീയ ഗവേഷണങ്ങളും സാങ്കേതിക പരീക്ഷണങ്ങളും ഇവർ ഈ കാലയളവിൽ നടത്തും. മൈക്രോഗ്രാവിറ്റി മനുഷ്യശരീരത്തിൽ ചെലുത്തുന്ന സ്വാധീനം, ഇൻട്രാവീനസ് ഫ്ലൂയിഡുകൾ നിർമ്മിക്കുന്നതിനുള്ള സാങ്കേതികവിദ്യകൾ, സെമി കണ്ടക്ടർ ക്രിസ്റ്റലുകളുടെ ഉത്പാദനം തുടങ്ങിയ വിവിധ മേഖലകളിൽ അനിൽ മേനോൻ പരീക്ഷണങ്ങൾ നടത്തും. കൂടാതെ, റഷ്യയും ഇന്ത്യയും തമ്മിലുള്ള ബഹിരാകാശ സഹകരണത്തിന്റെ ഭാഗമായി ഇന്ത്യൻ സ്കൂൾ വിദ്യാർത്ഥികൾ വരച്ച ചിത്രങ്ങളും പേടകത്തിൽ ബഹിരാകാശ നിലയത്തിലേക്ക് എത്തിച്ചിട്ടുണ്ട്.
Malayalam-origin NASA astronaut Anil Menon and two Russian cosmonauts successfully dock at the ISS via the Soyuz MS-29 for an 8-month scientific mission.
