ഭാരത് ഹെവി ഇലക്ട്രിക്കൽസ് ലിമിറ്റഡ് (BHEL) ഇന്ത്യയുടെ ആദ്യത്തെ തദ്ദേശീയ 1200 കെവി അൾട്രാ ഹൈ വോൾട്ടേജ് ആൾട്ടർനേറ്റിംഗ് കറന്റ് (UHVAC) ട്രാൻസ്ഫോർമർ വിജയകരമായി വികസിപ്പിച്ചു. ഭെല്ലിന്റെ ഭോപ്പാലിലെ അത്യാധുനിക നിർമ്മാണ കേന്ദ്രത്തിൽ പൂർണ്ണമായും ആഭ്യന്തര ഗവേഷണത്തിലൂടെയാണ് 333 എംവിഎ ശേഷിയുള്ള ഈ ട്രാൻസ്ഫോർമർ നിർമ്മിച്ചത്. അന്താരാഷ്ട്ര നിലവാരത്തിലുള്ള പരീക്ഷണങ്ങൾ പൂർത്തിയാക്കിയതോടെ, ഈ നൂതന സാങ്കേതികവിദ്യ സ്വന്തമായുള്ള ചുരുക്കം ചില രാജ്യങ്ങളുടെ പട്ടികയിലേക്ക് ഇന്ത്യയും ഇടംപിടിച്ചു. വിദേശ സാങ്കേതികവിദ്യകളെ ആശ്രയിക്കാതെ, രണ്ട് വർഷത്തെ കഠിനാധ്വാനത്തിലൂടെയാണ് ഭെൽ എൻജിനീയർമാർ ഈ നേട്ടം കൈവരിച്ചത്.
പവർഗ്രിഡുമായി സഹകരിച്ച് നിർമ്മിച്ച ഈ ട്രാൻസ്ഫോർമർ മധ്യപ്രദേശിലെ ബിനയിൽ സ്ഥാപിക്കുന്ന ഇന്ത്യയിലെ ആദ്യത്തെ 1200 കെവി നാഷണൽ ടെസ്റ്റ് സ്റ്റേഷനിലേക്കാണ് നൽകുന്നത്. രാജ്യത്തിന്റെ നിലവിലുള്ള 765 കെവി പ്രസരണ സംവിധാനത്തിൽ നിന്ന് കൂടുതൽ കാര്യക്ഷമമായ 1200 കെവിയിലേക്ക് മാറാനുള്ള ഇന്ത്യയുടെ നീക്കത്തിന് ഈ കണ്ടുപിടുത്തം വലിയ ഊർജ്ജം പകരും. രാജ്യത്തിന്റെ ഊർജ്ജ പ്രസരണ ശൃംഖലയിൽ സ്വയംപര്യാപ്തത കൈവരിക്കുന്നതിനുള്ള സുപ്രധാന നാഴികക്കല്ലായാണ് ഈ നേട്ടത്തെ ഭെൽ വിശേഷിപ്പിക്കുന്നത്.
BHEL achieves a major milestone by successfully developing India’s first indigenous 1200 kV UHVAC transformer at its Bhopal facility for the Bina test station.
